Bondie Beni Bann Ki Soutenir Lezot

Boukou dimounn dan lemond pena manze ek enn plas pou reste. Sertin bizin zis enn lespwar pou lavenir. Kouma bann zefor ki nou fer pou ed sa bann dimounn-la kapav fer nou gagn faver ek benediksion Bondie?

SEKI BANN LEKRITIR SAKRE DIR

“Seki ed enn ti dimounn pe pret Zeova, ek seki li fer, Zeova pou rann li.”​—PROVERB 19:17.

KI SAVEDIR ED ENN DIMOUNN KI BIZIN LED?

Zezi ti rakont enn zistwar: bann voler ti atak enn misie ek zot ti les li demi mor. (Lik 10:29-37) Lerla, enn etranze ti arete ek ti pran swin sa misie ki ti bien blese la. Sa etranze-la ti fer sa, mem si li pa ti mem ras ki sa misie-la.

Sa etranze-la ti ena boukou bonte. Kifer? Parski kan sa misie-la ti dan enn sitiasion difisil, li pa ti zis pran li swin ek ed li lor plan materyel, me li ti osi rekonfort li ek donn li enn soulazman.

Ki sa zistwar-la aprann nou? Zezi ti pe montre ki nou bizin fer tou seki nou kapav pou ed bann ki bizin led. (Proverb 14:31) Bann Lekritir Sakre ansegn nou ki biento Bondie pou tir lamizer ek soufrans. Kitfwa ou pe demann oumem, kan ek kouma Bondie pou fer sa? Prosin lartik pou koz lor bann benediksion ki ou Kreater ki bien kontan ou inn garde pou ou.