2 Bondié pa interessé ar moi​—Eski li vrai?

Seki ou finn deja tendé: “Si Bondié vrai-mem ti tracassé pou bann dimoune, Li ti pou tire le mal ek souffrance ki ena dan le monde. Mem si Li interessé avek bann dimoune en general, moi mo pa croire ki seki arrivé dan mo la vie interesse Li.”

Seki la Bible enseigné: Si ena le mal ek souffrance lor la terre c’est pa Jéhovah ki responsable. (Jacques 1:13) N’importe kan Li envie Li kapav tire le mal, mais Li pé permette sa mauvais le monde-la existé. Pou ki raison? Pou reglé bann question important ki finn soulevé au commencement dan l’histoire l’humanité concernant souveraineté Bondié ek l’integrité bann dimoune. A la fin, Li pou agir en faveur bann dimoune. Bann ki finn rejette so domination finn faire beaucoup degat, mais Jéhovah pou repare tousala.​—Genèse 3:1-6; Isaïe 65:17.a

C’est vrai ki Bondié interessé avek bann dimoune en general, mais Li ena aussi enn grand l’amour pou chaque dimoune personnellement. Matthieu 10:29-31 montré nou ki Li konn bann ti detail lor nou, ki mem nou, nou pa koné: “Eski pa vann deux moineau pou enn piece l’argent ki ena enn tigit valeur? Pourtant, pa mem enn sel pou tombe enba sans ki zot Papa koné. Mais, Li finn mem compte tou bann cheveux lor zot, zot la tête. Alors, pa peur: zot vaut plus ki beaucoup moineau.”

Couma kan ou konn la verité sa aide ou: Souvent nou evite bann dimoune ki ena leker dur ou-soit ki pa interessé ar lezot. Nou finn trouvé ki bann dimoune inn koz menti kan zot inn dire ki Bondié pa interessé ar nou. Alors, li pa etonnant ki beaucoup dimoune pa faire okenn zeffort pou konn Bondié ou-soit pou prié Li excepté kan zot pena lot chemin sorti. Kan ou koné ki Jéhovah vrai-mem interessé ar ou sa kapav encourage ou pou envie aprann plus lor Li ek developpe enn l’amitié avek Li.

Par exemple, apré ki ou finn prié Bondié surement ou finn deja demann-ou-mem si vrai-mem Li pé ecouté ou-soit si Li pou reponn. La Bible donne nou l’assurance ki sa Kikenn “ki ecoute la priere[-la]” touletan laisse so la porte ouvert pou tou bann ki prié Li avek enn leker sincere.​—Psaume 65:2.

Bondié invite ou pou ‘jette tou ou tracas lor Li, parski Li interessé ar ou.’ (1 Pierre 5:7) Mem dan bann moment bien difficile nou koné ki Li tracassé pou nou, parski la Bible dire: “Jéhovah pré ar bann dimoune ki ena enn grand chagrin dan zot leker; ek Li sauve bann ki demoralisé.”​—Psaume 34:18.

[Note]

[L’encadré page 5]

Si Bondié pa ti interessé ar nou, alors kifer eski Li invite nou pou prié Li?