Pa hesité
1. Ki kitsoz demann courage, ek kifer?
1 Eski ou finn deja hesité pou rann temoignage dan lekol parski ou ti peur pangar lezot bouffonne ou? Pena doute ki sa demann courage pou kozé, surtout si ou timide. Ki pou aide ou faire sa?
2. Kan ou rann temoignage dan lekol, couma ou kapav montré ki ou ena enn bon jugement?
2 Servi ou bon jugement: Mem si ou kapav considere lekol couma ou territoire personnel, rappel ki li pa necessaire ki ou commence bann conversation spirituel avek tou dimoune pareil couma ou faire kan ou preché porte en porte. Servi ou bon jugement pou decidé kan ou pou kozé. (Eccl. 3:1, 7) Kan pé discute lor enn sujet dan classe ou-soit kan ou gagne enn devoir, ou kapav profite sa l’occasion-la pou exprime ou la foi. Enn camarade kapav demann ou kifer ou pa participe dan certain activité. La aussi ou kapav profité pou exprime ou la foi. Certain chretien dan commencement l’année-mem, dire zot professeur ki zot Témoin de Jéhovah ek donne zot bann professeur bann publication ki koz lor zot croyance. Lezot laisse bann publication lor zot desk pou encourage zot bann camarade lekol pou pose zot bann question.
3. Couma ou kapav prepare-ou pou rann temoignage dan lekol?
3 Prepare-ou: Si ou prepare-ou, ou pou ena plus confiance. (1 Pierre 3:15) Alors, essaye reflechi a l’avance ki bann question ou kapav gagné, ek pensé couma ou kapav reponn zot. (Prov. 15:28) Si possible, garde ou la Bible ek deux-trois publication couma livre Comment raisonner, Les jeunes s’interrogent, ek bann publication lor la creation, dan lekol, ek coumsa ou kapav faire reference kan ou bizin. Demann ou parent pou faire aussi bann demonstration pendant soirée ki’nn reservé pou l’adoration en famille.
4. Kifer ou bizin contigne rann temoignage dan lekol?
4 Reste positif: Pa pensé ki ou bann camarade lekol touletan pou bouffonne ou kan ou koz lor la verité ar zot. Certain pou respecté ou pou ou courage ek kitfois pou mem ecoute ou. Mais pa decouragé si personne pa montré l’interet. Jéhovah pou content ki ou finn essayé. (Héb. 13:15, 16) Contigne demann Li pou aide ou ‘pou koz avek courage.’ (Actes 4:29; 2 Tim. 1:7, 8) Maziné ki quantité la joie ou pou gagné kan enn kikenn ecoute ou. Ek plitar sa dimoune-la kapav mem vinn enn serviteur Jéhovah!