Jéhovah prend soin bann dimoune agé avek amour

“Bondié pa injuste pou blié seki zot inn faire ek l’amour ki zot finn montré pou so nom.”—HÉB. 6:10.

1, 2. (a) Kan ou trouve enn dimoune ki ena cheveux blanc, ki sa faire ou rappel? (b) Couma Jéhovah considere bann chretien agé?

KAN ou trouve bann chretien ki ena cheveux blanc dan ou congregation, eski sa pa faire ou rappel seki livre Daniel dire? Dan enn vision ki Li ti donne Daniel, Jéhovah ti decrire Li-mem avek bann cheveux blanc. Daniel ti ecrire: “Mo ti contigne guetté ziska ki ti installe bann trone, ek l’Ancien bann jour ti assizé. So linge ti blanc pareil couma la neige, ek so cheveux lor so la tête ti pareil couma la laine pur.”—Dan. 7:9.

² Normalement la laine li blanc. Alors, cheveux blanc ek titre “Ancien bann jour” mette l’accent lor l’age bien avancé ki Bondié ena ek lor so sagesse; toulé-deux merite nou grand respé. Alors, couma eski Jéhovah, Ancien bann jour, considere bann zom ek bann femme agé ki fidele? Parole Bondié dire ki “bann cheveux blanc, zot couma enn couronne beauté kan zot dan chemin la justice.” (Prov. 16:31) Oui, si enn chretien fidele inn gagne bann cheveux blanc—signe ki li ena maturité—sa li joli devant lizié Bondié. Eski ou aussi ou considere ou bann frere ek soeur agé pareil couma Jéhovah considere zot?

Kifer zot ena valeur?

3. Kifer nou bien apprecié bann frere ek soeur agé?

³ Parmi sa bann serviteur agé ki ena valeur devant Bondié-la ena bann membre College central bann Témoins de Jéhovah, bann surveillant itinerant ki’nn servi dan le passé ek bann ki encore pé servi asterla, bann pionnier ki zelé, ek bann proclamateur mur—bann frere ek soeur ki servi Jéhovah avek fidelité dan nou congregation. Kitfois ou konn certain ki’nn preche la bonne nouvelle avek zele depuis plusieurs l’année, zot inn donne enn bon l’exemple ki’nn motive bann jeune ek ki’nn donne zot enn direction dan zot la vie. Certain serviteur Jéhovah ki agé finn ena bann grand responsabilité ek finn endure persecution a cause la bonne nouvelle. Jéhovah ek “l’esclave fidele et avisé” bien apprecié tou seki zot inn faire dan le passé ek seki zot pé faire zordi pou soutenir l’activité lor Royaume Bondié.—Mat. 24:45.

4. Kifer nou bizin respecté bann chretien agé ek prié pou zot?

⁴ Sa bann serviteur fidele ki agé-la merite reconnaissance ek respé bann lezot serviteur Jéhovah. En realité, dan la Loi ki Bondié ti donne bann Israélite par Moïse, ena enn lien entre consideration ek respé pou bann dimoune agé ek la crainte pou Jéhovah. (Lév. 19:32) Nou bizin prié regulierement pou sa bann frere ek soeur fidele-la ek remercié Bondié pou travail dur ki zot faire avek amour. L’apotre Paul ti prié pou so bann frere ek soeur, bann jeune ek bann vié toulé-deux.—Lire 1 Thessaloniciens 1:2, 3.

5. Couma nou kapav tire profit ar frequentation bann serviteur Jéhovah ki agé?

⁵ En plus, nou tou dan congregation kapav profite frequentation bann chretien agé. Grace a zot l’etude, seki zot inn observé, ek zot l’experience, bann chretien agé ki fidele finn gagne enn grand connaissance ki ena beaucoup valeur. Zot inn aprann pou ena patience ek pou mette-zot dan place lezot, ek sa donne zot enn grand la joie ek satisfaction pou enseigne lot generation seki zot inn aprann. (Ps. 71:18) Connaissance ki bann dimoune agé ena, li pareil couma de l’eau dan enn puit ki bien profond. Jeune, montré ki ou sage ek pareil couma ou ti pou tire de l’eau dan enn puit ki bien profond, profite sa la source connaissance-la.—Prov. 20:5.

6. Couma ou kapav montré bann chretien agé ki zot vrai-mem ena valeur pou ou?

⁶ Eski ou faire bann chretien agé koné ki ou content zot pareil couma Jéhovah content zot? Kifer ou pa dire zot ki quantité ou content zot pou zot fidelité ek ki quantité zot l’opinion ena valeur pou ou? En plus, kan ou suive zot conseil, ou montré ki ou respé pou zot li sincere. Beaucoup chretien agé kapav rappel bann conseil sage ki zot ti’nn gagné ar bann fidele chretien agé ek couma kan zot inn suive sa bann conseil-la sa inn aide zot toute longue zot la vie.a

Montré ou l’amour dan bann fason pratik

7. Kisannla surtout Bondié donne responsabilité pou prend soin bann dimoune agé?

⁷ Bondié donne surtout bann membre enn famille responsabilité pou prend soin zot famille ki agé. (Lire 1 Timothée 5:4, 8.) Jéhovah content kan bann famille rempli zot responsabilité envers bann membre zot famille ki agé. Kan zot faire sa, zot montré ki zot prend soin bann dimoune agé pareil couma Jéhovah Li-mem Li faire. Bondié soutenir sa bann famille-la ek beni zot pou zot bann zeffort ek pou tou zot sacrifice.b

8. Kifer bann congregation bizin montré zot consideration pou bann chretien agé?

⁸ Sa faire Jéhovah plaisir aussi kan bann membre congregation aide bann fidele chretien agé ki dan le besoin, mais ki pena okenn membre zot famille ki dan la verité ou-soit enn famille ki disposé pou occupe zot. (1 Tim. 5:3, 5, 9, 10) Lerla, bann congregation montré ki zot konn ‘mette-zot dan place bann chretien agé, zot montré ki zot ena l’affection fraternel, ek beaucoup compassion’ pou zot. (1 Pierre 3:8) L’apotre Paul ti bien decrire sa consideration-la kan li ti dire ki si enn membre nou lekor souffert, “tou bann lezot membre souffert avek li.” (1 Cor. 12:26) Kan nou faire bann kitsoz pratik, ki rempli ar compassion envers bann agé, sa montré ki nou pé suive sa principe ki derriere sa conseil Paul-la: “Contigne sarié fardeau sakenn so camarade, ek coumsa realise la loi Christ.”—Gal. 6:2.

9. A cause l’age, ki bann fardeau kapav pese lor enn chretien?

⁹ Ki bann fardeau bann chretien agé bizin sarié? Beaucoup fatigué vite. Kitfois zot senti ki zot nepli ena la force mem pou faire bann kitsoz simple, couma par exemple al kot docteur, occupe bann compte ki zot ena pou payé, rempli certain papier, nettoye lakaz ek prepare mangé. Souvent bann dimoune agé perdi l’appetit ek zot pa trop soif, alors zot kapav pensé ki li nepli necessaire ki zot mangé ek boire quantité ki zot ti bizin en realité. Mem zaffaire kapav arrivé avek zot l’habitude pou etudié ek pou assisté reunion. Kitfois avek l’age, zot nepli kapav trouve bien seki zot lire ek tann bien dan bann reunion. Li possible aussi ki zot trouve sa fatigant zis pou prepare-zot pou assisté reunion. Alors, ki lezot kapav faire pou sa bann chretien agé-la?

Couma ou kapav aide zot

10. Ki bann ancien kapav faire pou assuré ki bann chretien agé gagne enn l’aide pratik?

¹⁰ Dan beaucoup congregation, bann frere ek soeur donne enn bon l’exemple kan zot occupe bien bann chretien agé. Zot aide bannla pou faire zot shopping, pou cuit mangé, ek pou nettoyé. Zot aide bannla aussi pou etudié, pou prepare-zot pou reunion, ek pou preché regulierement. Bann Témoin pli jeune accompagne zot ek amenn zot dan zot transport. Si bann chretien agé pa kapav sorti kot zot, zot kapav ecoute bann reunion par telephone, ou-soit la congregation kapav enregistré bann reunion pou zot. Kan li possible, bann ancien assure-zot ki pé prend bann disposition pratik pou aide bann chretien agé dan congregation.c

11. Raconté couma enn famille inn aide enn frere agé.

¹¹ Dan congregation, chaque chretien kapav aussi personnellement montré so l’hospitalité ek so generosité. Apré ki so madame ti’nn mort, enn frere agé ti nepli kapav paye so loyer sans pension so madame. Li ek so madame ti’nn etudié la Bible avek enn famille—papa, mama ek deux zenfant adolescent—ki ti ena enn grand lakaz. Zot ti donne li deux la chambre pou li resté. Pendant 15 an, zot ti partage zot repas ensam, zot ti passe bann bon moment avek li ek zot ti montré li zot l’amour. Bann jeune-la ti tire beaucoup profit ar so la foi ek so grand l’experience, ek li, li ti profite zot compagnie. Sa frere agé-la ti reste kot zot ziska li mort, l’age 89 an. Sa famille-la encore remercié Bondié pou sa quantité benediction ki zot inn gagné grace a frequentation sa frere-la. Zot pa’nn ‘perdi zot recompense’ kan zot inn aide enn disciple Jésus Christ.—Mat. 10:42.d

12. Ki ou kapav faire pou montré ou l’amour pou bann frere ek soeur ki agé?

¹² Kitfois ou pa dan enn position pou aide enn frere ou-soit enn soeur agé pareil couma sa famille-la inn faire. Mais kitfois li possible ki ou aide bann ki agé pou al reunion ek pou sorti dan predication. Ou kapav aussi invite zot kot ou ek invite zot kan ou faire bann sortie. Ou kapav rann zot visite surtout kan zot malade ou-soit kan zot pa kapav sorti kot zot. En plus, ou kapav ek ou bizin toujours traite zot couma bann adulte ki mur. Tant ki zot bien lor plan mental, fodé demann bann chretien agé zot l’opinion lor tou bann decision ki concerne zot. Mem bann ki’nn bien perdi zot capacité mental kapav senti si lezot pé respecté zot dignité ou-soit non.

Jéhovah pa pou blié ou travail

13. Kifer li important ki nou montré consideration pou sentiment bann chretien agé?

¹³ Li bien important ki nou montré consideration pou sentiment ki bann chretien agé ena. Li pa rare ki bann chretien agé senti-zot bien decouragé parski zot nepli kapav faire tou seki zot ti pé faire kan zot ti pli jeune ek en bonne santé. Par exemple, enn soeur ki ti bien actif dan service Jéhovah pendant apepré 50 an ek ki ti enn pionnier permanent, ti’nn developpe enn maladie ki ti affaibli li. A cause sa li ti gagne beaucoup difficulté pou assisté reunion. Kan li ti compare seki li ti pé faire dan ministere avant avek bann limite ki li ena asterla, li ti commence ploré. Li ti baisse so la tête ek li ti dire avek larme: “Mo pa pé faire nanyin asterla.”

14. Ki l’encouragement bann serviteur Jéhovah ki agé kapav gagné dan bann psaume?

¹⁴ Si ou enn dimoune agé, eski ou’nn deja ena bann sentiment ki faire ou la peine coumsa? Ou-soit eski ena bann moment kot ou pensé ki kitfois Jéhovah inn abandonne ou? Li possible ki enn psalmiste aussi ti ena bann sentiment coumsa kan li ti vinn vié, parski li ti suppliye Jéhovah: “Pa rejette moi dan mo vieillesse; pa quitte moi kan mo nepli ena la force. . . . Mem ziska la vieillesse ek bann cheveux blanc, ah Bondié, pa quitte moi.” (Ps. 71:9, 18) Bien sur, Jéhovah pa ti pou abandonne ecrivain sa psaume-la, ek Li pa pou abandonne ou. Dan enn lot psaume, David ti dire ki li ena confiance dan soutien Bondié. (Lire Psaume 68:19.) Si ou enn chretien agé ki fidele, ou kapav sur ki Jéhovah avek ou ek ki Li pou contigne soutenir ou jour apré jour.

15. Ki kapav aide bann chretien agé pou garde enn l’attitude positif?

¹⁵ Zot, bann Témoins de Jéhovah ki agé, jamais Jéhovah pou blié tou seki zot inn faire ek seki zot pé contigne faire pou la gloire Bondié. La Bible dire: “Bondié pa injuste pou blié seki zot inn faire ek l’amour ki zot finn montré pou so nom.” (Héb. 6:10) Alors, faire tou pou pa developpe bann pensée negatif ek pensé ki parski ou’nn vinn vié, ou nepli ena valeur pou Jéhovah. Faire zeffort pou remplace bann pensée ki faire ou deprimé ek ki negatif par bann pensée positif. Retire la joie ar bann benediction ki ou gagné ek l’esperance ki ou ena pou l’avenir! Nou ena “enn l’avenir ek enn l’espoir”; pena pli bon l’avenir ek l’espoir ki sa. En plus, c’est nou Createur Li-mem ki garanti sa. (Jér. 29:11, 12; Actes 17:31; 1 Tim. 6:19) Medite lor ou l’esperance, travail pou ou reste jeune dan ou leker ek dan ou l’esprit, ek jamais pa pensé ki ou presence pena valeur dan congregation!e

16. Kifer enn frere agé ti pensé ki li ti bizin arrete servi couma enn ancien, mais couma college ancien ti encourage li?

¹⁶ Anou prend l’exemple Johan, ki ena 80 an ek ki occupe a plein temps Sannie, so madame ki asterla paralysé.f Bann soeur inn faire enn programme pou ki sakenn so tour vinn reste avek Sannie pou ki Johan kapav assisté reunion ek sorti predication. Pa trop longtemps, Johan ti senti-li tellement fatigué moralement ki li ti commence pensé ki li ti bizin arrete servi couma enn ancien. Li ti demandé, larme dan so lizié: “Eski li vaut la peine ki mo enn ancien? Mo nepli rempli okenn fonction ki important dan congregation.” Bann lezot ancien ti donne li l’assurance ki so l’experience ek so jugement ena enn grand valeur. Zot ti encourage li pou contigne servi couma enn ancien, mem si li pa ti kapav faire beaucoup. Avek sa grand l’encouragement-la, Johan pé contigne servi couma enn ancien ek congregation pé tire beaucoup profit ar so l’experience.

Jéhovah vrai-mem prend compte so bann serviteur

17. Ki l’assurance la Bible donne bann chretien agé?

¹⁷ La Bible explik bien ki bann chretien agé kapav contigne prosperé lor plan spirituel malgré bann probleme ki zot gagné a cause la vieillesse. Enn psalmiste ti dire: “Bann ki’nn planté couma bann pié dan lakaz Jéhovah . . . pou contigne prosperé pendant la vieillesse, zot pou reste gras ek frais.” (Ps. 92:13, 14) L’apotre Paul, ki kitfois ti pé faire face ar enn probleme la santé, ‘pa ti baisse lé-bras, mem si seki li ti été en dehors ti pé deperi.’—Lire 2 Corinthiens 4:16-18.

18. Kifer bann chretien agé ek bann ki occupe zot bizin l’aide?

¹⁸ Ena beaucoup l’exemple moderne ki montré ki bann chretien agé kapav “contigne prosperé.” Mais bann difficulté ki zot gagné a cause maladie ek vieillesse kapav bien decourage zot, mem si zot ena bann membre la famille ki occupe zot bien ek ki bien devoué. Bann ki occupe bann dimoune agé aussi kapav bien-bien fatigué. La congregation ena privilege ek responsabilité pou montré zot l’amour pou bann ki agé ek pou bann ki occupe zot. (Gal. 6:10) Sa l’aide-la montré ki nou pa pé dire bannla allé ek “chauffe-zot bien ek mange bien” sans ki nou aide zot dan bann fason pratik.—Jacq. 2:15-17.

19. Kifer bann chretien fidele ki agé kapav guette l’avenir avek confiance?

¹⁹ L’age kapav change l’activité enn chretien ki pé vieilli, mais le temps pa diminué l’amour ki Jéhovah ena pou so bann serviteur fidele ki agé. Au contraire, tou sa bann chretien fidele-la ena valeur dan so lizié, ek jamais Li pa pou abandonne zot. (Ps. 37:28; Is. 46:4) Jéhovah pou soutenir zot ek pou guide zot pendant zot vieillesse.—Ps. 48:14.

[Note]

Couma ou pou reponn?

• Kifer ou considere bann chretien fidele ki agé couma bann dimoune ki ena valeur?

• Couma nou kapav montré nou l’amour pou bann serviteur Jéhovah ki agé?

• Ki kapav aide bann serviteur Jéhovah ki agé pou ena enn l’attitude positif?

[Zimage lor page 23]

Bann membre congregation ena enn grand l’estime pou bann ki agé