Wiˈix jatëgok oy mˈitët mëdë Jyobaa

JËMËJT jëmëjt mayë jäˈäy jatëgok tnijëmbittë Jyobaa. Nˈokpawinmäˈäyëm nuˈunën jyamˈatyë “xondakën tsäjpotm” ko nmëguˈukˈäjtëm tnijëmbittë Jyobaa (Luk. 15:7, 10). Pën mijts të xynyijëmbityë Jyobaa, mbäät mˈity seguurë ko Jesus, anklësëty etsë Jyobaa jantsy agujk jotkujk nyayjyawëdë ko të mjëmbity mä kongregasionk. Per mbäädë net tyam wiˈixëm xypyaaty ja amay jotmay mä jatëgok xyajkëktëkë mnaymyayë mëdë Jyobaa. ¿Tijaty jotmay mbäät xypyaaty ets ti mbäät mbudëkëty?

TIJATY MBÄÄT YAJTUˈUˈADUKËDË

Mayë nmëguˈukˈäjtëm jantsy axëëk nyayjyawëdë ko jatëgok jyëmbittë mä kongregasionk. Pën duˈun mnayjyawëty, waˈan xyjyaygyukë extëm ojts nyayjyawëty ja rey David. Pes oyë nety tjanijawë ko të yajpokymyeˈkxy, yëˈë jyënany: “Mëk axëëgëts xyajnayjyawëty ja nboky ngaytyey” (Sal. 40:12; 65:3). Ko tuˈugë jäˈäy tnijëmbityë Jyobaa, mbäädë net axëëk jyantsy nyayjyawëty mä diˈib të ttuny o ttsoytyuˈunjawët kanäk jëmëjt. Extëmë Isabelle,a diˈib ijt ekspulsaadë 20 jëmëjt naxy, jyënany: “Tsipëtsë nety nmëbëkët ko jantsy tëtsë Jyobaa xypyokymyeˈkxy”. Pën mijts duˈun mnayjyawëty, mbäät jatëgokë Jyobaa xymyëjagamgeˈeky (Prov. 24:10). Tunë mëjääw parë kyaj duˈun mnekynyayjyawëdët.

Ta netë wiinkpë nmëguˈukˈäjtëm diˈib jyantsy myëmääy jyantsy myëdäjttëp ti yˈoktundëp parë jatëgok oy yˈittët mëdë Jyobaa. Antoine, diˈib jatëgok jëmbit mä Diosë kyäjpn, jyënany: “Tëtsë nety njäˈäytyëgooytyaˈay tijatyëtsë nduumpy mäts nDiosmëduny”. Ko duˈun näägë nmëguˈukˈäjtëm jyattë, mbäädë net kyaj tnekyjyotmoˈoytyë Diosë tyuunk.

Min nˈokpëjtakëm tuˈugë ijxpajtën. Ko urakan nyaxy ets dyajwindëgoyë jëën tëjk, mbäädë net nwinmäˈäyëm nuˈunën ja xëëw tiempë ets ja jot mëjääw nyajtunäˈänëm parë nyaˈˈaˈoˈoyëm jatëgokë tëjk. Nenduˈunën jyaty mët tuˈugë Dios mëduumbë, pën të Jyobaa tmastuˈuty ets të pyokytyuny mëjwiin kajaa, mbäädë net wyinmay ko tsojkëp ttunëdë mëjääw parë jatëgok nyayaˈoyëdët. Per mbäät duˈun ttuny mëdë Jyobaa nyaybyudëkë.

Jyobaa xyˈanmäˈäyëm: “Mindë, ets nˈokˈyaˈoˈoyëmë jotmay animajtsk” (Is. 1:18). Jyobaa mtsojkëp mët ko të xytyunyë mëjääw parë jatëgok oy mëët mˈity. Okwinmayë tyäˈädë: Mët ko të xynyijëmbityë Jyobaa, mbäädë net dyajtunyë mˈijxpajtën parë ttukˈixëdë Satanás ko andakp (Prov. 27:11).

Mijts të xymyëwingonyë Jyobaa mët ko të xynyijëmbity, ets wyandakypy ko nan mëwingonanëp (Sant. 4:8). Oy ko ja nmëguˈukˈäjtëm tˈixtë ko të jatëgok mjëmbity mä ja kongregasionk. Per ¿ti mbäät xyˈaktuny? Tsojkëp niˈigyë xyajmëjwindëkëdë mtsojkën mä Jyobaa. ¿Wiˈix mbäät duˈun xytyuny?

PËJTÄˈÄGË MWINMÄˈÄNY PARË XYTYUNËT DIˈIB MBÄÄT XYMYËMADAˈAKY

Duˈun extëm ja tëjk diˈib të wyindëgoy, mbäät duˈunyëm ja yˈëjx mëk yˈity, nan mbäät duˈunyëm xymyëbëkyë Jyobaa ets tijaty të twandaˈaky. Ets duˈun extëm ja tëjk yajnikojˈoyë, nan tsojkëbën jatëgok xyˈijxwëˈëmët parë mjukyˈatët extëmë Dios mëduumbë, ko mnëjkxët käjpxwäˈkxpë ets xyajnaxët ja mxëëw mdiempë mët ja nmëguˈukˈäjtëm. Min nˈokˈijxëm tijaty mbäät xytyuny.

Mmënuˈkxtäˈägë Jyobaa janääm jatsojk. Pën duˈunyëm axëëk mnayjyawëty ko të mbokytyuny, Jyobaa jyaygyujkëp ko mbäät mtsiptakxëty xymyënuˈkxtäˈägët (Rom. 8:26). Per oy duˈun mnayjyawëdët, mmënuˈkxtäˈäk xëmë Jyobaa ets anëëmë ko mjantsy myëtnaymyaayëbëˈataampy (Rom. 12:12). Andrej jyënaˈany: “Jantsy axëëgëtsë nety xyajnayjyawëty ja nboky ngaytyey ets tsoytyuumbëts. Per kots tëgok tëgokë Jyobaa nmënuˈkxtaky, tats mas oy nnayjyäˈäwë ets mas jotkujk”. Pën kyaj xynyijawë wiˈixë Jyobaa xymyënuˈkxtäˈägët, ¿ti mbäät mbudëkëty? Yëˈko xypyawinmayët wiˈixë rey David ojts tmënuˈkxtaˈagyë Jyobaa ko jyodëmbijty, tyäˈädë nuˈkxtakën jap yajpääty mä Salmos 51 etsë 65.

Ëxpëk xëmë Biiblyë. Tyäˈädë yëˈë mbudëkëyanëp parë niˈigyë Jyobaa xytsyokët ets xymyëbëkët (Sal. 19:7-11). Felipe jyënany: “Kots kyaj nekyˈëxpëjky, yëˈëts ojts xyajxeemy ets nmëdëgooyëtsë Jyobaa. Kom kyajtsë nety jatëgok duˈun nekyjyatäˈäny, tatsë nwinmäˈäny nbëjtaky parëts xëmë nˈëxpëkäˈäny etsëts ngäjpxäˈänyë Biiblyë”. Mijts nan mbäät duˈun xytyuny. Pën kyaj xynyijawë tijaty mbäät xyˈëxpëky, mbäät xyˈanëëmë tuˈugë mëtnaymyaayëbë diˈib oy Dios mëduump parë mbudëkëdët.

Naymyayëdë jatëgok mëdë nmëguˈukˈäjtëm. Näägë nmëguˈukˈäjtëm diˈib jëmbijttëp jatëgok mä kongregasionk, yëˈë myëmääy myëdäjttëp ko wiink yˈixëdët ja myëguˈuktëjk. Larissa jyënany: “Jantsy tsoytyuunëts kots njëmbijty. Duˈunëts njäˈäwë ko tëtsë nety nmëdëgoytyë ja nmëguˈukˈäjtëm. Jekyëts duˈun nnayjyäˈäwë”. Mbäät mˈity seguurë ko ja mëjjäˈäytyëjkëty ets ja nmëguˈukˈäjtëm, mbudëkëyanëdëp parë jatëgok mnaymyayëdët mëdë Jyobaa (ixë rekuäädrë “Ti mbäät ttundë ja mëjjäˈäytyëjk”). Yëˈëjëty, jantsy agujk jotkujk nyayjyawëdë ko jatëgok të mjëmbity ets tsyojktëp parë nenduˈun mnayjyawëdët agujk jotkujk (Prov. 17:17).

¿Ti mbäät xytyuny parë niˈigyë nmëguˈukˈäjtëm xymyëwingondët? Mnëjkxët xëmë reunyonk ets ëwäˈkx käjpxwäˈkxpë. ¿Wiˈix mbudëkëyaˈanyëty ko duˈun xytyunët? Félix jyënany: “Xyjyantsy jyëjpˈijxtëbëtsë nety ja nmëguˈukˈäjtëm. Njäˈäwëts ko xytsyojktëts. Niˈamukëts xypyudëjkëdë parëts oy nnayjyawëdët mä kongregasionk, tëtsë netyë Jyobaa xypyokymyeˈkxy ets mbäädëts nety duˈunyëm nmëduunˈadëˈëtsy” (ixë rekuäädrë “Tijaty mbäät xytyuny”).

KËDII MˈËXTËKËWAˈAKY

Mientrës niˈigyë xyajkëktëkë mnaymyayë mëdë Jyobaa, Satanás duˈunyëm mmoˈoyaˈanyëty amay jotmay parë dyajxaamäˈänyë mëbëjkën (Luk. 4:13). Pën kyaj duˈun mjatäˈäny, tsojkëp niˈigyë xyajkëktëkëdë mëbëjkën.

Jyobaa nenduˈun ttukwandaˈaky ja byorreegëty: “Ja diˈib të yeˈeytyëgoy, nˈëxtäˈäyaambyëts, diˈib të yeˈeygyeˈeky nyajjëmbitaambyëts, diˈib të tsyayuty nbitaampy nmotsaambyëts ets ja diˈib yajpatp amääy amutsk njotmëkmoˈoyaambyëts” (Ezeq. 34:16). Nimayë nmëguˈukˈäjtëm të Jyobaa pyudëkëdë parë jatëgok oy mëët yˈittë. Pääty it seguurë ko nan mbudëkëyanëp parë niˈigyë xyajkëktëkët ja mnaymyayë.