Enn lé-monde kot pena la justice

ESKI ou d’accord ki nou pé vive dan enn lé-monde kot pena la justice? Surement. Avredir, mem ki quantité talent nou kapav ena, ek ki quantité nou kapav faire plan pou reussi nou la-vie, nou pena garanti ki nou pou vinn riche, ni ki nou pou reussi dan nou la-vie, ou-soit mem ki nou pou gagne nou mangé. Souvent sa arrivé pareil couma le roi Salomon, ki ti vive dan le temps passé, ti dire: “C’est pa bann dimoune sage ki gagne mangé, ni bann dimoune intelligent ki vinn riche, ni mem bann dimoune ki ena connaissance ki gagne faveur.” Kifer? Parski Salomon ajouté: “Zot tou passe par bann moment ek bann situation ki zot pa attann.”—Ecclésiaste 9:11.

“Kan malheur arrive enn sel coup”

Oui, souvent nou retrouve-nou dan bann moment ou bann situation ki nou pa attann, kitfois parski nou dan mauvais place dan mauvais moment. Lerla souvent, sa casse bann plan ki nou’nn prend beaucoup la-peine pou faire, ek aussi nou bann grand l’espoir. Dapré Salomon, nou ‘couma bann poisson ki’nn maye dan filet, ek couma bann zoiseau ki’nn maye dan piege, . . . kan malheur arrive lor nou enn sel coup.’ (Ecclésiaste 9:12) Par exemple ena bann million dimoune ki rinté pou cultive la terre pou donne zot famille mangé, mais enn coup zot retrouve-zot dan bann situation ki zot pa attann, kan la pluie pa tombé ek la secheresse detruire zot bann plantation.

Lezot essaye aide sa bann dimoune-la, mais souvent nou trouve l’injustice mem dan l’aide ki le reste lé-monde donné. Par exemple, dapré enn grand l’organisation humanitaire, dan enn l’année, “l’aide ki continent l’Afrique en entier inn gagné, ti vaut zis vingt pourcent somme ki’nn depensé dan la guerre Golfe.” Eski c’est la justice ki bann pays ki ena moyen, depense cinq fois plus pou finance enn la-guerre dan enn sel pays ki pou diminué bann souffrance ki la famine pé causé lor enn continent en entier? Eski c’est la justice ki dan enn lepok kot beaucoup pé vive dan la prosperité, enn quart population la terre encore pé vive dan enn vrai la-misere, ou-soit ki bann million zenfant mort toulé-l’année avek bann maladie ki kapav evité? Surement pa!

Bien-sur, kan malheur tombe lor nou, c’est pa zis a cause ‘bann moment ek bann situation ki nou pa attann.’ Ena aussi bann la-force ki nou pa kapav controlé, ki dirige nou la-vie ek faire bann kitsoz arrive nou. C’est seki ti arrivé en Beslan, en Ossétie du Nord, en septembre 2004, kan bann centaine dimoune, parmi bann ti zenfant ki ti pé al lekol pou premier fois, ti trouve la mort dan enn bagarre violent entre bann terrorist ek bann la-force securité. Li vrai ki c’est par hasard ki certain inn mort ek ki certain inn sapé—mais raison principal pou kifer sa situation-la ti arrivé, c’est parski bann dimoune ti pé laguerre.

Eski touletan sa pou coumsa?

Kan koz lor l’injustice, beaucoup dimoune dire: “Mais c’est la vie. La vie inn touletan coumsa ek li pou touletan coumsa.” Dapré zot, bann fort pou touletan faire dominere avek bann faible, ek bann riche pou touletan exploite bann pauvre. Zot dire ki tant ki dimoune existé, nou pou ena sa bann problem-la, ek aussi bann situation ki nou pa attann pou arrive nou.

Eski sa bizin vrai-mem coumsa? Eski enn jour, li pou possible ki bann ki servi zot capacité avek sagesse, gagne enn recompense juste pou zot dur travail? Eski ena enn kikenn ki kapav faire kitsoz pou change completement sa lé-monde kot ena l’injustice-la? Guette seki prochain lartik ena pou dire lor la.

[Remerciement photo page 3]

MAXIM MARMUR/AFP/Getty Images