DILONGI 44
Mafedji makima mu ma gusepedisanga Nzambi?
Yehowa a guzolanga mbi du Sepedi yi lujingu, kega ma guzolanga mbi duhangi mafedji madangu mega. Gashi mafedji makima mu magusepedisanga Nzambi? Mu madangu ma mafedji, yigi du le hanga mu gulesa mbi mu dwena zola Yehowa?
1. Mumwilegi Yehowa a gukondanga sepela yi mafedji mengi?
U le yiduga mu gwishiya mbi mafedji mengi lō mena wagana yi malongi ma Bible kega ma gagadugidi mu mabundu ma luvunu. Mafedji mega mena kala yi guwagana yi yisalu y’ampeve a mbi to malongi mo mena hosa mbi moni lō ugufanga. Mafedji to mambu mega ma guhanganga hadu, ma gagadugidi mu malongi ma luvunu. A gumahanganga mumwila a guyindulanga mbi, mambu ma mbi mu magu’agumina mbi lō’ajidjisa shigu ji moshi gina ji ambuda. (Yezaya 65:11) Yehowa a gugebisanga asadi endji mbi: “Gabanenu yi owu . . . kega wegenu gugama gima gi mvindu.”—2 Bakorinto 6:17.a
2. Yehowa a gudifanga pila yigi mumwila yi mafedji mo m’aguhwanga hadu lugumu lwingi?
Yehowa ena du gebisa mumwila du kondji bwa mu muhedu u “gusa mudjima gwena hadu.” (Danga Yeremia 17:5.) Mafedji mega mena kala mumwila gugumisa afumu to hadu ega o gafwidi mumwila yi peyi. Hadu ega a guhanganga kega mafedji mumwila yi dipanda to mu guhwa yidimbu yo yigumonisanga peyi lugumu mumbandu drapo. (1 Yoane 5:21) Mafedji mega kega mena gumisa yimvuga yi politiki to yimvuga yega yi hadu. Yehowa a gwifa pila yigi mbi mu dubahwa mudu to gimvuga gi moshi lugumu lwingi, ngolu-ngolu mbi mudu to gimvuga gieni giba pusa hadu mu guhanga mambu mo maba konda wagana yi luzolu lwendji?
3. Mambu megi ma le hanga mbi Nzambi a kondji gumbula mafedji mega?
Bible mu digudunisanga “guhidjisa ndjilu mu gunwa magana, guhanga mafedji mo hadu enahanga mambu ma gisaga- aga, [kega] guhanga mafedji mo hadu ena nwa magana mengi.” (1 Piere 4:3) Gu mafedji mega hadu lō’agudiyalanga kega a guhanganga mambu ma ufudu gibeni. Hohana, mu gulaba gukala andugu a Yehowa, du fe duna gibeni mafedji mo hadu a guhanganga mambu’ama ma mvindu.
WISHIYA KEGA MAMBU MENGI
Du dadi mambu ma u fe hanga mu gusenda maluganu ma gusepedisanga Yehowa mu mambu ma dadila mafedji.
4. Duna mafedji mo mena konda sepedisa Yehowa
Dangenu Baefezo 5:10, gu dima hanenu mamvudu mu miwu mi:
Mambu megi du fe dadila pimbu-pimbu gu twala yi gusenda luganu mbi mudwa hanga fedji di moshi gina to lowu?
Mafedji megi hadu engi a guhanganga gihani gi’ugujinganga?
U yindula yigi, mafedji beni mu magusepedisanga Yehowa?
Mu mbandu, u gadihula gadi pila Nzambi a gwifanga dangu hadu a guhanganga mafedji m’aniversere ma lubudugu? Bible lō diguhoshilanga ata ndambu sadi u moshi u Yehowa yo u gahangidi fedji di’aniversere di lubudugu, gashi mu diguhoshilanga mafedji madi ma lubudugu ma hadu o agakondanga gusambila Yehowa. Dangenu Kuyantika 40:20-22 kega Matayo 14:6-10. Gu dima hanenu mamvudu mu miwu mi:
Mambu megi ma pila yi moshi ma gahangamanini mu mafedji ma mo madi?
Pila yi dudala mu masolu’ama ma Bible, uba yindula mbi Yehowa a gudifanga pila yigi dangu di guhanganga hadu mafedji m’aniversere di lubudugu?
U le gudihula kega mbi, ‘Yehowa ma gudiyangigisanga gibeni mbi miyaya gu fedji di moshi di lubudugu to gu fedji diega dio diena konda wagana yi mambu ma guhosanga Bible?’ Dangenu Kubasika 32:1-8. Gu dima, dalenu VIDEYO kega hanenu mamvudu mu miwu mi:
Mumwilegi du fe gamba gwishiya mbi mambu mo ma dubazola guhanga mu mena hwa Yehowa kieshi?
Yigi du le hanga?
Miwu mio mi gagusadisa mu gwishiya mbi fedji di moshi mu digusepedisanga Nzambi to lowu
Fedji beni mu diguwagananga yi malongi ma Bible? Mu gusenda mvudu, gamba gwishiya tegu gishina gi fedji beni.
Diguhwanga hadu lugumu lwingi, mu diguhwanga yimvuga to yidimbu yo yi gumonisanga peyi lugumu lwingi? Du gugumisanga Yehowa guhida yima yikima yega kega dwena sa mudjima mbi ye buna u gamanisa mapashi ma gifudji gi.
Mambu ma guhangamananga gu fedji beni, mu mena wagana yi minshigu mi Bible? Du fe laba gukala ukedji, mu mambu ma dwena yindula, ma dwena hanga kega ma dwena hosa.
5. Sadisa hadu ega mu gujidjisa mambu ma u gugwigilanga
Mbi hadu ega maba gupusa mu guhanga mafedji mo mena konda sepedisa Yehowa, gu le kala pashi mu guduna. Kala lujidu dangu di’ubagwadendudila mbi mumwilegi wena duna mafedji beni. Kala mayela kega lō guhelwa mwila. Mu gudala mambu ma u fe hanga, dalenu VIDEYO.
Dangenu Matayo 7:12, gu dima hanenu mamvudu mu miwu mi:
Pila yi ba lesa maverse ma, gwena pimbu mu gudunisa apangi a dibuda dienu o ena konda sambila Yehowa mu guhanga fedji dimoshi?
Yigi u fe hanga mu gugumbudisa apangi a dibuda dienu mbi mu wena gwazola kega mu wena sepela yi o ata lō wa hanga fedji yi o?
6. Yehowa a guzolanga mbi du kadi mu gieshi
Yehowa a guzolanga mbi du hidjishi madangu ma pimbu yi apangi a dibuda diedu kega andugu edu. Dangenu Longi 8:15, gu dima hanenu mvudu mu muwu wu:
Pila yi ba lesa verse di, yigi yiba gugumbudisa mbi Yehowa ena zola mbi du kadi mu gieshi?
Yehowa a guzolanga mbi asadi endji a hidjishi madangu ma pimbu kega ma kieshi. Dala VIDEYO mu gudala gieshi gingi gio asadi a Yehowa ena kala giogi mu malugudaganu ma neni ma mapeyi mengi.
Dangenu Bagalatia 6:10, gu dima hanenu mamvudu mu miwu mi:
Mu gulesa mbi dubahanga “mambu ma pimbu” mumwila yi hadu ega gu fe lomba gaga mbi duhangi mafedji mo hadu engi a guhanganga?
Yigi yena guhwa gieshi jingi—gwena gumena gaga gilumbu gi fedji di moshi mu guhwa mudu kado to gumugapila kosu gilumbu gio gi’uzola?
Madangu mega, Ambangi a Yehowa engi ena hidjisa dangu di pimbu mu dibaku di moshi gina yi anowu to kutu ena hwa anowu makado mo m’akondjidi yindula. Mbi wena yi ana, mambu meki ma pimbu u le hanga mu gu’asepedisa?
HADU EGA ENI GUHOSA MBI: “Gugamba gwishiya gishina gi fedji di moshi, lō gwena gibeni funu. Gwena gaga mumwila mu guhidjisa dangu di pimbu yi dibuda diedu kega andugu.”
Ayi yigi u le hosa?
MU KUFI
Yehowa ena zola mbi du hidjishi madangu ma pimbu yi dibuda kega andugu edu. Gashi a guzolanga ke mbi dukondji hanga mafedji mo mena konda gumusepedisa.
Mvudugilu
Miwu migi du le dihula mu gwishiya mbi fedji di moshi mu diena sepedisa Yehowa to lowu?
Pila yigi du le sadisa dibuda kega andugu edu mu gubagisa maluganu medu mu mambu ma dadila mafedji?
Pila yigi weshiya mbi Yehowa ena zola mbi du kadi mu gieshi kega du hidjishi madangu ma pimbu?
DALA KEGA
Dala ndambu yi mafedji mo Akristu ena konda hanga.
“Mumwilegi Ambangi a Yehowa ena konda guhanga mafedji mega?” (Disolu dio diena mu jw.org)
Dala yiguma yiwana yo yena dusadisa mu gugumbula mbi mafedji m’aniversere di lubudugu lō mena sepedisa Nzambi.
Dala pila galengi ga moshi ga gahangidi mambu yi lujidu lukima gu nzu-kanda dangu di gamuseyanga andugu endji mumwila lō’ena da kindji yi Nowele.
Akristu engi gibeni lō’aguhanganga kindji yi Nowele. Pila yigi a gudifanga mumwila yi luganu lu lu’agasendjidi?
“A gazwidi gima gi moshi gi guhida pimbu” (Nzozulu ya Nkengi 1/12/2012)