Ja jäˈäy dyajpëdëˈëktë mëj potsy

NËˈËN ja xëë jëmëjt nyajxy ja Noˈeejë yˈuˈunk yˈënäˈk tpattë mayë yˈuˈunk. Etsë tyäˈädë yˈuˈungëty yaˈktë ets ta nandëˈën tpattë yˈuˈunk yˈënäˈk. Ko waanë yˈijty ta ja jäˈäy ojts myayënë yä Naxwiiny.

Mä tyäˈädë tiempë ja jyukyˈajty tuˈugë Noˈeejë yˈoktatsktëy diˈib xyëˈäjt Nemrot. Nemrot axëkjäˈäy yˈijty, yaˈoˈkypyë jäˈäy ets nandëˈënë jëyujk animal. Këˈëm nyayajtëjkë rey ets tˈanaˈamany ja jäˈäy. Dios kyaj tˈoyˈijxy wiˈix jyaˈayˈajtyë Nemrot.

Ja jäˈäy jeˈeyë nety tuˈugë ayuk tkäjxtë. Nemrot tuˈukmukë nety tmëdatäˈäny ets mbäät tˈaneˈemy. Pääty, ¿mnijäˈäp ti tyuun? Tˈanmääjy ja jäˈäyëty ets dyajnaxkëdäˈäktët tuˈugë käjpn ets ta net dyajpëdëˈëktët tuˈugë mëj potsy kyukiˈpyny. Ok ix mä tyäˈädë dibujë tamë jäˈäy yajladriyëkojtë.

Jyobaa Dios kyaj tˈoyˈijxy ko ja jäˈäy tniwäˈkëdë ja potsy. Pes diˈib yëˈë tsyojk, yëˈë ets ja jäˈäyëty yˈayoˈoywyäˈxtët ets tsyëënëdët nëˈënë it Naxwinyëdë. Per ja jäˈäyëty nyayjënanëdë: Nˈokˈyajnaxkëdakëm tuˈugë käjpn ets ta net nyajpëdëˈkëm tuˈugë mëj potsy diˈibë kyopk jäˈtëp axtë tsäjwinm. ¡Ets dëˈën oypyënëty xyjantsy myëjkugäjxëm! Yëˈë tsyojktë yajmëjkugäjxtët ets kyaj yajmëjkugäjxëdë Dios.

Päätyë Dios ttukmastuty ja jäˈäyë potsy ets kyaj tnekyyajpattët. ¿Mnijäˈäp ti tyuun? Ajotkumonë jäˈäy dyajkäjxpëjktääjy wiingaty ayuk. Ets kyaj nyekynyayjaygyujkëdë nixim niyam. Pääty ja käjpn yajxëëmoojy Babel, o Babiloñʉ, diˈib ayuk wimbëtsëëmp “Naygyujoˈobë”.

Ta ja jäˈäy tsyoˈondääytyë jam Babel. Yˈayoˈoywyäˈxtääytyë, ets nyëjxtääytyë tsënaabyë dëˈën extëm nyayjaygyujkëdë.