Disumu diena yigi?
Mvudu yi Bible
Disumu diena guhanga gima gi moshi, mawi, kega mangindu mena gonda guwagana yi jishigu ji Nzambi. Gu nadendula kega guhanga mambu mo mena jiya shigu ji Nzambi to guhanga mambu ma gugonda lunungu gu mesu ma Nzambi. (1 Yoane 3:4; 5:17) Bible mu dieni guhosa kega mbi guduna guhanga mambu ma pimbu,—gwena kega disumu.—Yakobo 4:17.
Mu mandaga ma gishina amo m’agasonigidi Bible, mangogu mo ma hangila mu guhoshila disumu mana dendula “gugonda gununga mu guhanga gima gimoshi,” to gugonda gulungisa luganu lwayi. Mumbandu, gimvuga gimoshi gi asoda a Izraele ditunda ma geshiyanga pimbu-pimbu guhangila lanse “lō gugahidanga mu mbimba.” Mbi malumuna ngogu yi gaga pila yi yena, du le danga mbi “lō guga hanganga disumu.” (Bazuzi 20:16) Hohana, disumu diena gugonda gulungisa mambu ma shigu ji gulunga ji Nzambi.
Nzambi ena yi swa yi gudushila jishigu mumwila ena Ngangi wedu. (Kusonga 4:11) Nzambi ma gadusambisa mu mambu mo ma dweni guhanga.—Baroma 14:12.
Gu le hangamana kega mbi mudu mu moshi akondji guhanga disumu ada ki?
Lowu. Bible dibahosa mbi “hadu akima a gahanga disumu kega lō a le gumonisa kembu ji Nzambi.” Baroma 3:23; 1 Bantotila 8:46; Longi 7:20; 1 Yoane 1:8) Mumwilegi?
Hadu a tegu Adamu yi Eva, a gakedi tegu hadu a gugonda masumu. Mumwila Nzambi a gagangidi giogiogi kega mu gifwani giendji. (Kuyantika 1:27) Gashi gudima, a gagumini hadu’a masumu mumwila lō a galemfugidi gwena Nzambi. (Kuyantika 3:5, 6, 17-19) Dangu di aga budjidi ana, ma g’ahwedi kega disumu yi yifu yowu. (Baroma 5:12) Hohana, Davidi todjila u Izraele a gahoshidi mbi: “Mu yigabudugidi mu gifu.”—Nkunga 51:5.
Gugigidi masumu mamoshi mena mbi guhida masumu mega?
Giogiogi. Mumbandu, Bible diguhosanga mbi hadu a sodome a gakedi “hadu a mbi kega ansumugi a neni” masumu mowu ma gagumini “gilemu gingi.” (Kuyantika 13:13; 18:20) Dudadidi mambu masadu amo ma guhanganga mbi disumu di gumi uneni to gilemu.
Uneni u disumu. Bible mu dieni gudugebisa mu gugonda guhanga masomu maneni, mumbandu pite, gusambila yidegi, gwimbula, gulawuga magana, gudambula yima yi hadu ega, gujiya hadu kega guhanga yisalu yi ampeve ambi. (1 Bakorinto 6:9-11; Kusonga 21:8) Bible mu dieni gulesa mbi masumu ma lō mena pila yimoshi yi masumu mo meni guhanga hadu mu gidiba to gugonda guganisa, mumbandu, guhosa to guhanga mambu mo ma le guhwa hadu ega pashi. (Bingana 12:18; Baefezo 4:31, 32) Ada gio, Bible mu dieni gudulesa mu gugonda gudala pamba masumu makima, mumwila gu le guduneya mu guhanga masumu maneni mo meni gujiya gibeni shigu ji Nzambi.—Matayo 5:27, 28.
Ngindu ajo ji pushidi mudu mu guhanga disumu. Hadu ega eni guhanga masumu mumwila lō eni gwishiya mambu mo ma guzolanga Nzambi. (Bisalu 17:30; 1 Timoteo 1:13) Bible lō dieni gugumbusa kega masumu ma pila yi, gashi mu dieni gulesa mbi, lō mena pila yi moshi yi masumu ma guhanganga mudu mu gujiya shigu ji Nzambi mu luzolu lukima. (Kutanga 15:30, 31) Mudu yo u guhanganga masumu mu luzolu lukima ena mudjima “u mbi”—Yeremia 16:12.
Mbala ji gwi disumu di hangamana. Bible mu digulesanga kega mbi disumu dio dihangamana mbala yimoshi lō diena gidesu gimoshi yi disumu dio dihangamana mbala jingi. (1 Yoane 3:4-8) Hadu’o “a guhanganga masumu mu luzolu lukima,” ada gudima di gwishiya mambu ma pimbu, Nzambi ma g’asambisa.—Baebreo 10:26, 27.
Hadu’o eni guhanga masumu maneni, meni gudiyangigisa ngolu mumwila yi gilemu gi yifu yowu. Mumbandu Todjila Davidi a gasonigidi mbi: “Yifu yemi yena a wulu di mudu wemi; nga gijidu gi lema, agio gihidagana mumwila yi ami pila yi gugineta lō yena.” (Nkunga 38:4) Ada gio Bible dinahosa mambu ma mena hana givuvu: “Wega mbi mudu mu koni egi mbuga yendji kega mudu mu mbi egi mangindu mendji; wega mbi a hongulugi gwena Yehowa, yo wu gamwifa kenda, gwena Nzambi wedu, mumwila ye ma galolula mu luzolu lu kima.”—Yezaya 55:7.