So bann prophetie finn touletan realisé
“Dan tou bann bon parole ki Jéhovah zot Bondié inn dire zot, pena enn sel parole ki pa finn accompli.”—JOSUÉ 23:14.
COUMA ESKI LA BIBLE LI DIFFERENT? Kan bann dimoune dan le passé ti predire l’avenir, seki zot ti predire pa ti clair ek pa ti kapav faire confiance. Ek bann horoscope ki ena dan nou lepok aussi zot coumsa. Bann dimoune base-zot lor bann l’evenement ki pé arrivé zordi pou predire l’avenir ek bien rare zot essaye predire enn l’evenement precis ki pou arrivé dan bann siecle plitar. Parkont, bann prophetie la Bible bien detaillé ek zot touletan realisé, mem si zot annonce “depuis bien longtemps avant bann kitsoz ki pankor faire.”—Isaïe 46:10.
ENN L’EXEMPLE: Dan sixieme siecle avant nou lepok, prophete Daniel ti gagne enn vision. Sa vision-la ti predire ki bien vite la Grèce ti pou gagne la victoire lor l’Empire médo-perse. Li ti aussi predire ki desuite couma sa le roi grec-la ti pou “vinn fort,” so royaume ti pou “cassé.” Kisannla ti pou remplace li? Daniel ti ecrire: “Ena quatre royaume ki sorti dan so nation ki pou levé, mais pa avek so la force.”—Daniel 8:5-8, 20-22.
KI BANN HISTORIEN DIRE: Plus ki 200 an apré lepok Daniel, Alexandre le Grand ti vinn le roi la Grèce. Dan dix an, Alexandre ti gagne la victoire lor l’Empire médo-perse ek ti agrandi l’Empire grec ziska la riviere Indus (ki zordi trouve dan Pakistan). Mais kan li ti ena 32 an enn sel coute li ti mort. Finalement, c’est enn la guerre pré ar Ipsus dan l’Asie mineur ki ti divise so l’empire. A la fin, sa quatre dimoune ki ti gagne la victoire dan sa la guerre-la ti divise L’Empire grec parmi zot-mem. Mais, personne parmi zot pa ti reussi vinn puissant pareil couma Alexandre.
KI OU PENSÉ? Eski ena enn lot livre ki so bann prophetie finn touletan realisé pareil couma la Bible? Ou-soit eski c’est zis la Bible ki coumsa?
[L’encadré page 4]
“Ena tellement . . . prophetie dan la Bible, ki li impossible ki zot finn realisé par accident.”—A LAWYER EXAMINES THE BIBLE, PAR IRWIN H. LINTON