“Täjkijpxyë ja nëˈë tuˈu mä xypyëjtaˈagyë mdeky” parë mwimbatët

KO JA israelitëty tsyoˈondë Babilonia mä jëmëjt 537 mä kyajnëm myinyë Jesus, ta Jyobaa tmëjotmaybyaty ja nëˈë tuˈu mä nety nyaxäˈändë parë jyäˈttët Jerusalén. Pääty jyënany: “Yaˈˈawäˈätstë nëˈë tuˈu parë nax käjpn. Yaˈoyëdë, yaˈoyëdë nëˈë tuˈu. Yajjëgaˈaktë tsää” (Is. 62:10). ¿Wiˈix ja israelitëty tmëmëdoodë ko duˈun yaˈˈanmääytyë? Waˈan nääk jyäämëˈktë parë ttäjˈoˈoyëdë ja nëˈë tuˈu ets mbäät pojënë nyaxtë pënatyë nety pamiinëdëp.

Ja tuˈu diˈib yoˈoytyë ja israelitëty mbäät nˈijxkijpxyëm mët ja tuˈu diˈib mbäät xypyudëjkëm parë nyajmëjwindëjkëmë Diosë tyuunk. Jyobaa tsyejpy ets niˈamukë pënaty mëduunëp tyuˈuyoˈoytyët ets kyaj yajtuˈuˈadukëdët diˈib kyaj tyim jëjpˈamëty. Pääty xykyäjpxwijëm mëdë Biiblyë: “Täjkijpxyë ja nëˈë tuˈu mä xypyëjtaˈagyë mdeky, ets tukëˈëyë mnëˈë mduˈu yˈitäˈäny seguurë” (Prov. 4:26). Niˈamukë tyäˈädë käjpxwijën xypyudëjkëm oy nˈënäˈkˈäjtëm o kyaj.

WINˈIX DIˈIB OY WINMBËTSËMËP

Ko jäˈäy tmaytyäˈäktë ënäˈktëjk, ta näˈäty dyajtundë tyäˈädë ayuk extëm “mbäät ttuny ti tyim tunaampy”, “oy mëk yajpääty” o “kajaanëm jyukyˈatäˈäny”. Ënäˈktëjk oy mëk yajpäättë, myëdäjttëbë wijyˈäjtën ets tyunandëp tijaty mëjwiin kajaa. Päätyë Biiblyë jyënaˈany: “Ja tsyujˈäjtënë ënäˈktëjk yëˈë ja mëkˈäjtën diˈib myëdäjttëp” (Prov. 20:29). Pënë ënäˈktëjk yajtuundëbë wyijyˈäjtën etsë jyot myëjää mä Diosë tyuunk, nëjkxëp tpääty ja tuunk diˈib të ttuknibëjtäägë ets nëjkxëp yajpääty agujk jotkujk.

Mä tyäˈädë tiempë, mayë jäˈäy yˈijx tyuundëp tijaty mbäädë ënäˈktëjk ttundë. Extëm ko tuˈugë Jyobaa tyestiigë oy tjuutyë kyalifikasion mä yˈeskuelë, ta ja diˈib ëwij käjpxwijëdëp, myaˈestrë o ja myëguˈuktëjk yˈanëˈëmxëdë parë niˈigyë yˈakˈëxpëkët ets tijaty ttukˈoybyëtsëmët mä tyäˈädë jukyˈäjtën. O pën wäˈkpëtsëëmp mä yˈëyëˈëk kyuyattë, nan mbäät mëktaˈaky yaˈˈanëëmë parë niˈigyë tniˈëxpëkët. ¿Të mijtsë duˈumbë jotmay xypyaaty? ¿Mˈixyˈajtypy tuˈugë jäˈäy diˈibë duˈumbë jotmay wyinguwäˈkëp? ¿Ti mbäät pyudëkëty tuˈugë Dios mëduumbë parë yajxon twinˈixët ti tyunaampy?

Tijatyë Biiblyë tukniˈˈijxëp, yëˈë mbäät mbudëkëty parë mduˈuyoˈoyët mä ja nëˈë tuˈu diˈib mas oy. Eclesiastés 12:1, jyënaˈany: “Jamyats, pën të myajkojˈyëty mä mˈënäˈkˈaty”. ¿Wiˈix mijts mbäät xyjamyetsy pën të myajkojˈyëty ets wiˈix mbäät niˈamukë njamyajtsëm?

Nˈokwinmäˈäyëm wiˈix jyajty tuˈugë nmëguˈukˈäjtëm diˈib xyëˈäjtypy Eric, diˈib África occidental.a Yëˈë jyantsy tyukuyataambyë netyë futbol, pääty ko netyë jyëmëjt 15 ta jäˈäy ojts jyakontrataratäˈänëty mä tuˈugë ekipë de futbol mä pyaˈis. Tyäˈädë yëˈë nety yˈandijpy, ko mbäädë nety tim tsojk yajmënëjkxy Europa parë yajxon tniˈëxpëkëdë futbol, duˈunë nety yˈawäˈätsäˈäny niˈigyë ja nyëˈë tyuˈu. Per ¿tuˈugyëbë netyë tyäˈädë mët ja käjpxwijën diˈib jënäämp jamyats pën të myajkojˈyëty? Min nˈokˈijxëm ti diˈibë Eric wyinˈijx ets ti xytyukniˈˈijxëm.

Ko Eric tˈëxpëjktsondakyë Biiblyë mëdë Jyobaa tyestiigëty, duˈunyëmë nety yˈeskuelëˈaty. Ta tnijäˈäwë ko diˈib të xyajkojëm yaˈoyëyaampy tukëˈëyë amay jotmay diˈib pyatypyë naxwinyëdë jäˈäy. Pyëjkë kuentë ko jëjpˈamë nety dyajtunëdë xyëë tiempë etsë jyot myëjää mä Diosë tyuunk. Pääty en lugäär myëjpëtsëmët mä futbol, ta nyëbejty ets tpëjtakyë wyinmäˈäny parë wyimbajtˈadëˈëtsäˈäny mä Diosë jyaˈa. Ok, ta yajtuunkmooy diˈib pyudëjkëbë mëjjäˈäy, ets ko waanë tiempë nyajxy, ta yajwooy mä tˈëxpëktë Biiblyë Yetyëjk diˈib Naytyuˈukˈäjttëp.

Koxyëp yëˈë twinˈijxyë ëyëˈk kuyäjtk, waˈanxyëp myëjpëtsëëmy ets myëkjäˈäytyaky. Per nyijäˈäwëbë nety ko tëyˈäjtën extëm jyënaˈanyë tyäˈädë käjpxwijën: “Ja mëkjäˈäy duˈun tˈixyë myëkjäˈäyˈäjtënë extëmë kyäjpn diˈib täˈtspëky, duˈun tpawinmay extëmë potsy diˈib kuwäämp” (Prov. 18:11). Duˈunë duˈun, ko jäˈäy tmëdatyë meeny, mbäät wyinmay ko seguurë yajpääty, per nëgoobë nyaywyinˈëënyëty. Pënaty mëktaˈaky nayajmëkjäˈäytyäˈäganëp mbäät jeˈeyë “nëgoo nyayaˈˈayowëdë” (1 Tim. 6:9, 10).

Per ta mayë ënäˈktëjk diˈib yajpattëp agujk jotkujk ets seguurë yˈittë ko Jyobaa yëˈë kuentˈatanëdëp mët ko të twinˈixtë aduˈuk tmëdunäˈändë. Eric jyënaˈany: “Yëˈëjëts të nbuwäˈägë tuˈugë ekipë diˈib mas nimay, mä yajpäättë prekursoorëty. Yëˈë mas oybyë ekipë diˈibëts mbäät ndukˈitë, ets ngukäjpxëbëtsë Jyobaa kojëts të xypyudëkë parëts nbanëjkxët ja nëˈë tuˈu diˈib yajkypyë jotkujkˈäjtën ets diˈib oy wimbëtsëëmp”.

¿Ets mijts? En lugäär xyˈëxtäˈäyët tijatyë naxwinyëdë jäˈäy pyaˈoˈktëëdëp, ¿tiko xykyayajtäˈtspëky ja mnëˈë mduˈu parë mdunët prekursoor?

YAJJËGAˈAK DIˈIB MYAJTUˈUDUJKËP

Tuˈugë kasäädë jäˈäy diˈib ojtstë Betel jap Estados Unidos, jantsy agujk jotkujk tˈijxtë ja betelitëty diˈib jap tuundëp. Ja nyëdoˈoxy duˈun ok jyënany: “Tëjëtsë nety nˈijxwëˈëmdë ko jantsy oyëts njukyˈattë”. Yëˈë mëdë nyaˈay ta tpëjtaktë wyinmäˈäny parë niˈigyë dyajmëjwindëkëyäˈändë Diosë tyuunk.

Ko ogäˈän dyajtëgäjtstë jyukyˈäjtën mëk tjäˈäwëdë. Per tëgok, ta yajwinmääyëdë tuˈugë tekstë diˈib miin mä foyetë Examinando. Yëˈë Fwank 8:31, mä Jesus jyënany: “Pën mbadiimpy extëmëts miits nˈanëëmëdë, nˈëxpëjkpëˈatëpts miitsëty”. Tyäˈädë tekstë duˈun yajwinmääyëdë: “Tijaty tyam nduˈunëm parë adëyë njukyˈäjtëm, kyaj duˈunyë nyatëgoy”. Ta ttoˈktë ja tyëjk diˈibë nety jantsy mëj, nyaytyukniwatsë tijatyë nety mbäät yajtuˈudukyëty ets ta ojts nyëjkxtë mä tuˈugë naymyujkën diˈib yajtëgoyˈajtypyë naybyudëkë. Tyam tyundë prekursoor, ets nanduˈun tyundë mä yajkojˈyë Tëjk mä nˈëxpëjkëm ets nan tuundëp mä asamblee tëgëk xëëbë. ¿Wiˈix nyayjawëdë tyäˈädë kasäädë jäˈäy? Yëˈë jyënäˈändë: “Jantsy agujk jotkujkëts nnayjawëdë kojëts adëyë njukyˈattë, kojëts ndundë extëmë Diosë kyäjpn xyˈanmäˈäyëm”.

WËˈËM MÄ JA NËˈË TUˈU

Salomón duˈun tkujäˈäyë: “Yëˈë mwiin tsojkëp tëyë tˈixët diˈib mwindum, duˈun, pëjtäˈägë mˈijxënë mwinduuy” (Prov. 4:25). Duˈun extëm tuˈugë tsyofeer tsojkëp tëyë yˈijxën tpëjtäˈägët mä ja karreteerë, nanduˈun ëtsäjtëm, tsojkëp tëyë ja ijxën nbëjtakëm parë niˈigyë nyajmëjwindëjkëmë Diosë tyuunk ets njëjpkudijëm tijaty xyajtuˈudukäˈänëm.

¿Tijaty mbäät ndukniwinmäˈäyëm? Mbäät nduˈunëm prekursoor, nnëjkxëm mä tuˈugë naymyujkën diˈib yajtëgoyˈajtypyë käjpxwäˈkxpë, o mä jyaˈˈaty mayë käjpxwäˈkxpë per tëgoyˈäjtpë mëjjäˈäytyëjk ets diˈib pyudëjkëbë mëjjäˈäy. ¿Mbäät mnayˈawanëty parë xypyudëkët? ¿Tiko xykyayajtëyë sirkuitë? Mbäät xyajnidëwë diˈibë naymyujkën yajtëgoyˈajtypyë naybyudëkë, pën mnëjkxäämp jagam.b

Min jatëgok nˈokjamyajtsëm extëm jyënaˈanyë Isaías 62:10. Seguurë ko näägë israelitëty mëk tyuundë parë ojts dyajwäˈätstë ets ttäjˈoˈoyëdë ja nëˈë tuˈu parë mbäät ja myëguˈuktëjk nyaxtë ets jyëmbittët mä ja nyax kyäjpn. ¿Ojts tsyobääty ko duˈun tyuundë? Ojts, pes ja Diosë kyäjpn jäjttë oy mëk. Pääty, pën mijts të xytyuknibëjtäägë xypyäädäˈäny tuˈugë tuunk diˈibë Dios jyaˈäjtypy, këdii mˈëxtëkëwaˈaky. Mëdë Jyobaa nyaybyudëkë mbäät xypyaaty. Yajjëgaˈak mä mnëˈë mduˈu tijaty mbäät myajtuˈudukyëty ets amdowë Dios ja wijyˈäjtën. Ko duˈun xytyunët, nëjkxëp xypyëkyë kuentë wiˈix mbudëkëty parë “[xyajkijpxyët] ja nëˈë tuˈu mä xypyëjtaˈagyë mdeky” (Prov. 4:26).

[Notë]