Eski dan le passé ou ti enn pionnier permanent?
1. Ki privilege beaucoup ti ena avant, mais ki certain finn bizin faire?
1 Plusieurs millier proclamateur finn goute privilege pou “enseigne ek annonce la bonne nouvelle” en tant ki bann serviteur a plein temps, pendant plusieurs l’année. (Actes 5:42) Mais, certain finn bizin arrete zot service pionnier pou plusieurs raison. Si longtemps ou ti enn pionnier permanent, eski ou finn examine ou situation asterla pou guetté si ou kapav ré-prend sa service-la?
2. Kifer eski bann ki ti pionnier avant bizin examine zot situation asterla?
2 Bann situation changé: Li possible ki situation ki ti amenn ou pou arrete ou service pionnier nepli existé asterla. Par exemple, si ou ti arrete ou service parski ou pa ti pé kapav gagne quantité l’heure ki ti pé demann bann pionnier pou faire, setadir 90 heure par mois, asterla ki quantité l’heure inn diminué inn vinn 70, eski ou kapav ré-prend ou service? Comparé ar lepok kot ou ti arrete faire pionnier, eski asterla ou nepli bizin travail mem quantité ki avant ou-soit ou nepli ena sa quantité responsabilité familial-la? Enn soeur ki ti arrete faire pionnier a cause bann probleme la santé, ti reussi ré-prend so service kan li ti ena 89 an. Li pa ti’nn retourne l’hopital pendant plus ki enn an ek li ti senti ki so la santé ti pou permette li ré-faire pionnier!
3. Couma bann membre enn famille kapav cooperé pou aide enn membre zot famille faire pionnier?
3 Kitfois avant ou pa ti enn pionnier, mais enn kikenn dan ou famille inn arrete faire pionnier pou prend soin enn membre la famille, couma par exemple enn parent agé. (1 Tim. 5:4, 8) Si ou dan sa situation-la, eski ou ou-soit lezot dan la famille kapav faire plus pou aide sa kikenn ki’nn arrete faire pionnier-la? Kifer zot pa koz lor la ensam? (Prov. 15:22) Kan bann membre la famille cooperé pou ki enn parmi zot kapav faire pionnier, zot tou kapav ena sentiment ki zot pé faire zot part dan sa service-la.
4. Si asterla ou pa pé kapav ré-prend service pionnier, ki ou kapav faire?
4 Pa decouragé si asterla ou situation pa pé permette ou pou ré-prend ou service. Le fait ki ou envie ek ou paré pou faire li, sa faire Jéhovah plaisir. (2 Cor. 8:12) Dan ou ministere ki ou pé accompli azordi, servi bann capacité ki ou’nn gagné en tant ki pionnier. Koz lor sa desir-la dan ou la priere, ek veille bann l’occasion pou adapté-ou avek bann situation. (1 Jean 5:14) Kitfois avek le temps, Jéhovah pou ouvert “enn grand la porte pou l’activité” pou ki ou kapav ré-gagne la joie pou faire service pionnier permanent.—1 Cor. 16:9.