La paix pou mille an ek pou toujours!

1. Ki bann kitsoz extraordinaire pé attann la ‘grande foule’?

ESKI ou kapav mazinn tou bann bon kitsoz ki enn gouvernement puissant, ki dirigé par enn kikenn ki juste ek ki ena compassion, pou kapav faire pou so bann sujet lor enn periode mille an? Bann kitsoz extraordinaire pé attann bann membre ‘la grande foule.’ Zot pou traverse vivant “la grande tribulation” ki pou detruire net sa mauvais systeme dan ki nou pé vive-la.​—Rév. 7:9, 14.

2. Ki bann dimoune finn koné pendant sa 6,000 an ki’nn passé-la?

² Pendant 6,000 an l’histoire l’humanité, bann zom finn essaye dirige-zot par zot-mem ek sa finn faire l’humanité konn bann grand la peine ek souffrance. La Bible ti dire bien longtemps: “Dimoune finn domine dimoune pou zot prop malheur.” (Eccl. 8:9) Ki nou trouvé zordi? A part bann la guerre ek bann rebellion, ena bann grand probleme couma la misere, maladie, destruction l’environnement, changement dan climat, ek lezot kitsoz encore. Bann representant gouvernement finn dire ki, si nou pa faire bann grand changement ek arrete detruire la terre, bann consequence pou bien grave.

3. Ki pou arrivé pendant Regne mille an?

³ Kan le Roi messianik Jésus Christ ek bann 144,000 pou dirigé, tigit-tigit Royaume Bondié pou repare tou di-tort ki bann dimoune inn faire zot prochain ek la terre. Pendant Regne mille an, nou pou trouve realisation sa promesse bien encourageant ki Jéhovah inn faire-la: “Mo pé crée enn nouveau le ciel ek enn nouveau la terre; ek personne pa pou rappel bann kitsoz avant, ek sa pa pou vinn dan zot leker.” (Is. 65:17) C’est bann l’evenement extraordinaire ki pé attann nou, mem si nou pankor trouve zot, pa vrai? Avek l’aide Parole prophetik Bondié, anou examine bann kitsoz extraordinaire, mem si nou ‘pa trouve’ zot.​—2 Cor. 4:18.

‘ZOT POU RANGE LAKAZ EK ZOT POU PLANTE KARO RAISIN’

4. Ki probleme logement beaucoup pé gagné zordi?

⁴ Kisannla pa ti pou content ena enn lakaz pou li-mem, enn place kot li ek so famille kapav senti-zot en securité? Mais selman zordi dan le monde ena enn gros probleme logement. Dan certain la ville, bann dimoune vive enn lor lot. Beaucoup dimoune obligé reste dan bann ti lakaz tole ou-soit dan bann vié batiment bien sale. Pou zot, c’est enn rêve pou gagne zot prop lakaz.

5, 6. (a) Couma Isaïe 65:21 ek Mika 4:4 pou realisé? (b) Couma nou kapav gagne sa benediction-la?

⁵ Royaume Bondié pou realise desir chaque habitant pou gagne so prop lakaz pareil couma prophete Isaïe ti annoncé: “Zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit.” (Is. 65:21) Mais eski li assez ki nou ena nou prop lakaz? Apré tou, zordi ena certain ki ena zot prop lakaz, ou-soit certain mem vive dan bann grand villa. Mais zot toujours tracassé pangar zot perdi zot lakaz a cause enn probleme finance ou-soit ki voleur rentré ek kokin tou seki zot ena. Mais tou kitsoz pou bien different kan Royaume Bondié pou dirigé! Prophete Mika ti ecrire: “Vrai-mem sakenn pou assize enba so pié raisin ek enba so pié figue, ek pa pou ena personne ki faire zot tremblé.”​—Mika 4:4.

⁶ Ki nou bizin faire kan nou koné seki pé attann nou dan l’avenir? Bien sur, nou tou nou bizin enn bon lakaz pou resté. Mais selman, au lieu ki nou trimé pou range lakaz ki nou pé revé​—kitfois mem faire bann gros dette pou faire sa​—eski li pa pli bon ki nou fixé nou lizié lor promesse Jéhovah? Guette seki Jésus ti dire lor li-mem: “Bann renard ena zot place kot zot resté ek bann zoiseau dan le ciel ena zot nik, mais Fils de l’homme pena okenn place pou pose so la tête.” (Luc 9:58) Jésus ti ena capacité ek pouvoir pou range ou-soit-mem pou gagne pli joli lakaz ki n’importe kisannla. Kifer li pa ti faire sa? Li clair ki Jésus pa ti laisse okenn distraction ou-soit okenn piege empeche-li mette Royaume Bondié en premier dan so la vie. Eski nou kapav suive so l’exemple ek garde nou lizié simple ek pa laisse bann kitsoz materiel piege-nou ek faire nou gagne tracas?​—Mat. 6:33, 34.

“LOULOU EK MOUTON POU MANGE ENSAM”

7. Ki Jéhovah ti dire concernant relation ki ti bizin ena entre bann zanimo ek bann dimoune?

⁷ Creation pli extraordinaire ki Jéhovah inn faire lor la terre, c’est creation bann dimoune. Jéhovah ti dire ar so zouvrier qualifié, so Garson premier-né: “Anou faire dimoune couma nou, dan nou ressemblance, ek ki zot ena enn controle lor bann poisson dan la mer, bann creature ki envolé dan le ciel ek bann zanimo domestik, ek la terre entier ek tou bann zanimo ki bougé lor la terre.” (Gen. 1:26) Alors, Bondié ti donne Adam ek Ève ek plitar tou zot bann descendant, l’autorité lor tou bann zanimo lor la terre.

8. Ki capacité la plupart bann zanimo ena?

⁸ Eski li vrai-mem possible ki bann dimoune ena l’autorité lor tou bann zanimo ek vive en paix avek zot? Beaucoup dimoune bien attaché ar zot li-chien ou-soit zot sat. Mais ki nou kapav dire concernant bann zanimo sauvage? Enn rapport dire: “Bann scientifik ki’nn vive avek bann zanimo sauvage ek ki etudié zot, finn trouvé ki tou bann mammifere ena bann sentiment.” Li vrai ki nou trouve certain zanimo ki peur ou-soit ki vinn violent kan zot senti-zot menacé, mais eski zot kapav ena bann sentiment affectif? Sa rapport-la dire: “C’est kan zot pé elevé zot bann tipti, ki bann mammifere montré zot pli grand qualité​—zot capacité extraordinaire pou montré l’affection.”

9. Ki changement nou kapav attann concernant bann zanimo?

⁹ Alors, fodé pa nou etonné kan nou lire dan la Bible ki pou ena la paix entre dimoune ek zanimo. (Lire Isaïe 11:6-9; 65:25.) Kifer? Rappel ki apré deluge, Jéhovah ti dire Noé ek so famille: “Tou bann zanimo ki vivant lor la terre . . . pou contigne ena la crainte ek pou peur zot.” Beaucoup zanimo sauvé devant bann dimoune pou protege-zot-mem. (Gen. 9:2, 3) Eski Jéhovah pa pou kapav tire inpé sa la peur-la ek retabli relation ki ti ena au commencement entre dimoune ek zanimo? (Hosh. 2:18) Oui, lerla li pou vrai-mem enn lepok extraordinaire pou tou bann ki pou vive lor la terre, pa vrai?

“LI POU SOUYE TOU LARME”

10. En general, kifer bann dimoune ploré?

¹⁰ Kan Salomon ti trouve “tou sa dominere ki bann dimoune pé faire lor sa la terre-la,” li ti dire: “Guette larme bann dimoune ar ki ti pé faire dominere, mais pa ti ena personne pou console zot.” (Eccl. 4:1) Zordi aussi pareil, kitfois-mem pli pire. Kisannla parmi nou pa finn verse larme pou enn certain raison? Li vrai ki parfois nou ploré tellement nou content. Mais selman, en general, nou larme coulé kan nou ena enn grand chagrin dan nou leker.

11. Ki recit biblik ki touche ou personnellement?

¹¹ Rappel bann recit biblik bien touchant, ki koz lor bann dimoune ki ti ploré. Kan Sara ti mort l’age 127 an, “Abraham ti rentré pou garde deuil ek pou ploré a cause la mort Sara.” (Gen. 23:1, 2) Kan Naomi ti dire aurevoir so deux belle-fille ki ti veuve, “zot ti leve zot la voix ek zot ti ploré,” ek apré ki Naomi ti contigne koz ar zot, “zot ti leve zot la voix ek zot ti ploré encore.” (Ruth 1:9, 14) Kan le roi Hizqiya ti bien malade ek ti pré pou mort, li ti prié Bondié ek li “ti commence ploré beaucoup,” ek sa ti touche Jéhovah. (2 Rois 20:1-5) Kisannla pa touché par seki ti arrivé kan Pierre ti renié Jésus? Kan li ti tann enn coq chanté, Pierre ti “sorti dehors, ek ti ploré avek beaucoup remords.”​—Mat. 26:75.

12. Couma Royaume Bondié pou amenn enn vrai soulagement pou l’humanité?

¹² A cause tou sorte qualité malheur ki arrivé zordi, bann dimoune bien bizin reconfort ek soulagement. C’est seki Regne mille an Christ pou amené pou bann dimoune. La Bible dire: “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur.” (Rév. 21:4) Pou vrai-mem extraordinaire kan deuil, larme, ek douleur pou disparette, pa vrai? Pli extraordinaire encore, c’est promesse ki Bondié inn faire pou tire nou pli grand l’ennemi, la mort. Couma sa pou arrivé?

“TOU SEKI DAN BANN TOMBE SOUVENIR POU . . . SORTI”

13. Couma la mort finn affecté bann dimoune depuis peché Adam?

¹³ Depuis ki Adam finn faire peché, la mort finn regne lor l’humanité couma enn le roi. Li pareil couma enn l’ennemi lor ki personne pa kapav gagne la victoire. Okenn dimoune imparfait pa kapav sap dan so la main, ek li finn faire beaucoup dimoune ploré ek souffert. (Rom. 5:12, 14) En realité, plusieurs million dimoune ‘esclave pendant tou zot la vie parski zot peur la mort.’​—Héb. 2:15.

14. Ki pou arrivé kan nepli pou ena la mort?

¹⁴ La Bible koz lor enn lepok kan “nou dernier l’ennemi, la mort pou detruire net.” (1 Cor. 15:26) Pou ena deux groupe ki pou kapav profite sa. Bann membre ‘la grande foule’ ki vivant asterla, pou kapav survive ek rente dan le monde nouveau avek l’esperance pou vive pou touletan. Ek aussi, li pou possible pou plusieurs milliard dimoune ki’nn mort, pou ressuscité. Eski ou kapav maziné couma bann membre ‘la grande foule’ pou extra content kan zot pou accueillir bann ressuscité? Kan nou examine certain recit ki mentionné dan la Bible lor bann resurrection, sa pou aide nou comprend couma sa pou été kan bann dimoune pou ressuscité dan l’avenir.​—Lire Marc 5:38-42; Luc 7:11-17.

15. Couma ou pou surement reagir kan ou pou trouve enn dimoune ki ou content, ressuscité?

¹⁵ Reflechi lor sa bann expression ki ena dan la Bible-la: “Zot ti gagne sok ek zot ti dan enn la joie extraordinaire,” ek “zot ti commence glorifié Bondié.” Si ou ti la dan sa bann l’occasion-la, kitfois ou ti pou ena mem reaction. Oui, kan nou pou trouve bann dimoune ki nou content mais ki’nn mort, ré-gagne la vie, sa pou faire nou extra content ek nou pou ressenti enn la joie extraordinaire. Jésus ti dire: “Ler pé vini kot tou seki dan bann tombe souvenir pou tann so la voix ek pou sorti.” (Jean 5:28, 29) Jamais personne parmi nou pa finn trouve enn kitsoz coumsa; sa pou surement enn parmi bann pli grand “kitsoz ki nou pa trouvé,” ki pou arrivé.

BONDIÉ POU VINN “TOU KITSOZ POU ZOT TOU”

16. (a) Kifer nou bizin koz avek enthousiasme lor bann benediction ki nou pankor trouvé? (b) Ki Paul ti dire pou encourage bann chretien dan congregation Corinthe?

¹⁶ Oui, enn l’avenir extraordinaire pé attann tou bann ki reste fidele envers Jéhovah dan sa lepok critik-la! Mem si nou pankor trouve bann grand benediction ki Jéhovah inn reservé pou nou, si nou garde zot dan nou l’esprit, sa pou aide nou pou fixé nou l’attention lor seki vrai-mem important. Nou pa pou laisse bann distraction temporaire ki ena dan sa le monde-la detourne nou. (Luc 21:34; 1 Tim. 6:17-19) Pendant nou l’adoration en famille, dan bann conversation avek nou bann frere ek soeur, avek nou bann l’etude ek bann dimoune ki interessé ar la verité, anou koz avek enthousiasme lor nou l’esperance extraordinaire ek seki pé attann nou dan l’avenir. Sa pou aide nou pou garde nou l’esperance bien vivant dan nou l’esprit ek dan nou leker. C’est seki l’apotre Paul ti faire kan li ti encourage so bann compagnon chretien. Li ti faire zot pense bann kitsoz ki pou arrivé a la fin Regne mille an Jésus Christ. Essaye mazinn signification seki Paul ti dire dan 1 Corinthiens 15:24, 25, 28.​—Lire.

17, 18. (a) Dan ki fason Jéhovah ti “tou kitsoz pou zot tou” au commencement l’histoire l’humanité? (b) Ki Jésus pou faire pou retabli l’unité ek la paix?

¹⁷ Pena nanyé ki decrire pli bien couma la vie pou été a la fin mille an, ki sa bann parole-la: “Bondié [pou] vinn tou kitsoz pou zot tou.” Ki sa bann parole-la vedir? Reflechi lor lepok kan Adam ek Ève ti parfait dan jardin Éden. Zot ti forme partie dan famille universel Jéhovah kot ti ena la paix ek l’harmonie. Jéhovah, Souverain l’univers, ti regne directement lor tou so creation, bann ange ek bann dimoune toulé-deux. Zot ti kapav koz avek Li personnellement, adore Li, ek gagne so benediction. Li ti “tou kitsoz pou zot tou.”

¹⁸ Bann dimoune ti’nn perdi bann bon relation ki zot ti ena avek Jéhovah kan Satan ti influence zot pou rebelle kont souveraineté Jéhovah. Selman, depuis 1914, tigit par tigit Royaume messianik finn prend bann disposition pou retabli l’unité ek la paix. (Éph. 1:9, 10) Pendant Regne mille an, bann kitsoz extraordinaire, ki nou “pa trouvé” asterla pou vinn enn realité. Apré sa, “la fin” pou vini, setadir la fin Regne mille an Jésus Christ. Ki pou arrivé lerla? Mem si Jésus inn gagne “tou pouvoir dan le ciel ek lor la terre,” li pena okenn l’ambition. Li pa pou ena l’intention pou prend place Jéhovah. Avek humilité, li pou “remette royaume ar so Bondié ek so Papa.” Li pou servi so position special ek so l’autorité “pou la gloire Bondié.”​—Mat. 28:18; Phil. 2:9-11.

19, 20. (a) Couma tou bann sujet Royaume Bondié pou montré ki zot accepté souveraineté Jéhovah? (b) Ki bann grand privilege pé attann nou?

¹⁹ Lerla, tou bann sujet Royaume Bondié, pou parfait. Zot pou suive l’exemple Jésus ek avek humilité zot pou disposé pou soumette-zot ar souveraineté Jéhovah. Zot pou ena possibilité pou montré sa kan zot pou reste fidele dan l’epreuve final. (Rév. 20:7-10) Apré sa, tou bann ki pou rebellé​—ki zot bann dimoune ou-soit bann ange​—Jéhovah pou detruire zot pou touletan. Sa pou vrai-mem enn lepok kot nou pou ena enn grand la joie! La famille universel Jéhovah en entier pou loué Li dan la joie. Ek Jéhovah pou vinn “tou kitsoz pou zot tou.”​—Lire Psaume 99:1-3.

²⁰ Eski sa bann benediction ki Royaume Bondié pré pou amené-la pousse ou pou faire tou seki ou kapav pou faire volonté Bondié? Eski ou kapav evité laisse-ou distraire par bann fausse l’espoir ek reconfort ki le monde Satan pé offert? Eski ou bien decidé pou soutenir souveraineté Jéhovah? Montré par ou bann action ki ou envie faire sa pou touletan. Lerla, ou pou ena privilege pou goute la paix ek prosperité pa zis pou mille an, mais pou touletan!