Kouma pou Tous Leker Bann ki Nou Ansegne
1. Ki lefe bann lansegnman Zezi ti ena lor leker bann ki ti ekout li?
1 Zezi Kris ti tous leker bann ki ti ekout li. Dan omwin enn lokazion, apre ki li ti bien explik so bann disip seki ena dan bann Lekritir, zot leker ti “brile.” (Lik 24:32) Kan nou obeir Bondie, nou bizin fer sa avek nou leker. Alor, kouma nou kapav tous leker bann ki nou ansegne pou ki zot dispoze pou fer bann sanzman dan zot lavi?—Rom. 6:17.
2. Kan nou ena takt ek disernman, kouma sa kapav ed nou pou tous leker bann dimounn?
2 Servi Takt ek Disernman: Pou boukou dimounn, kan nou zis dir zot seki bon ek seki pa bon, sa pa pou ena okenn lefe lor zot. Kitfwa sa kapav mem fer zot elwagne si nou servi enn kantite verse Labib pou kontredir zot krwayans. Pou motiv enn dimounn, dabor nou bizin diserne kifer li krwar dan sertin kitsoz ek kifer li azir dan enn sertin fason. Li inportan ki nou servi takt ek bann kestion ki nou’nn bien swazire pou kone ki li panse. Lerla, sa pou ankouraz li pou exprim so bann santiman ki pli profon. (Prov. 20:5) Se lerla ki nou pou kapav kone ki verse Labib ki kapav tous so leker. Alor, nou bizin interes nou personelman ar dimounn-la ek ena pasians. (Prov. 25:15) Nou bizin rapel ki tou dimounn pa progrese parey lor plan spiritiel. Nou bizin les lespri sin Zeova inflians panse ek aksion bann dimounn.—Mark 4:26-29.
3. Kouma nou kapav ed bann ki nou ansegne pou kiltiv bann bon kalite?
3 Ed Zot pou Kiltiv Bann Bon Kalite: Bann pasaz dan Labib ki montre bonte ek lamour ki Zeova ena, kapav ed nou bann etidian pou kiltiv bann bon kalite. Nou kapav servi bann verse kouma Psom 139:1-4 ouswa Lik 12:6, 7 pou montre ki kantite Bondie interese ar sakenn parmi nou. Kan nou bann etidian ena vremem rekonesans pou faver Zeova ki personn pa merite, zot lamour ek zot latasman pou Bondie pou ogmante. (Rom. 5:6-8; 1 Zan 4:19) Anplis, kan zot aprann ki zot bann aksion ena enn lefe lor Zeova, kitfwa sa pou pous zot pou fer bann kitsoz ki fer Li kontan ek ki donn Li loner.—Ps. 78:40, 41; Prov. 23:15.
4. Kan nou pe ansegn bann dimounn, kouma nou kapav respekte drwa ki zot ena pou pran zot prop desizion?
4 Zeova pa fors personn pou obeir so bann komannman. Okontrer, Li demann nou pou fer sa kan li montre nou ki kantite nou pou tir profi si nou swiv so konsey. (Iza. 48:17, 18) Nou pou imit Zeova kan nou ansegn lezot dan enn fason ki pou ed zot tir zot prop konklizion. Kan nou bann etidian trouve par zotmem ki zot bizin sanz zot lavi, bann bon rezilta ki zot pou gagne pou dire pandan bien lontan. (Rom. 12:2) Sa pou fer zot osi vinn pli pros ar Zeova, nou Bondie “ki examinn bann leker.”—Prov. 17:3.