¿Wiˈix mbudëkëyaˈanyëty ko xykyäjpxëdë Biiblyë?

¿Të näˈä xymyëmay xymyëdäjy ko xynyiwäˈägëyaˈany tuˈugë kajaaduunk? Waˈan ojts xyajnaywyaˈkxyëty ets xytyuuny wanaty wanaty parë kyaj nëgoo xytyimmëkjäˈäwë. Pes mbäät nanduˈun xyˈixy ko xykyäjpxäˈänëdë Biiblyë. Mbäät mjënäˈäny: “¿Mätsoowëts nˈokkäjpxtsondäˈägët?”. Mä yäˈädë leksion yëˈë yajnimaytyäˈägäämp tuˈuk majtskë käjpxwijën mëdiˈibë mbäät mbudëkëty parë xykyäjpxëdë Biiblyë ets xytyukxondäˈägët.

1. ¿Tiko yˈoyëty ngäjpxëmë Biiblyë bom bom?

Tuˈugë jäˈäy mëdiˈibë bom bom kyajpxypyë Biiblyë, o ja “Jyobaa yˈanaˈamën”, agujk jotkujk yajpäädäˈäny ets tyukˈoybyëtsëmaampy tijaty tyuumpy (käjpxë Salmo 1:1-3). Mbäät xykyäjpxtsondaˈaky wanaty mä tuˈukpë xëëw. Ko mas niˈigyë xykyäjpxët, ta mas niˈigyë xytyukxondäˈägäˈäny.

2. ¿Wiˈix mbudëkëyaˈanyëty ko xykyäjpxëdë Biiblyë?

Parë nnaytyukpudëjkëm mëdiˈibë ngäjpxëm mä Biiblyë, tsojkëp niboˈkxëm ets nwinmäˈäyëm ti jam ngäjpxëm. Kyaj jeˈeyë tsyokyëty ngäjpxëm, tsojkëbën nanduˈun nbawinmäˈäyëm ti myaytyäˈägaampy (Josué 1:8). Pääty ko xykyäjpxët nayajtëwëdë: “¿Titsë yäˈädë tekstë xytyukniˈˈijxëp mä Jyobaa? ¿Wiˈixëts mbäät nguytyuny mätsë njukyˈäjtën? ¿Wiˈixëts mbäät ndukpudëkë wiink jäˈäy?”.

3. ¿Wiˈix mbäädë tiempë xyjuuty parë xykyäjpxëdë Biiblyë?

¿Mtsiptakxëp xyjuudëdë tiempë parë xykyäjpxëdë Biiblyë? Duˈun nimay njäjtëm. Per mëdiˈibë mbäät mbudëkëty, yëˈë ko “yajxonë mdiempë” xyajtunët (Efesios 5:16, TNM). Mbäät xytyukniwitsë ti oorë xykyäjpxäˈäny tuˈuk tuˈugë xëëw. Näägë jäˈäy ja tkäjpxtë Biiblyë jopyëp, ta nanduˈun mëdiˈibë kyäjpxtëp ko waanë pyoˈkxtë mä të yˈagujkyxyëëwˈäjtäˈäytyë ets ta nanduˈun mëdiˈibë kyäjpxtëp ko myanaxanëdë. Ets mijts, ¿näˈä mbäät xykyajpxy?

AK NIJAWË NIˈIGYË

4. ¿Ti mbäät xytyuny parë niˈigyë xytyukxondäˈägët ko xykyäjpxëdë Biiblyë?

Tsiptakp ngäjpxtsondakëmë Biiblyë. Per mbäät ok njantsy kyäjpxäˈänënë duˈun extëm ko ok nxuˈkxjäˈäwënë kaaky tojkx mëdiˈibë nety kyaj ntsojkënyëˈäjtëm. Käjpxtë 1 Peedrʉ 2:2 ets nimaytyäˈäktë mëdiˈibë yä yajtëëpy:

• Ko xykyäjpxët bom bomë Biiblyë, ¿mbäädëdaa niˈigyë xytsyojkënyëˈaty xykyäjpxäˈänët?

Ixtë BIDEO mä yajnimaytyaˈaky wiˈix näägë ënäˈktëjk ok ttukxondaknëdë ko tkäjpxtë Biiblyë. Ta net xynyimaytyäˈäktët mëdiˈibë yä yajtëëpy:

BIDEO: Ënäˈktëjk mëdiˈibë tyam tyukxondaknëdëp ko tkäjpxtë Biiblyë (5:33)

• Extëm të xyˈixy mä bideo, ¿tijatyë nety yajtuˈuˈadujkëdëp ja ënäˈktëjk parë kyaj tkäjpxtëdë Biiblyë?

• ¿Ti pudëjkëdë parë duˈunyëm bom bom ojts tkäjpxtë?

• ¿Ti tyuundë parë niˈigyë ojts ttukxondäˈäktë?

Mbäät duˈun xytyuny:

• Käjpx tuˈugë Biiblyë mëdiˈibë wingëjxy. Mbäät xykyajpxyë Traducción del Nuevo Mundo o wiinkpë Biiblyë mëdiˈibë yajxon mjaygyujkëp.

• Käjpxtsondäˈäk mä niˈigyë xyˈoymyëdoy. Ix mä jyënaˈany “Käjpxtsondäˈägë Biiblyë”.

• Kujayë mëdiˈibë mgajpxypy. Jap xykyujayët mä jyënaˈany “Yäts ngujayë mäts të ngajpxyë Biiblyë” mëdiˈibë miimp mä yäˈädë liibrë.

• Yajtunë aplikasion JW Library^®. Pën myajjënajkypy, mbäät xykyajpxyë Biiblyë o xymyëdoowˈity oy mä myajpäädët.

• Yajtunë foyetë Naybyudëkë parë nˈëxpëjkëmë Diosë yˈAyuk. Mä myinyë mapë etsë dibujë parë mas niˈigyë xyjyaygyukët tijaty mgajpxypy mä Biiblyë.

5. Agäjpxë ti mˈëxpëkaampy

Käjpxtë Salmo 119:34 ets nimaytyäˈäktë mëdiˈibë yä yajtëëpy:

• ¿Tiko yˈoyëty mnuˈkxtäˈägët mä xykyakajpxynyëmë Biiblyë o mä xykyaˈˈagäjpxënëm ti mˈëxpëkaampy?

¿Wiˈix mbäät xyˈagäjpxë ti mˈëxpëkaampy? Mbäät duˈun xytyuny:

1. Käjpxtäˈäyë parrafo mëdiˈibë tyuktsondakypy.

2. Ëxtäˈäy ja tekstë mëdiˈibë miimp, käjpx ets winmay wiˈix nyaymyënëjkxyëty mët ti jam mˈëxpëjkypy.

3. Ajäˈäy mä yaˈˈatsoowëmbity. Yëˈë mbudëkëyanëp ko nety mˈëxpëky mët ja maˈestrë.

¿Mnijäˈäwëp?

Jyobaa tyestiigëty të kanäägë Biiblyë dyajtundë, per tyam yëˈë yajtuundëbë Traducción del Nuevo Mundo jaˈko kyaj të yajjääymyaˈaty, wingëjxy ets myëmiimbyë Diosë xyëëw (käjpx mä jw.org: “¿Myëdäjttëbë kyëˈëm Biiblyë Jyobaa tyestiigëty?”).

TI TË NJÄJTËM

Parë mbudëkëdët tijaty mgajpxypy mä Biiblyë, tukniwitsë ti oorë xykyäjpxäˈäny, amdowë Diosë naybyudëkë parë xyjaygyukët tijaty mgajpxypy ets agäjpxë tijaty mˈëxpëkaampy mët ja maˈestrë.

Ajamyatsë

• ¿Ti mbäät xytyuny parë mbudëkëdët tijaty mgajpxypy mä Biiblyë?

• ¿Näˈä mbäät xyjuutyë tiempë parë xykyäjpxët ets xyˈëxpëkëdë Biiblyë?

• ¿Tiko yˈoyëty ets jawyiin xyˈagäjpxët tijaty mˈëxpëkaampy mët ja maˈestrë?

AK PAYEˈEY

Ajamyatsë tijaty të yajnimaytyaˈaky mëdiˈibë mbäät mbudëkëty ko xykyäjpxëdë Biiblyë.

“Tukxondäˈäk ko xykyäjpxëdë Biiblyë” (Diˈib Xytyukˈawäˈänëm, num. 1 2017)

Nijawë tëgëk pëky wiˈix mbäät xykyajpxyë Biiblyë.

“¿Wiˈixëts mbäädë Biiblyë xypyudëkë? Myëduˈuk pëky: Ix tijatyë Biiblyë myaytyakypy” (Myiny mä jw.org)

Nijawë wiˈix xytyukxondäˈägët ko xykyäjpxëdë Biiblyë.

“¿Wiˈixëts mbäädë Biiblyë xypyudëkë? Myëmajtsk pëky: Jat wiˈix xytyukxondäˈägët ko xykyäjpxëdë Biiblyë” (Myiny mä jw.org)

Ix wiˈix näägë jäˈäy jyënäˈändë mëdiˈibë jeky kujk tkäjpxnëdë Biiblyë.

¿Wiˈix mbäät nˈëxpëjkëmë Biiblyë parë nnaytyukpudëjkëm? (2:06)