Jéhovah rassemblé so peuple ki heureux

1, 2. Ki nou pou examiné lor bann l’assemblée dan sa lartik-la?

LA PLUPART parmi nou kapav rappel ki depuis bien longtemps bann l’assemblée district ek international zot bann l’evenement important dan l’histoire moderne bann Témoins de Jéhovah. Beaucoup parmi nou finn assisté sa bann l’evenement joyeux-la, kitfois pendant plusieurs dizaine l’année.

² Ena plusieurs millier l’année, peuple Bondié ti aussi ena bann rassemblement sacré. Nou pou examine certain rassemblement ki mentionné dan la Bible ek nou pou remark bann ressemblance ki ena avek bann l’assemblée ki nou ena zordi. Nou pou aprann ki bann bienfait nou gagné kan nou assisté bann l’assemblée.​—Ps. 44:1; Rom. 15:4.

BANN L’ASSEMBLÉE IMPORTANT DAN LE PASSÉ EK DAN NOU LEPOK

3. (a) Ki ti arrivé kan ti ena premier l’assemblée peuple Jéhovah ki mentionné dan la Bible? (b) Ki Moïse ti faire pou rassemblé bann Israélite?

³ Premier grand l’assemblée ki mentionné dan la Bible c’est kan Jéhovah ti rassemblé so peuple devant montagne Sinaï pou donne zot bann l’instruction spirituel. Sa ti vrai-mem enn l’occasion special dan l’histoire vrai l’adoration, enn l’evenement extraordinaire ki surement bann Israélite jamais pa ti pou blié. Dan sa l’occasion-la, Jéhovah ti montré so pouvoir kan Li ti donne zot so la Loi. (Ex. 19:2-9, 16-19; lire Exode 20:18; Deutéronome 4:9, 10.) Sa l’evenement-la ti amenn enn changement dan relation ki Bondié ti ena avek nation Israël. Pa trop longtemps apré, Jéhovah ti dire Moïse ki li ti bizin faire pou rassemblé So peuple. Li ti donne l’ordre Moïse pou faire deux trompette en argent. Kan ti sonne sa bann trompette-la “tou l’assemblée” ti zwenn “devant l’entrée la tente reunion.” (Nomb. 10:1-4) Essaye mazinn sa l’excitation ki ti ena dan sa bann l’occasion-la!

4, 5. Kifer bann l’assemblée ki ti organisé par Moïse ek Josué ti bien important?

⁴ Kan bann Israélite ti pré pou fini passe 40 an dan desert, Moïse ti rassemblé zot. Sa ti enn moment bien important dan l’histoire sa nouveau nation-la. Zot ti pré pou rente dan la Terre promise. Sa ti enn bon moment pou Moïse rappel so bann frere tou seki Jéhovah ti’nn faire pou zot ek tou seki Li ti pou faire encore.​—Deut. 29:1-15; 30:15-20; 31:30.

⁵ Kitfois pendant sa mem l’assemblée-la, Moïse ti dire le peuple ki ti pou ena regulierement bann l’assemblée pou instruire zot. Pendant fête des Huttes, dan bann l’année sabbatik, bann zom, bann femme, bann zenfant ek bann etranger ki ti vive en Israël ti bizin rassemblé dan enn place ki Jéhovah ti choisir ‘pou zot ecouté ek pou zot aprann, pou zot ena la crainte pou Jéhovah ek veille bien pou applik tou bann parole sa la loi-la.’ (Lire Deutéronome 31:1, 10-12.) Sa montré ki depuis commencement-mem dan l’histoire peuple Bondié, Jéhovah ti envie ki zot rassemblé regulierement pou examine so parole ek so volonté. Kan bann Israélite ti fini prend la Terre promise net, mais ti encore entouré par bann nation païen, Josué ti rassemblé la nation en entier, pou fortifié zot determination pou reste fidele envers Jéhovah. Lerla, le peuple ti faire enn serment pou servi Bondié.​—Jos. 23:1, 2; 24:1, 15, 21-24.

6, 7. Kifer nou kapav dire ki bann l’assemblée ti bann l’evenement important dan l’histoire moderne bann serviteur Jéhovah?

⁶ Dan l’histoire moderne bann serviteur Jéhovah, ti ena aussi bann l’assemblée bien important​—bann l’evenement kot ti annonce bann changement important dan l’organisation ou-soit dan fason ki nou comprend certain verset la Bible. (Prov. 4:18) Apré Premier Guerre mondial, bann Étudiants de la Bible ti faire zot premier grand l’assemblée en 1919, dan Cedar Point, Ohio, en Amérique. Ti ena apepré 7,000 dimoune ki ti assisté sa l’assemblée-la ek ti faire enn l’annonce pou ki peuple Bondié faire enn zeffort special pou preche partout dan le monde. En 1922, pendant enn l’assemblée neuf jour dan mem l’endroit, Joseph Rutherford ti faire enn discours bien puissant pou encourage bann assistant pou contigne preché. Li ti dire zot: “Vinn bann fidele ek bann vrai temoin [nou] Seigneur. Contigné combatte ziska ki tou l’endroit dan Babylone vinn desert. Annonce sa message-la partout. Le monde bizin koné ki Jéhovah Li-mem Bondié ek ki Jésus-Christ li le Roi bann le roi ek Seigneur bann seigneur. Sa jour-la pli grand ki tou bann jour. Prend compte, le Roi pé regné! Zot so bann messager. Alors, proclame, proclame, proclame le Roi ek so Royaume.” Apré sa l’assemblée-la, bann assistant ek bann serviteur Bondié dan le monde entier ti commence preche avek pli beaucoup zele.

⁷ Dan Columbus, Ohio, en 1931, bann Étudiants de la Bible ti bien content pou prend nom Témoins de Jéhovah. Apré sa, en 1935, dan Washington D.C., frere Rutherford ti expliké kisannla ‘la grande foule’ ki livre Révélation mentionné ek ki “pé debouté devant trone ek devant l’Agneau.” (Rév. 7:9-17) En 1942, en plein Deuxieme Guerre mondial, Nathan Knorr ti faire enn discours bien interessant: “ La paix de demain sera-t-elle de longue durée ? ” Dan sa discours-la, frere Knorr ti expliké ki “bête sauvage couleur rouge” mentionné dan Révélation chapitre 17, representé. Li ti dire aussi ki pou ena encore enn grand l’activité predication ki pou faire apré la guerre.

8, 9. Kifer certain l’assemblée ti bien touchant?

⁸ Dan l’ “ Assemblée théocratique des Nations joyeuses ” ki ti faire en 1946 dan Cleveland, Ohio, frere Knorr ti faire enn discours bien interessant ki ti appel “ Problèmes de reconstruction et d’expansion. ” Enn frere ki ti assisté sa l’assemblée-la ti ecrire: “Mo ti ena privilege pou la sa l’apré-midi-la, mo ti lor l’estrade, derriere frere Knorr, kan li ti pé koz lor travail predication ek lor plan pou agrandi Béthel ek l’imprimerie Brooklyn, ek a chaque fois l’assistance ti applaudi. Lor l’estrade, mem si mo pa ti kapav trouve okenn figure dan l’assistance, mo ti kapav senti sa la joie ki ti ena dan l’assistance-la.” En 1950, pendant enn l’assemblée international dan New York, l’assistance ti bien content pou gagne Les Écritures grecques chrétiennes — Traduction du monde nouveau en anglais. Sa ti premier partie enn la Bible en langage moderne ki ti ré-mette nom Bondié dan place kot li bizin été dan so Parole.​—Jér. 16:21.

⁹ Bann l’assemblée kot Jéhovah ti rassemblé so bann serviteur ki fidele apré bann periode persecution ou-soit apré bann l’interdiction, ti aussi bann l’assemblée bien touchant. Adolf Hitler ti faire serment pou detruire bann Témoins de Jéhovah en Allemagne. Mais en 1955, ti ena 107,000 Témoins ki ti rassemblé dan Nuremberg pou enn l’assemblée, dan mem place kot Hitler ek so l’armée ti faire so parade. Beaucoup, ki ti present sa jour-la, pa ti kapav tini zot larme tellement zot ti content! En 1989, dan Pologne, ti ena trois l’assemblée district ki ti appel “ La piété. ” Ti ena 166,518 delegué ki ti assisté sa bann l’assemblée-la, la plupart parmi zot ti sorti dan ancien Union soviétique, dan Tchécoslovaquie ek dan lezot pays l’Europe de l’Est. Pou certain, sa ti premier fois ki zot ti assisté enn rassemblement kot ena plus ki 15 ou 20 dimoune. Mazinn la joie ki ti ena dan l’assemblée international “ L’enseignement divin ” en 1993, dan Kiev, en Ukraine, kot 7,402 dimoune ti prend bapteme​—jamais pa finn ena sa quantité bapteme-la avant parmi bann Témoins de Jéhovah dan enn sel jour!​—Is. 60:22; Hag. 2:7.

10. Ki bann l’assemblée ki finn mark ou, ek kifer?

¹⁰ Kitfois ena bann l’assemblée district ou-soit international ki ti special pou ou. Eski ou rappel ou premier l’assemblée ou-soit l’assemblée kot ou ti prend bapteme? Sa ti bann l’evenement important dan ou la vie. Sa bann souvenir-la zot couma enn tresor, garde sa bien dan ou memoire!​—Ps. 42:4.

BANN L’OCCASION KI FAIRE NOU CONTENT

11. Ki bann fête, Bondié ti demann bann Israélite assisté chaque l’année?

¹¹ Jéhovah ti demann bann Israélite pou rassemblé-zot chaque l’année dan Jérusalem pou trois fête​—fête Gateau sans levain, fête des Semaines (ki plitar ti appel la Pentecôte), ek fête des Huttes. Concernant sa bann fête-la, Bondié ti donne l’ordre: “Trois fois dan l’année, tou bann male kot toi pou bizin parette devant figure [vrai] Seigneur, Jéhovah.” (Ex. 23:14-17) Beaucoup chef famille ti assisté sa bann fête-la avek tou zot famille parski zot ti reconette ki sa ti ena enn grand valeur spirituel.​—1 Sam. 1:1-7; Luc 2:41, 42.

12, 13. Ki bann Israélite ti bizin faire pou assisté bann fête chaque l’année?

¹² Maziné ki sa ti vedir pou enn famille Israélite ki ti bizin faire enn voyage coumsa. Par exemple, Joseph ek Marie ti bizin voyage apepré 100 kilometre depuis Nazareth ziska Jérusalem. Dapré ou, comié le temps ou ti pou prend pou faire enn voyage coumsa, si ou ti bizin marché avek bann zenfant? Dan la Bible, ena enn recit ki dire ki Jésus ti al Jérusalem avek so bann parent kan li ti jeune. Sa recit-la montré ki ti ena aussi bann lezot famille ek bann dimoune ki zot koné ki ti faire sa voyage-la ensam avek zot. Surement sa ti enn l’experience pou zot, pou voyage ensam, prepare mangé ek rod bann place pou dormi dan bann l’endroit ki zot pa ti trop koné. Pourtant zot ti senti-zot en securité, parski bann parent Jésus ti donne li enn certaine liberté mem si li ti ena zis 12 an. Maziné couma sa bann l’evenement-la ti extraordinaire, surtout pou bann jeune zenfant!​—Luc 2:44-46.

¹³ Avek le temps, bann Israélite ti dispersé partout en dehors zot pays. Alors, bann ki ti vinn assisté bann fête ti sorti dan plusieurs nation. La Pentecôte l’an 33 nou lepok, bann Juif ek bann prosélyte ki ti ena reconnaissance pou Jéhovah, ti voyagé depuis l’Italie, Libye, Crète, l’Asie Mineur, ek Mésopotamie pou vinn Jérusalem.​—Actes 2:5-11; 20:16.

14. Ki bienfait bann Israélite ti gagné kan zot ti assisté bann fête chaque l’année?

¹⁴ Pou bann Israélite ki ti fidele, raison pli important kifer zot ti faire sa voyage-la, c’est parski zot ti envie adore Jéhovah ensam avek bann millier adorateur ki ti content Li zot aussi. Ki l’effet sa ti ena lor bann ki ti assisté sa bann fête-la? Nou gagne enn reponse kan nou guette seki Jéhovah ti dire concernant fête des Huttes: “To bizin joyeux pendant to fête, toi, to garson ek to tifi, to esclave male ek to esclave femelle, bann Lévite, bann etranger, bann orphelin ki pena papa, ek bann veuve, ki reste parmi zot. Pendant sept jour, to pou faire sa fête-la pou Jéhovah to Bondié dan l’endroit ki Jéhovah pou choisir, parski Jéhovah to Bondié pou beni toi dan tou to bann produit ek dan tou seki to faire; oui, to pou bizin zis dan la joie.”​—Deut. 16:14, 15; lire Matthieu 5:3.

KIFER NOU BIZIN APPRECIÉ BANN L’ASSEMBLÉE DAN NOU LEPOK?

15, 16. Ki bann sacrifice ou finn bizin faire pou assisté bann l’assemblée? Kifer li vaut la peine nou faire sa bann zeffort-la?

¹⁵ Sa bann fête ki ti ena dan le passé-la, c’est bann bon l’exemple pou nou zordi. Mem si beaucoup kitsoz inn changé pendant bann siecle ki’nn passé, bann l’aspect important bann assemblée pa finn changé. Dan lepok biblik, bann ki ti al dan bann rassemblement, ti bizin faire bann sacrifice. Zordi aussi pareil. Mais selman, kan nou considere bann bienfait ki nou gagné, li vaut la peine nou faire bann zeffort. Sa bann l’evenement-la ti bann l’evenement spirituel important, ek zot encore toujours important. Zot donne nou l’enseignement ek bann connaissance ki bien important pou nou garde bann bon relation avek Bondié. Bann l’assemblée motive nou pou applik seki nou aprann, aide nou pou evite bann probleme, ek encourage nou pou reste concentré lor bann l’objectif ki pou faire nou di-bien ek ki pou faire nou gagne la joie.​—Ps. 122:1-4.

¹⁶ Bann ki assisté l’assemblée finn touletan ressenti enn grand la joie. Enn rapport ki finn faire lor enn grand l’assemblée en 1946 dire: “Li ti vrai-mem extraordinaire pou trouve plusieurs millier temoin ensam dan enn sel place, ek li ti encore pli joyeux pou ecoute enn grand l’orchestre ensam avek la voix enn quantité assistant ki ti chante bann joli cantik pou loué Jéhovah ek ki ti faire stade vibré.” Sa rapport-la ti ajouté: “Service volontaire ti enregistré bann volontaire parmi bann delegué pou travail dan tou bann service, zot ti envie montré zot la joie pou servi bann lezot temoin.” Eski ou aussi ou ena mem sentiment kan ena bann l’assemblée district ou-soit international?​—Ps. 110:3; Is. 42:10-12.

17. Couma l’organisation bann l’assemblée finn changé dan nou lepok?

¹⁷ Certain kitsoz finn changé dan fason ki organise bann l’assemblée. Par exemple, certain encore rappel kan ti ena bann l’assemblée pendant huit jour! Ti ena bann session gramatin, dan l’apré-midi ek dan la soirée. Bann rendez-vous predication ti forme regulierement partie dan bann programme l’assemblée. Certain partie ti commencé neuf heure gramatin, ek ti ena souvent bann session ziska neuf heure du soir. Bann volontaire ti travail bien dur ek zot ti passe beaucoup le temps pou prepare ti dejeuner, dejeuner, ek diner pou bann assistant. Zordi, nou programme l’assemblée ena pli tigit jour, ek chaque famille prepare so prop mangé a l’avance. Sa permette zot pou concentré pli bien lor programme spirituel ki ena dan l’assemblée.

18, 19. Ki partie dan bann l’assemblée ou attann avek impatience, ek kifer?

¹⁸ Ena certain kitsoz ki bien longtemps finn forme partie dan programme l’assemblée ek ki nou attann avek beaucoup la joie. Bann discours ek aussi bann nouveau publication ki parette dan l’assemblée, donne nou la “nourriture [spirituel] dan ler ki bizin” ek aide nou pou comprend pli bien bann prophetie ek bann l’enseignement la Bible. (Mat. 24:45) Souvent sa bann nouveau publication-la aide bann dimoune sincere pou comprend bann verité ki ena dan la Bible. Bann drame ki basé lor la Bible encourage bann jeune ek bann agé toulé-deux pou examine zot mobile ek mette-zot en garde kont l’esprit sa le monde-la. Discours bapteme aussi donne nou tou l’occasion pou examine nou bann priorité dan la vie ek pou ena la joie pou trouve lezot prend bapteme.

¹⁹ Oui, bann l’assemblée finn forme partie dan vrai l’adoration depuis bien longtemps, ek sa finn aide bann serviteur Jéhovah pou servi Li avek fidelité ek dan la joie, dan bann lepok difficile. Sa bann l’assemblée-la donne nou la force spirituel, donne nou l’occasion pou faire camarade ar lezot, ek aide nou pou apprecié famille international nou bann frere. Bann l’assemblée zot enn moyen important ki Jéhovah servi pou beni ek pou prend soin so peuple. Pena doute ki sakenn parmi nou pou envie organise-li pou li kapav assisté ek tire profit dan chaque session bann l’assemblée.​—Prov. 10:22.