Rann temoignage dan la rue dan enn fason efficace
1. Cite enn fason couma nou kapav imite Jésus.
1 Pendant so ministere lor la terre, Jésus pa ti hesité pou koz avek bann dimoune ki li ti joinde lor chemin ek dan bann lezot place publik. (Luc 9:57-61; Jean 4:7) Li ti envie partage so message important avek maximum dimoune. Zordi rann temoignage dan la rue c’est enn excellent moyen pou aide bann dimoune gagne sagesse Bondié. (Prov. 1:20) Nou pou gagne enn pli bon resultat si nou prend l’initiative ek servi nou discernement.
2. Couma eski nou montré ki nou prend l’initiative kan nou faire la voie publik?
2 Prend l’initiative: En general li pli bon ki ou al vers bann dimoune au lieu ki ou reste deboute ou-soit assizé dan ou place ek attann ki bann dimoune vinn vers ou. Faire enn sourire, guette dimoune-la ek montré-ou calme ek amical. Si ou pé travail avek lezot proclamateur, souvent li preferable ki bann proclamateur pa approche bann dimoune ensam. Ou bizin aussi faire zeffort pou rod enn fason pou ré-joinde bann dimoune ki’nn montré l’interet. Si possible, a la fin ou conversation, gentiment demann sa dimoune-la couma ou kapav ré-contacté li. Certain proclamateur souvent faire la voie publik dan mem place, seki permette zot pou koz souvent avek bann mem dimoune ek coumsa suive zot l’interet.
3. Couma nou kapav servi discernement kan nou pé rann temoignage dan la rue?
3 Servi discernement: Servi ou bon jugement kan ou ena pou decidé kot-sa ou pou debouté kan ou pé faire la voie publik ek ar kisannla ou pou kozé. Li pa necessaire ki ou rann temoignage ar tou bann dimoune ki pé passé. Observe bien. Par exemple, si enn dimoune pressé vaut mieux ki ou pa rann li temoignage. Kan ou pé rann temoignage devant bann magasin, ou bizin montré ou discret pou evite donne proprietaire sa bann batiment-la bann tracas inutile. Souvent li pli bon ki nou rann temoignage ar bann dimoune ki pé sorti dan sa bann magasin-la au lieu ar bann ki pé rentré. Approche bann dimoune dan enn fason ki pa pou faire zot gagne peur ou-soit faire zot sauté. Nou bizin aussi montré discernement kan nou pé place bann publication. Si enn dimoune pa pé montré enn grand l’interet, ou kapav kitfois donne li enn tract dan place enn periodik.
4. Kifer rann temoignage dan la rue li enn forme predication ki faire nou gagne bann bienfait ek la joie?
4 Rann temoignage dan la rue permette nou pou seme bann la grain la verité dan enn tigit le temps. (Eccl. 11:6) Kitfois certain parmi bann dimoune ki nou joinde c’est bann dimoune ki pa kot zot kan nou preché porte en porte. Kifer ou pa faire bann l’arrangement pou rann temoignage dan la rue, enn forme predication ki donne nou la joie ek ki efficace?