Bann Bienfe ki Nou Gagne Gras-a Sakrifis Zezi
Enn fwa par an, bann Temwin Zeova dan lemond antie ek bann milyon dimounn ki zot invite, zwenn ansam pou komemor lamor Zezi. Zot fer sa parski zot obeir komannman ki Zezi ti donn so bann disip. (Lik 22:19) Sa levennman-la ed nou pou konpran linportans sakrifis ki Zezi inn fer, kan li’nn donn so lavi pou bann dimounn. Sa pou osi montre nou kouma sakrifis Zezi kapav ena enn lefe lor nou lavi aster-la ek dan lavenir.—Zan 3:16.
Mem si ou’nn asiste Komemorasion Lamor Zezi sa lane-la ouswa non, kouma ou kapav gagn bann bienfe gras-a sakrifis Zezi? Zezi ti ansegn nou ki ena de kitsoz inportan ki nou bizin fer:
1. Aprann konn Bondie ek Zezi. Kan Zezi ti priye so Papa ki dan lesiel, li ti dir: “Ala seki vedir lavi eternel: ki zot aprann konn twa, sel vre Bondie, ek sa kikenn ki to finn avoye la, Zezi Kris.”—Zan 17:3.
2. Met an pratik seki nou aprann. Zezi ti montre dan enn fason kler ki nou bizin met an pratik seki li’nn ansegne. Par exanp, dan so Sermon lor Montagn, li ti felisit bann dimounn ki “tann [so] bann parol ek met zot an pratik.” (Lik 6:46-48) Ek enn lot fwa li ti dir: “Si zot konn sa bann kitsoz-la, zot pou ere si zot fer sa.”—Zan 13:17.
Eski ou ti pou kontan aprann plis lor Bondie ek Zezi? Eski ou anvi gagn bann konsey pou ed ou met an pratik seki ou pou aprann? Anou get de-trwa kitsoz ki kapav ed ou.
Enn letid Labib
Nou letid Labib gratis inn ed boukou dimounn pou konpran Labib ek pou met an pratik seki Labib ansegne.
Pou aprann plis lor sa letid-la, al lor nou paz Led pou Enn Letid Labib.
Get video Kouma Ou Letid Labib Pou Deroule? pou trouve kouma enn letid Labib avek bann Temwin Zeova deroule.
Renion bann Temwin Zeova
Bann Temwin Zeova zwenn de fwa par semenn dan zot Lasal Renion. Pandan sa bann renion-la, nou examinn seki Labib ansegne ek nou gete kouma nou kapav aplik sa dan nou lavi.
Ninport kisann-la kapav asiste sa bann renion-la, ou pa oblize enn Temwin Zeova. Dapre sitiasion ki ena dan ou landrwa, ou kapav asiste renion dan nou bann lasal ouswa par video-konferans.
Get video Ki Pase dan Lasal Bann Temwin Zeova? pou gagn enn lide kouma nou bann renion deroule.
Al lor nou paz Renion Bann Temwin Zeova pou trouv enn plas kot fer renion pre kot ou reste.
Bann lartik ek bann video lor Internet
Lor nou sit Internet ena boukou lartik ek video ki kapav ed ou pou aprann plis lor bann lansegnman Zezi ek kifer sakrifis ki li’nn fer inportan pou ou.
Par exanp, pou aprann kouma lamor enn sel zom kapav fer bann milyon dimounn gagn bann bienfe, ou kapav lir bann lartik “Kouma Eski Zezi Sov Nou?” ek “Kifer Zezi Inn Soufer ek Mor?” ouswa get video Kifer Zezi Inn Mor?