Construction bann Salle du Royaume—Enn l’aspect important dan nou service sacré
1. Ki finn accompli dan construction bann Salle du Royaume, ek ki reste pou faire encore?
1 Pendant cinq dernier l’année ki’nn passé, inn construire quatre nouveau la-Salle du Royaume, ek inn faire renovation huit la-salle dan territoire la filiale Maurice. Bureau construction bann Salle du Royaume ek comité construction regional, ek aussi tou bann ki finn soutenir zot, finn faire enn bon travail. Nou vrai-mem bien apprecié zot dur travail! Mem si’nn reussi faire enn bon quantité travail, ena encore beaucoup ki reste pou faire dan construction bann Salle du Royaume. Couma eski nou tou nou kapav soutenir construction bann Salle du Royaume, ki enn l’aspect important dan nou service sacré ki nou rann Jéhovah?—Rév. 7:15.
2. Ki nou kapav faire pou participe directement dan travail construction bann Salle du Royaume?
2 Porte-nou volontaire: Si ou enn proclamateur baptisé, nou invite ou pou porte-ou volontaire pou travail avek l’equipe construction bann Salle du Royaume ek rempli forme Demande d’admission au programme des volontaires pour la construction des Salles du Royaume (A-25). (Ps. 110:3) Tou bann ki rempli sa forme-la bizin bann dimoune ki disposé pou travail ek cooperé. (Ps. 133:1) Mem si ou pena bann capacité special dan domaine construction, ou kapav faire beaucoup pou permette realise enn projet construction. Kitfois ou kapav aussi gagne enn formation pou ki plitar kapav servi ou plus.
3. Ki bann lezot fason nou kapav soutenir enn projet construction?
3 Si li pa possible pou ou porte-ou volontaire, ou kapav faire ou part kan ou encourage lezot ki kapav participe dan sa program construction-la. Kan ena bann frere ki pa là a cause enn projet construction, ou kapav offert ou l’aide pou assume zot bann responsabilité dan congregation. Si bann ancien organise-zot bien a l’avance, la congregation pa pou negligé kan certain al travail lor enn projet construction. Nou sur ki Jéhovah content kan nou travail ensam dan l’unité pou favorise bann l’interet so Royaume.—Héb. 13:16.
4. Couma nou kapav encourage bann volontaire ki participe dan bann projet construction bann Salle du Royaume?
4 Nou bizin encourageant: Construire bann la-salle pou adore Bondié, sa demann beaucoup lé-temps ek beaucoup zeffort. Alors, si enn kikenn inn gagne l’invitation pou al aidé dan enn projet construction, nou pou comprend kifer li pa touletan present dan so congregation. Fodé pa nou hesité pou felicite ek encourage sa bann volontaire-la; zot pé faire bann sacrifice pou occupe “sa travail ki necessaire-la.”—Actes 6:3; Rom. 14:19.
5. Couma eski bann volontaire kapav montré ki zot equilibré?
5 Nou bizin equilibré: L’activité principal ki Bondié finn confié nou c’est predication la bonne nouvelle lor so Royaume. (Marc 13:10) Bureau construction bann Salle du Royaume prend sa compte ek zot faire tou zot possible pou organise bann projet pou ki bann volontaire pa bizin absent dan zot congregation kan li pa necessaire. Bann volontaire aussi faire zeffort pou reste equilibré dan zot bann responsabilité. Zot prend bann disposition personnel pou ki lezot kapav assume zot bann responsabilité dan congregation kan zot pa là.
6. Ki arrivé kan tou dimoune dan la congregation cooperé ensam pou favorise vrai l’adoration?
6 L’apotre Paul ti decrire bann membre la congregation couma bann ki travail ensam dan l’unité pou ki “lekor-la grandi pou ki li fortifié li-mem dan l’amour.” (Éph. 4:16) Nou l’amour pou Jéhovah ek pou vrai l’adoration pousse nou pou coopere ensam avek lezot pou soutenir travail predication ek travail construction bann Salle du Royaume.