‘Zot pa konn ni jour, ni ler’

1-3. (a) Ki bann situation kapav aide nou pou comprend leson ki ena dan deux parabole Jésus? (b) Ki bann question nou bizin reponn?

MAZINÉ ki enn ministre demann ou pou conduire li dan enn enn rendez-vous important. Selman, deux-trois minute avant ki ou al prend dimoune-la, ou realisé ki ou pena assez l’essence pou faire sa voyage-la. Ou degazé al lor filling. Apré ki ou’nn fini allé, ministre-la vini. Li rod ou, mais li pa trouve ou. Li pa kapav attann, alors li demann enn lot dimoune pou conduire li. Letan ou arrivé ou realisé ki ministre-la pa finn attann ou ek finn allé. Couma ou pou senti-ou?

² Asterla, faire coumadir ki ou-mem ou enn ministre ek ou finn choisir trois zom qualifié pou faire enn travail important. Ou explik zot ki zot bizin faire, ek toulé-trois d’accord pou faire li. Mais plitar kan ou vini, ou aprann ki zis deux ladan ki’nn faire zot travail. En plus, troisieme-la pa’nn faire so travail ek li pé tire bann pretexte. En realité, li pa’nn mem essaye faire travail-la. Couma ou pou senti-ou?

³ Sa bann situation-la ressemblé bann situation ki Jésus ti mentionné dan parabole bann vierge ek bann talent. Toulé-deux parabole concerne lepok la fin ek zot montré kifer certain chretien oint ti pou fidele ek avisé, alors ki lezot non.a (Mat. 25:1-30) Li ti attire l’attention lor leson ki nou kapav tiré dan sa bann parabole-la, kan li ti dire: “Alors, contigne veillé, parski zot pa konn ni jour-la, ni ler-la,” setadir, kan exactement Jésus pou applik jugement Bondié lor le monde Satan. (Mat. 25:13) Nou kapav applik sa conseil-la zordi. Couma nou kapav tire profit kan nou contigne veillé, pareil couma Jésus ti encourage nou pou faire? Kisannla ki’nn contigne veillé? Ek ki nou bizin faire asterla pou contigne veillé?

BIENFAIT KI NOU GAGNÉ KAN NOU CONTIGNE VEILLÉ

4. Kifer kan nou “contigne veillé,” sa pa vedir ki nou bizin touletan pé guette ler?

⁴ Ena certain l’activité couma par exemple, travail dan enn l’usine, al guette docteur ou-soit prend bus, kot nou bizin respecté enn ler precis. Mais ena lezot activité couma par exemple, teigne enn grand difé ou-soit sauve bann dimoune apré enn catastrophe, kot nou pa pou guette nou ler parski sa pou distraire nou ek pli grave, sa kapav dangereux. Dan bann situation coumsa, li beaucoup pli important ki nou concentré lor nou travail au lieu ki nou tracassé avek ler. Pli allé, la fin sa systeme-la pé vinn pli pré, alors li pé vinn encore pli important ki nou aide bann dimoune pou konn bann disposition ki Jéhovah inn prend pou sauve zot la vie. Pou bann chretien contigne veillé, sa pa vedir ki zot bizin guette ler a chaque fois. En realité, ena au moins cinq bienfait ki nou kapav gagné kan nou pa konn exactement jour ek ler ki la fin pou vini.

5. Couma kan nou pa konn jour ek ler la fin, sa montré seki ena dan nou leker?

⁵ Premierement, kan nou pa koné kan la fin pou vini, sa montré seki ena vrai-mem dan nou leker. Jéhovah montré ki Li ena respé pou nou kan Li laisse nou choisir pou reste fidele envers Li. Mem si nou ena l’espoir pou survive kan la fin sa systeme-la pou vini, nou servi Jéhovah parski nou content Li, pa zis pou gagne la vie sauve. (Lire Psaume 37:4.) Nou content pou faire so volonté, ek nou reconette ki Bondié pé enseigne nou pou nou profit. (Is. 48:17) Nou pa trouve so bann commandement lourd.​—1 Jean 5:3.

6. Kan nou servi Jéhovah parski nou content Li, ki Li ressenti, ek kifer?

⁶ Deuxiemement, enn lot bienfait ki nou gagné kan nou pa konn jour ek ler la fin, c’est ki sa donne nou l’occasion pou faire leker Jéhovah content. Kan nou servi Jéhovah parski nou content Li​—pa a cause enn date ou-soit selman pou enn recompense​—nou donne Jéhovah l’occasion pou reponn Satan, so adversaire ki provok Li. (Job 2:4, 5; lire Proverbes 27:11.) Kan nou reflechi lor tou la peine ek chagrin ki Satan le Diable finn faire bann dimoune gagné, nou bien content pou soutenir souveraineté Jéhovah ek rejette mauvais domination Satan.

7. Kifer ou pensé li bon ki ou amenn enn la vie sacrifice?

⁷ Troisiemement, kan nou servi Bondié sans ki nou ena enn date precis dan nou l’esprit, sa encourage-nou pou amenn enn la vie sacrifice. Zordi, certain ki pa konn Bondié croire zot aussi ki sa le monde-la pa pou kapav duré pli longtemps. Zot peur pangar enn catastrophe arrivé, alors zot l’attitude c’est: “Anou mangé-boire, parski demain nou pou mort.” (1 Cor. 15:32) Mais nou, nou pa peur. Nou refuse pou isole-nou pou satisfaire nou prop desir egoïste. (Prov. 18:1) Au contraire, nou renié nou-mem ek nou servi nou le temps, nou l’energie, ek seki nou ena, pou partage la bonne nouvelle lor Royaume Bondié. (Lire Matthieu 16:24.) Nou content pou servi Bondié, surtout pou aide lezot pou konn Li.

8. Ki l’exemple dan la Bible montré ki nou bizin compte plus lor Jéhovah ek lor so Parole?

⁸ Enn quatrieme bienfait ki nou gagné kan nou pa konn jour ek ler la fin, c’est ki sa aide nou pou compte plus lor Jéhovah ek pou applik bien so Parole dan nou la vie. A cause nou imparfait, nou ena tendance pou compte lor nou-mem. Paul ti averti tou bann chretien: “Si enn kikenn croire li deboute, li bizin faire attention ki li pa tombé.” Vingt-trois mille dimoune ti perdi faveur Jéhovah ek ti mort, enn tipé avant ki Josué ti guide peuple Bondié dan la Terre promise. Paul ti dire ki ‘sa bann kitsoz-la finn ecrire pou averti nou, nou ki’nn arrive pré ar la fin sa systeme-la.’​—1 Cor. 10:8, 11, 12.

9. Couma bann l’epreuve kapav forme nou ek faire nou vinn pli proche avek Bondié?

⁹ Cinquieme bienfait ki nou gagné kan nou pa koné kan la fin pou vini, c’est ki sa permette bann l’epreuve pou forme nou ek faire nou la foi vinn pli solide. (Lire Psaume 119:71.) Bann dernier jour sa systeme-la zot vrai-mem ‘critik ek difficile pou supporté.’ (2 Tim. 3:1-5) Beaucoup dan le monde Satan ena la haine pou nou, alors kitfois zot persecute nou a cause nou la foi. (Jean 15:19; 16:2) Si pendant sa bann l’epreuve-la nou rod direction Bondié avek humilité, nou la foi pou vinn pli solide coumadir nou finn purifié li a travers difé. Nou pa baisse lé-bras. Au contraire, sa bann l’epreuve-la faire nou vinn pli proche ar Jéhovah dan enn fason ki jamais nou pa ti pou pensé avant.​—Jacq. 1:2-4; 4:8.

10. Ki kitsoz faire le temps parette pé passe vite?

¹⁰ Li kapav arrivé ki nou trouve le temps pé passe trop vite ou-soit trop doucement. Kan nou occupé ek nou implik-nou dan seki nou pé faire, au lieu ki nou guette ler a chaque fois, nou ena l’impression ki le temps passe bien vite. Pareil aussi, si nou bien occupé avek travail extraordinaire ki Jéhovah inn donne nou, sa jour ek sa ler ki la fin pou vini-la pou arrivé sans ki nou rann-nou compte. Dan sa domaine-la, bann chretien oint inn donne enn l’exemple extraordinaire. Anou guette seki ti arrivé kan Jésus ti vinn le Roi en 1914 ek couma certain chretien oint ti montré ki zot ti’nn paré, alors ki lezot non.

BANN CHRETIEN OINT MONTRÉ KI ZOT INN PARÉ

11. Apré 1914, kifer certain chretien oint ti pensé ki Jésus ti pé tardé?

¹¹ Rappel parabole ki Jésus ti donné lor bann vierge ek bann talent. Si sa bann vierge ou-soit sa bann esclave-la ti deja koné kan le marié, setadir zot maitre ti pou vini, li pa ti pou necessaire ki zot contigne veillé. Mais zot pa ti koné, alors zot ti bizin contigne veillé. Mem si plusieurs dizaine l’année avant, bann chretien oint ti koné ki 1914 ti pou enn l’année special, zot pa ti vrai-mem bien comprend seki ti pou arrivé. Kan bann l’evenement pa ti arrivé couma zot ti pé attann, pou zot, li ti pareil coumadir Jésus, le Marié, ti pé tardé pou vini. Enn frere plitar ti raconté: “Certain parmi nou ti vrai-mem pensé ki nou ti pou al dan le ciel dan premier semaine octobre sa l’année-la [1914].”

12. Couma bann chretien oint ti montré ki zot ti fidele ek avisé?

¹² Surement sa bann frere-la ti bien decouragé parski zot ti pé attann ki la fin vini, mais li pa ti vini! En plus, zot ti gagne l’opposition kan Premier Guerre mondial ti eclaté. Sa ti preské arrete travail predication, coumadir sa bann chretien oint-la ti pé dormi. Mais, en 1919, ti ena enn l’appel ki ti leve zot. Jésus ti vinn dan temple spirituel Bondié, ek ti’nn arrive ler pou inspecté tou bann ki ti dire zot chretien. Mais pendant sa l’inspection-la, Jésus ti trouvé ki certain chretien pa ti reste lor zot garde, alors, zot ti perdi privilege pou contigne travail pou li. (Mat. 25:16) Coumadir zot pa ti prend compte pou rempli zot reservoir de l’huile spirituel, pareil couma bann vierge bete. Ek pareil couma sa esclave paresse-la, zot pa ti disposé pou faire bann sacrifice pou Royaume Bondié. Mais majorité bann chretien oint ti montré enn grand fidelité ek enn grand desir pou servi zot Maitre mem pendant bann l’année difficile kan ti ena la guerre.

13. Ki l’attitude bann chretien oint ti ena apré 1914, ek ki l’attitude zot ena zordi?

¹³ Apré 1914, La Tour de Garde ti faire sa declaration bien important-la: “Frere, bann ki parmi nou ena enn bon l’attitude envers Bondié pa decouragé par okenn disposition ki Li prend. Nou pa ti souhaité ki c’est nou volonté ki accompli; alors, kan nou ti realisé ki nou pa ti pé attann seki ti bizin en octobre 1914, nou ti content ki [nou] Seigneur pa ti change So Plan pou faire nou plaisir. Nou pa ti envie ki Li faire sa. Nou ti zis envie comprend so bann plan ek so bann projet.” Zordi, bann chretien oint encore ena sa mem l’attitude humble-la ek mem desir pou faire volonté Bondié. Zot pa pretann ki zot inspiré par Bondié, mais zot bien decidé pou faire travail nou Seigneur lor la terre. Ek zordi, bann membre ‘la grande foule’ “lezot brebis” ki ena l’esperance pou vive lor la terre, pé imite zot l’exemple.​—Rév. 7:9; Jean 10:16.

MONTRÉ KI NOU FINN PARÉ

14. Kan nou reste attaché ar moyen ki Bondié inn servi pou donne la nourriture spirituel, couma sa protege nou?

¹⁴ Pareil couma bann chretien oint, bann membre la grande foule ki reste lor zot garde, zot aussi zot reste attaché ar moyen ki Bondié inn etabli pou donne la nourriture spirituel. Lerla, c’est coumadir zot aussi zot pé rempli zot reservoir de l’huile spirituel ar Parole Bondié ek ar so l’esprit saint. (Lire Psaume 119:130; Jean 16:13.) Sa fortifié zot ek coumsa, zot aussi zot kapav montré ki zot inn paré pou la fin kan Christ retourné. Ek zot reste aussi actif mem dan bann situation bien difficile. Par exemple, dan enn camp concentration nazi, au commencement, bann frere ti ena zis enn la Bible. Alors, zot ti prié pou zot gagne plus nourriture spirituel. Enn tipé apré, zot ti aprann ki enn frere ki ti fek rente dan camp couma prisonnier, ti reussi cachiette deux-trois copie La Tour de Garde dan so la jambe di-bois. Parmi bann survivant, ti ena enn frere oint ki ti appel Ernst Wauer. Li ti raconté plitar: “Jéhovah ti aide nou dan enn fason extraordinaire pou garde dan nou memoire bann pensée encourageant ki ti ena dan sa bann lartik-la.” Apré sa, li ti dire: “Zordi, li tellement facile pou gagne la nourriture spirituel, mais eski nou touletan apprecié seki nou gagné? Mo sur ki Jéhovah inn reserve beaucoup benediction pou bann ki ena confiance en Li, ki reste fidele ek ki mange lor so la table.”

15, 16. Couma enn couple inn recompensé pou zot zele dan predication, ek ki ou kapav aprann ar bann l’exemple coumsa?

¹⁵ Bann membre lezot brebis aussi reste bien occupé dan travail zot Maitre, ek zot soutenir bann frere Christ. (Mat. 25:40) Zot pa pareil couma sa mauvais esclave paresse dan parabole Jésus-la. Zot disposé pou faire bann sacrifice ek bann zeffort personnel pou mette Royaume Bondié en premier dan zot la vie. Par exemple, kan Jon ek Masako ti invité pou al Kenya pou preche ar bann chinois ki ti reste la-bas, au commencement zot ti hesité. Mais apré ki zot ti examine zot situation dan la priere, zot ti decidé pou al reste dan sa pays-la.

¹⁶ Zot ti bien recompensé pou zot zeffort. Zot dire: “Predication extraordinaire ici!” Zot ti commence sept l’etude la Bible. Apré, zot ti faire encore beaucoup lezot bon l’experience. Finalement zot ti dire: “Nou remercié Jéhovah toulé-jour ki Li’nn permette nou vinn ici.” Bien sur, ena beaucoup lezot frere ek soeur ki finn montré ki zot bien decidé pou reste occupé dan service Bondié, mem si zot pa koné kan la fin pou vini. Mazinn sa bann millier chretien ki finn al lekol Guiléad-la, ek ki’nn vinn missionnaire. Kifer ou pa lire lartik “ Nous faisons de notre mieux ! ” dan La Tour de Garde 15 octobre 2001, en français? C’est enn lartik bien interessant ki koz lor enn journée dan la vie enn missionnaire. A mesure ki ou lire sa lartik-la, reflechi couma ou kapav faire plus dan service Bondié. Lerla ou service pou donne Li la gloire ek en retour, ou pou heureux.

OU AUSSI, CONTIGNE VEILLÉ

17. Couma li enn benediction ki nou pa konn ni jour ni ler la fin?

¹⁷ En realité, li enn benediction ki nou pa konn jour ek ler exact kan la fin sa systeme-la pou vini. Au lieu ki nou agacé ou-soit decouragé, sa finn aide nou pou vinn pli proche ar Jéhovah, nou Papa ki content nou, a mesure ki nou reste bien occupé pou faire so volonté. Kan nou reste concentré lor travail ki Jésus finn donne nou pou faire, ek nou pa laisse-nou distraire par lezot kitsoz, sa finn rann nou joyeux pou servi Jéhovah.​—Luc 9:62.

18. Kifer nou envie reste fidele?

¹⁸ Jour jugement Bondié pé vini bien vite. Personne parmi nou pa envie faire Jéhovah ek Jésus chagrin. Zot finn donne nou bann grand privilege dan sa bann dernier jour ki nou pé vive-la. Oui, nou accorde beaucoup valeur ar confiance ki zot faire nou!​—Lire 1 Timothée 1:12.

19. Couma nou kapav montré ki nou finn paré?

¹⁹ N’importe ki l’esperance nou ena​—pou vive dan le ciel ou-soit dan Paradis lor la terre​—anou bien decidé pou reste fidele dan travail ki Bondié inn donne nou pou al preché ek faire bann disciple. Nou toujours pa koné exactement ki jour ek ki ler jour Jéhovah pé vini. Mais eski vrai-mem nou bizin koné? Nou kapav ek nou pou contigné montré ki nou finn paré. (Mat. 24:36, 44) Tant ki nou ena enn confiance total en Jéhovah ek nou mette so Royaume en premier dan nou la vie, nou sur ki nou pa pou regretté.​—Rom. 10:11.