¿Waˈan niˈamukë kristianë tjantsy pyanëjkxtë Kristë?
¿MNIJÄˈÄP nääk jyaˈˈatyë jäˈäy diˈib jënandëp ko kristianëty? Tuˈugë ëxpëjkpajn jyënaˈany ko ja naa 2,300 miyongën mä jëmëjt 2010, ets yajpäättë mä 41,000 naxyë relijyonk, tuˈuk tuˈugë tyäˈädë relijyonk wiˈixëm tyukniˈˈixëdë ets wiˈixëm ja anaˈamën tmëdattë (Atlas of Global Christianity). Ko nimay nyaytyijëdë kristianë, ta mayë jäˈäy kyujoˈobëdë ets axëëk nyayjawëdë. Ets mbäädë net nyayajtëwëdë: “¿Waˈan niˈamukë kristianë tjantsy pyanëjkxtë Kristë?”.
Minë tyäˈädë jotmay duˈun nˈoknimaytyakëm: Pën mnëjkxäämp wiink paˈis, ¿wiˈix mbäät xyajnigëxeˈeky ko jam mtsoony mä xynyigajpxy? Kyaj tyuny ko jeˈeyë xynyigäjpxët, tsojkëp xyaˈixëdët ja mbasaporte o mneky diˈib nyigäjpxëp mä mtsoony. Nanduˈun jyaty ko njantsy pyanëjkxëmë Kristë, kyaj jeˈeyë tsyekyëty njënäˈänëm ko nmëbëjkëm. Tsojkëp nyajnigëxëˈkëm ko njantsy pyanëjkxëm. Min nˈokˈijxëm wiˈix.
Tyäˈädë ayuk kristianë ja tyuuntsondaky ko nety të nyaxy naa mäjk jëmëjt mä Jesus të yˈooky. Lucas tkujäˈäyë ko jam “Antyokiië tim jayëjp [yaj]mooy ja xyëë kristianë pënëty myëbëjktëp ja Kristë” (Apos. 11:26). Pënaty yajxëëmooytyë kristianë, tsojkëbë nety tpanëjkxtëdë Kristë. Per ¿ti yˈandijpy nbanëjkxëmë Kristë? Diccionario Teológico del Nuevo Testamento jyënaˈany: “Ko nbanëjkxëmë [Kristë] extëmë yˈëxpëjkpë, yëˈë yˈandijpy nnaygyëyäjkëm [...] nuˈun ja xëë jukyˈäjtën”. O ja tuk peky njënäˈänëm, diˈib jyantsy pyanëjkxypyë Kristë ets tpaduundäˈäy tukëˈëyë tijaty Jesus tukniˈˈijxë.
¿Ja tyamë jäˈäy diˈib duˈun jyantsy pyanëjkxtëbë Kristë? ¿Wiˈixë Jesus ojts tnigajpxy yaˈëxkapäˈäny pënaty jantsy panëjkxëdëp? Parë xynyijawët wiˈixë Biiblyë jyënaˈany, käjpxë tyäˈädë mëgoxkpë artikulo. Mä tuˈuk tuˈuk xykyajpxy, ta xynyijawëyaˈany wiˈixë Jesus ojts tnigajpxy yaˈëxkapäˈäny pënaty jantsy panëjkxëp. Nanduˈun nˈixäˈänëm wiˈix ojts tpëjtäˈäktë ijxpajtën ja kristianëty diˈib mä primer siiglë, ets ok, ta net nˈijxëm pënaty tyam duˈun pyaduundëp.