REPONS POU BANN KESTION BIBLIK
Eski enn zour pou ena enn gouvernman ki pou diriz lemond antie?
Kouma enn gouvernman mondial kapav fer tou bann nasion viv dan linite? IzaI 32:1, 17; 54:13
Mazine kouma enn gouvernman mondial pou fer bann dimounn gagn bann bienfe. Zordi boukou dimounn pe soufer akoz lamizer, alor ki lezot dimounn bien ris. Me enn gouvernman mondial ki ena konpasion kapav donn sak dimounn seki li bizin. Eski ou panse ki enn zour bann dimounn pou kapav etabli enn gouvernman koumsa?—Lir Zeremi 10:23.
Toutlong listwar, bann gouvernman pa finn reisi donn zot bann sitwayen seki zot bizin, sirtou bann dimounn pov. Sertin gouvernman pena okenn pitie. (Ekleziast 4:1; 8:9) Me Bondie Tou-Pwisan finn promet ki li pou etabli enn gouvernman ki pou ranplas tou bann lezot gouvernman. So Dirizan vremem pou pran swin bann dimounn.—Lir Izai 11:4; Daniel 2:44.
Ki Rwayom Bondie pou fer?
Zeova finn swazir pli bon Dirizan ki ena: so Garson, Zezi. (Lik 1:31-33) Kan Zezi ti lor later, li ti bien kontan pou ed bann dimounn. Antan ki Lerwa, li pou fer tou bann nasion viv dan linite ek li pou soulaz bann dimounn dan tou zot soufrans.—Lir Psom 72:8, 12-14.
Eski tou dimounn pou aksepte Zezi kouma zot Dirizan? Non. Me Zeova ena pasians. (2 Pier 3:9) Li pe donn tou dimounn lokazion pou aksepte Zezi kouma zot Dirizan. Biento, Zezi pou debaras later ar bann move dimounn ek li pou etabli lape ek sekirite mondial.—Lir Mika 4:3, 4.