¿Mdukˈijxpataambyë Dios?

OKPAWINMAY ko tuˈugë mëtnaymyaayëbë diˈib mëjkumaapy ttunët ti diˈib kyaj xyjaygyukë. Mbäädë jäˈäy kyäjpxpäätyëty ko duˈun të yˈadëˈëtsy ets jyënäˈändët ko mëk axëkjäˈäy. ¿Mbuwäˈägëp ja jäˈäyëty o mˈawixëp parë këˈëm ja mëtnaymyaayëbë mdukmëtmaytyäˈägëdët? Pën ja mëtnaymyaayëbë kyaj jam yajpääty, ¿maˈkxtukëp parë këˈëm mdukmëtmaytyäˈägëdët ets kyaj tëgatsy mwinmääygyojët?

Oyxyëp ko duˈun mnayajtëyëty: “¿Nuˈunëts nˈixyˈatyë nmëtnaymyaayëbë? ¿Tikots nmëjkumay?”. Nanduˈunxyëp mbäät nnayajtëˈëwëm ko jäˈäy jyënäˈändë ko Dios axëkjäˈäy.

Mbäät tsip xyjaygyukë tiko duˈunë Dios tijaty të ttuny o tnasˈixë. Mayë jäˈäy mˈanëëmëyaˈanyëty ko Dios axëkjäˈäy ets nanduˈun myajwinmayaˈanyëty. ¿Mjënäängojëbë net ko Dios jantsy axëkjäˈäy mä xykyanijawënëm pën tëyˈäjtën o kyaj? Extëm mˈatsoy, ja nyigëxëˈëgäˈäny pën mˈixyˈajtypy yajxonë Dios o pën kyaj. Oknayajtëwëdë: “¿Tijaty oyˈäjtënëtsë Dios të xytyukmëduny?”.

Pën axëëk të mjaty të mgëbety, mbäät mwinmay ko Dios kyaj mëtnaymyaayëbëˈatyëty. Per okwinmay waanë: ¿yëˈë Diosë pyoky ko të xypyaatyë amay jotmay? ¿O yëˈë diˈib mgunuˈkxëp? Extëm të nˈijxëm, Satanás yëˈë diˈib “yä naxwiiny anaˈamp” (Fwank 12:31). Pääty yëˈë duˈun diˈib nyikëjxmˈäjtypyë ayoˈon diˈib jaˈäjtp yä Naxwiiny. Ets ¿këdii nan pääty nˈayoˈojëm mët ko nbokyjyaˈayˈäjtëm ets mët ko tijaty tyuny jyatyëty diˈib kyaj nˈawijx njëjpˈijxëm?

Per ¿ti Dios të ttuny? Biiblyë jyënaˈany ko yëˈë ojts dyajkojˈyë tsäjp etsë Nax. Ets tuk pëky diˈib të dyajkojy yëˈë niniˈkx këbäjk diˈib jantsy oy. Ets ko axtë njukyˈäjtënˈäjtëm yˈity kyëˈëjoty (Salmo 124:8; 139:14; Daniel 5:23). ¿Ti tyäˈädë yˈandijpy?

Yëˈë yˈandijpy ko pääty njukyˈäjtëm mët ko jyamëtyë Dios (Apostʉlʉty 17:28). Ets yëˈë të xynyamoˈoyëm tijaty nmëdäjtëm, extëm ko nmëdoˈojëm, njäˈäwëm, ndoˈon nmäjtsëm ets ko tijaty nxuˈkëm. Nan të xyajkojëm parë nmëdäjtëmë tsojkën etsë mëtnaymyaayëbë (Santya̱ˈa̱gʉ 1:17). ¿Këdii pääty mëët nnaymyaˈayëm, ntsojkëm ets ndukˈijxpajtëm mët ko xymyoˈoyëmë tyäˈädë kyunuˈkxën?

Per oy duˈun xyjanijawë, mbäät mtsiptakxëty xytyukˈijxpatëdë Dios. Mbäät mwinmay ko kyaj yajxon xytyimˈixyˈaty. Ets yajjaygyujkëp tiko dyuˈunëty, pes kyaj yajnimaytyaktäˈäy mä tyäˈädë artikulo tiko näägë jäˈäy jyënäˈändë ko axëkjäˈäyë Dios. Per ¿këdii oyxyëp ko xytyunyë mëjää parë niˈigyë xyˈixyˈatëdë Dios?a Pën mduumpy duˈun, ta nëjkx xynyijawë ja tëyˈäjtën mä pënën yëˈë. Dios kyaj yˈaxëkjäˈäyëty, yëˈë “dëˈën ja tsojkën” (1 Fwank 4:8).

[Notë]