“Bann Kitsoz Extraordiner Ki Bondye Finn Fer” Pus Nu pu Azir

“Nu tann zot koz lor bann kitsoz extraordiner ki Bondye finn fer, dan nu lang.”—AKT 2:11.

1, 2. Pandan Lapantkot lane 33 N.L., ki kitsoz extraordiner ti arive dan Zerizalem?

ENN gramatin, ver lafin Avril, dan lane 33 N.L., enn kitsoz extraordiner ti ariv enn grup misye ek madam. Sa bann dimunn la zot ti bann disip Zezi Kris. Zot ti rasanble dan enn lakaz dan Zerizalem. “Enn ku enn tapaz kuma enn divan for ti sorti dan lesyel, ek li ti ranpli sa lakaz kot zot ti pe asize la net. Ek zot ti kumans truv dife dan form bann lalang . . . , ek zot tu ti ranpli ar lespri sin ek ti kumans koz dan diferan lang.”—Akt 2:2-4, 15.

² Enn gran laful ti rasanble devan sa lakaz la. Dan sa laful la ti ena bann Zwif ki ti ne dan lezot peyi, “bann zom ki ti ena lakrint pu Bondye” ki ti’nn vinn Zerizalem pu selebre fet Lapantkot. Zot ti etone parski sakenn parmi zot ti tann bann disip koz dan zot lang “lor bann kitsoz extraodiner ki Bondye finn fer.” Sa bann disip la ti res dan Galile, alor kuma eski zot ti koz sa bann langaz la?—Akt 2:5-8, 11.

3. Pandan Lapantkot, ki mesaz lapot Pyer ti donn laful ki ti prezan?

³ Lapot Pyer ti enn parmi sa bann Galilein la. Li ti explike ki, detrwa semenn avan, bann move dimunn ti tuy Zezi Kris. Me, Bondye ti relev so Garson parmi bann mor. Apre sa, Zezi ti aparet ar buku so bann zapot, parmi ti ena Pyer ek lezot ki ti la dan sa laful la. Zis dis zur avan, Zezi ti’nn mont dan lesyel. Se limem ki ti vers lespri sin lor so bann disip. Eski sa levennman la ti ena kit sinifikasyon pu bann ki ti pe selebre Lapantkot? Wi, byinsir. Lamor Zezi ti uver semin pu zot gayn pardon pu zot bann pese ek “don lespri sin gratis.” Pu zot gayn sa zot ti bizin ena lafwa an li. (Akt 2:22-24, 32, 33, 38) Donk, ki zot ti fer kan zot ti tann “bann kitsoz extraordiner ki Bondye finn fer”? Ek kuma eski seki ti pase la, ed nu pu estim nu prop servis pu Zeova?

Motive pu Azir

4. Ki profesi Yoel ti realize zur Lapantkot 33 N.L.?

⁴ Deswit kuma bann disip dan Zerizalem ti gayn lespri sin, zot ti kumans anons bon nuvel delivrans ar lezot. Zot ti kumanse avek sa laful ki ti rasanble sa gramatin la. Zot predikasyon ti realiz enn profesi remarkab. Yoel, garson Petuel ti ekrir sa profesi la 800 an avan. “Mo pu vers mo lespri lor tu kalite dimunn, ek vremem zot bann garson ek zot bann tifi pu anons bann profesi. Zot bann zom ki aze pu fer bann rev. Zot bann zenn zan pu truv bann vizyon. Ek dan sa bann zur la, mo pu vers mo lespri, mem lor bann serviter ek lor bann servant. . . avan ki gran zur Zeova ki fer per vini.”—Yoel 1:1; 2:28, 29, 31; Akt 2:17, 18, 20.

5. Dan ki sans bann Kretyin premye syek ti anons bann profesi? (Get not)

⁵ Eski sa vedir ki Bondye ti anvi ki tu dimunn dan enn zenerasyon, mal ek femel tulede, vinn bann profet? Eski Li ti anvi ki zot vinn parey kuma David, Yoel, ek Debora, ek apre servi zot pu anons bann levennman ki pu arive plitar? Non. Lespri Zeova ti pus ‘bann garson ek tifi, bann serviter ek servant’ Kretyin pu anons “bann kitsoz extraordiner” ki Zeova ti fer ek ti pu fer ankor. Donk se dan sa sans la ki zot ti pu anons bann profesi. Zot ti pu servi kuma bann port parol Bondye.a Me, kuma sa laful la ti reazir?—Ebre 1:11, 2.

6. Ki buku dimunn ki ti dan laful ti motive pu fer kan zot ti tann diskur Pyer?

⁶ Apre ki laful ti tann lexplikasyon Pyer, buku parmi sa bann dimunn la ti motive pu azir. Zot “ti aksepte laverite avek tu zot leker” ek zot “ti batize ek sa zur la preske trwa mil dimunn ti azute dan zot grup.” (Akt 2:41) Antan ki bann Zwif depi nesans ek bann Zwif konverti, zot ti deza ena enn konesans debaz lor bann Lekritir. Sa konesans la, ek lafwa dan seki zot ti aprann ar Pyer, ti form enn baz pu ki zot batize “lor non Papa, lor non Garson ek lor non lespri sin.” (Matye 28:19) Apre zot batem “zot finn kontiyn aprann ar bann zapot.” An mem tan, zot ti kumans partaz zot nuvo lafwa ar lezot. Dayer, “zur apre zur, zot ti la dan tanp ansam, . . . zot ti pe donn Bondye loner ek zot ti pe gayn faver devan lepep.” Rezilta sa laktivite predikasyon la: “Tulezur Zeova ti pe kontiyne azut avek zot grup bann ki ti pe sape.” (Akt 2:42, 46, 47) Dan buku peyi kot sa bann nuvo disip la ti viv, bann kongregasyon Kretyin ti forme vit-vit. Pena dut ki, omwin an parti, se grasa zot bann gran zefor pu pres “bon nuvel” kan zot finn return kot zot, ki ti ena sa lakrwasman la.—Kolosyin 1:23.

Parol Bondye Ena Puvwar

7. (a) Ki kitsoz ki atir bann dimunn dan tu bann nasyon ver lorganizasyon Zeova zordi? (b) Eski u truve ki kapav ena ankor lakrwasman dan lemond ek dan u peyi? Explike. (Get not)

⁷ Ki nu kapav dir lor bann ki anvi vinn serviter Bondye zordi? Zot usi zot bizin etidye Parol Bondye avek buku latansyon. Amezir ki zot fer sa, zot aprann konn Zeova kuma enn Bondye ki “ena pitye ek konpasyon, ki pa ankoler vit, ek ki ena enn labondans lamur fidel ek laverite.” (Egzod 34:6; Akt 13:48) Zot aprann lor bon laranzman ranson ki Zeova finn fer atraver Zezi Kris, ki finn vers so disan pu pirifye zot ar tu bann pese. (1 Zan 1:7) Zot rekonesan usi kan zot aprann ki Bondye ena lintansyon pu ‘resisit bann dimunn drwat ek bann dimunn ki pa drwat.’ (Akt 24:15) Lamur pu Lasurs sa “bann kitsoz extraordiner” la ranpli zot leker. Zot santi zot motive pu pres sa bann laverite ki ena valer la. Apre sa zot vinn bann serviter Bondye ki angaze ek ki batize ek zot kontiyn “grandi dan konesans egzak Bondye.”b—Kolosyin 1:10b; 2 Korintyin 5:14.

8-10. (a) Kuma eski lexperyans enn ser Kretyin donn nu prev ki Parol Bondye “ena puvwar”? (b) Ki sa lexperyans la montre nu lor Zeova ek fason ki li tret so bann serviter? (Egzod 4:12)

⁸ Konesans ki bann serviter Bondye gayne atraver zot letid Labib li pa enn konesans lao-lao. Sa konesans la tus zot leker, sanz zot fason panse, ek li res andan dan zot leker. (Ebre 4:12) Par egzanp, enn madam ki ti apel Camille, ti anploye kuma enn kikenn ki pran swin bann dimunn aze. Enn parmi bann dimunn ki li ti okipe ti apel Martha, ek li ti enn Temwin Zeova. Depi ki Martha ti byin afekte par enn maladi ki ti fer li perdi so memwar, li ti bizin enn kikenn pu ed li tuletan. Ti bizin tuletan fer li rapel ki li bizin manze, ek mem pu aval so manze. Me selman, ena enn kitsoz ki ti grave pu tuletan dan lespri Martha. Nu pu al gete ki ete sa.

⁹ Enn zur Martha finn truv Camille pe plore parski li ti sagrin akoz bann problem personel. Martha ti may Camille ek li ti invit li pu etidye Labib avek li. Me kuma eski enn dimunn ki dan kondisyon Martha, ti kapav fer enn letid Labib? Wi, li ti kapav! Mem si Martha ti perdi enn bon parti so memwar, li pa ti’nn bliye so gran Bondye. Li pa ti’nn bliye bann laverite presye ki li ti’nn aprann dan Labib. Pandan letid, Martha ti demann Camille lir sak paragraf, get bann pasaz Labib ki site ek lir kestyon ki ena anba. Apre, li ti demann li pu reponn kestyon la. Sa finn kontiyne pandan inpe letan, ek malgre bann andikap Martha, Camille ti ogmant so konesans Labib. Martha ti realize ki Camille ti bizin gayn kontak ar lezot dimunn ki interese pu servi Bondye. Akoz sa, li ti donn Camille enn rob ek enn per sulye pu ki li kapav abiye kuma bizin kan li asiste so premye reynion dan Lasal DiRwayom.

¹⁰ Camille ti byin tuse par lintere ranpli ar lamur, legzanp ek konviksyon ki Martha ti ena. Martha ti’nn bliye preske tu kitsoz exepte seki li ti aprann dan Labib. Akoz sa, Camille finn tir konklizyon ki seki Martha ti pe sey anseyn li dan Labib ti enn kitsoz ki ti byin-byin inportan pu so lavi. Plitar, kan Camille ti’nn gayn transfer pu al travay dan enn lot plas kot pran swin bann dimunn aze, li’nn realize ki li ti ler pu li azir. Premye lokazyon ki li’nn gayne, li finn met rob ek sulye ki Martha ti’nn donn li ek li’nn al dan enn Lasal DiRwayom. La, li finn demann enn letid Labib. Camille finn fer bann bon progre ek li finn batize.

Motive pu Reflekte Bann Prinsip Zeova

11. Apart nu predikasyon ki nu fer avek buku kuraz, kuma eski nu kapav montre ki mesaz Rwayom finn motiv nu?

¹¹ Parey kuma Martha, ek asterla Camille, zordi, ena plis ki sis milyon Temwin Zeova ki pe pres “bon nuvel lor rwayom” partu lor later. (Matye 24:12; 28:19, 20) Parey kuma bann Kretyin premye syek, zot byin motive par “bann kitsoz extraordiner ki Bondye fi’nn fer.” Zot rekonesan ki zot ena privilez pu port non Zeova ek ki Li finn donn zot so lespri. Akoz sa, zot fer tu zefor “pu ki zot mars enn fason ki merite pu Zeova pu fer Li plezir net.” Zot aplik so bann prinsip dan tu domenn zot lavi. Enn sa bann domenn la se kan zot respekte bann prinsip Bondye lor labiyman ek laparans.—Kolosyin 1:10a; Tit 2:10.

12. Ki konsey presi lor labiyman ek laparans nu truve dan 1 Timote 2:9, 10?

¹² Wi, Zeova finn etabli bann prinsip lor nu laparans personel. Lapot Pol montre sertin kitsoz ki Bondye demann nu dan sa domenn la. “Mo ule ki bann fam aranz zot labiyman dan enn fason byin ordone, avek modesti ek bon zizman, me pa avek bann stil tres seve ek avek lor, uswa perl uswa avek bann linz ki kut ser, me dan enn fason ki apropriye pu bann fam ki dir ki zot ena lakrint pu Bondye setadir par bann bon travay.”c Ki nu aprann par sa bann parol la?—1 Timote 2:9, 10.

13. (a) Ki sa vedir “aranz zot labiyman dan enn fason byin ordone”? (b) Kifer eski nu kapav dir ki li pa difisil pu swiv bann prinsip Zeova?

¹³ Bann parol Pol montre ki bann Kretyin bizin “aranz zot labiyman dan enn fason byin ordone.” Fode pa ki zot ena enn laparans debraye. Zot tu, mem bann ki pov, kapav respekte sa prinsip la. Zot kapav fer sir ki zot linz li an ord, prop, ek prezantab. Anu pran enn legzanp. Sak lane bann Temwin dan enn peyi dan l’Amerique du sud, mars plizir kilomet atraver bann gran lafore ek apre sa zot vwayaz pandan plizir lertan par ti bato pu zot kapav asiste zot lasanble distrik. Li arive byin suvan ki pandan sa vwayaz la, kikenn tom dan larivyer. Li kapav arive usi ki zot linz may dan enn tuf pikan ek desire. Donk, kan zot ariv dan landrwa kot pu fer lasanble la, suvan zot inpe debray-debraye. Ala kifer zot pran letan pu kud zot bann buton, pu repar bann fermtirekler, pu lav ek repas zot bann linz ki zot pu mete pu lasanble. Zot byin apresye linvitasyon ki zot finn gayne pu manz lor latab Zeova, ek zot ule abiy zot kuma bizin.

14. (a) Ki sa vedir abiye avek “modesti ek bon zizman”? (b) Si nu’le abiy nu enn fason ki montre ki nu ‘ena lakrint pu Bondye,’ ki nu bizin fer?

¹⁴ Pol montre ankor ki nu bizin abiy nu avek “modesti ek bon zizman.” Sa vedir ki nu laparans bizin pa kas lizye lezot, egzazere, provokan, transparan uswa dekolte, uswa ki tro alamod. Anplis, nu bizin abiy nu enn fason ki montre ki nu ‘ena lakrint pu Bondye.’ Sa fer nu reflesi, pa vre? Eski kan nu asiste bann reynion kongregasyon nu abiy nu byin, kuma bizin, me dan bann lezot moman, nu abiy nu kuma nu anvi? Nu bann Kretyin ek bann serviter Bondye 24 lor 24. Donk nu laparans personel bizin tuzur reflekte enn latitid respektab ek onorab. Li kler ki nu bann linz travay ek linz lekol bizin adapte ar seki nu pu fer. Me mem sa, nu bizin abiy nu dan enn fason modes ek diyn. Si nu linz tuletan reflet nu krwayans an Bondye, zame nu pa pu ezite pu donn temwaynaz dan ninport ki lokazyon. Nu pa pu gayn onte akoz nu laparans.—1 Pyer 3:15.

‘Pa Kontan Lemond’

15, 16. (a) Kifer eski li inportan nu evit imit laparans ek labiyman bann dimunn dan lemond? (1 Zan 5:19) (b) Pu ki rezon nu bizin evit bann lamod egzazere an seki konsern labiyman ek laparans?

¹⁵ Bann parol ki truv dan 1 Zan 2:15, 16 donn nu ankor enn konsey lor swa ki nu fer dan domenn labiyman ek laparans. Nu lir: “Pa kontan lemond, ni bann kitsoz ki dan lemond. Si enn kikenn kontan lemond, lamur nu Papa pa dan Li, parski tu kitsoz ki dan lemond—dezir laser, dezir lizye, ek letalaz bann kitsoz ki nu ena—tusala pa sorti kot nu Papa, me sorti dan lemond.”

¹⁶ Sa konsey la tom byin! Zordi, lezot met buku plis presyon lor nu. Fode pa nu les lemond kontrol nu swa lor linz ek laparans. Pandan sa bann lane ki finn pase la, bann stil labiyman ek laparans finn degrade. Mem, labiyman ek laparans bann dimunn ki travay dan bann biro ek dan bann biznes, li pa tuletan enn bon model pu bann Kretyin. Sa li enn lot rezon kifer nu bizin tuletan gard byin dan nu lespri ki li inportan pu “aret pran legzanp lor sa lemond la.” Lerla, nu pu viv dapre bann prinsip Bondye, ek nu pu ‘fer lanseynman Bondye, nu Sover, paret zoli dan tu kitsoz.’—Romin 12:2; Tit 2:10.

17. (a) Kan nu pe pans pu aste enn linz uswa swazir enn stil, ki bann kestyon nu bizin poz nu? (b) Kifer eski bann sef fami bizin pran kont laparans bann manb zot fami?

¹⁷ Avan u deside sipa u pu aste enn linz uswa non, li bon u demann umem: ‘Kifer eski sa stil la atir mwa? Eski ena kit vedet renome ki mo byin kontan ki met sa kalite linz la? Eski se stil bann manb enn grup ki ankuraz lespri lindepandans ek rebel?’ Nu bizin usi egzaminn linz la byin. Si se enn rob uswa enn zip, ki longer li ete? Ki so model? Eski linz la li sinp, apropriye, ek respektab, uswa li kol-kole, provokan, debray-debraye? Demann umem, ‘Si mo met sa linz la, eski sa kapav sok lezot?’ (2 Korintyin 6:3, 4) Kifer eski nu bizin pran sa kont? Parski Labib dir: “Mem Kris pa ti fer limem plezir.” (Romin 15:3) Bann sef fami Kretyin bizin pran kont laparans bann manb zot fami. Par respe pu Gran Bondye ki zot adore, fode ki bann sef fami pa ezite pu donn bann konsey ferm, me avek bonte kan bizin.—Zak 3:13.

18. Ki kitsoz ki pus u pu pran kont u labiyman ek u laparans?

¹⁸ Mesaz ki nu fer dimunn kone, sorti kot Zeova. Li enn Bondye ki Sin ek diyn. (Izai 6:3) Labib ankuraz nu pu imit Li “kuma bann zanfan ki Li byin kontan.” (Efezyin 5:1) Nu linz ek nu laparans kapav reprezant nu Papa ki dan lesyel an byin uswa an mal. Wi, sirman nu anvi fer so leker kontan!—Proverb 27:11.

19. Kan nu anons “bann kitsoz extraordiner ki Bondye finn fer” ar lezot dimunn, ki byinfe nu kapav gayne?

¹⁹ Apre ki u finn aprann lor “bann kitsoz extraordiner ki Bondye fi’nn fer,” ki u santiman? Wi, se enn gran privilez ki nu finn aprann laverite! Nu gayn pardon pu nu bann pese parski nu ena lafwa dan disan ki Zezi Kris finn verse. (Akt 2:38) Rezilta: nu kapav koz fran ar Bondye. Bann dimunn ki pena okenn lespwar, per lamor, me nu-nu pa per. Okontrer, Zezi donn nu lasirans ki enn zur “tu bann ki dan bann tom pu tann so lavwa ek zot pu sorti.” (Zan 5:28, 29) Zeova finn montre Li bon anver nu kan li finn revel nu tu sa bann kitsoz la. Anplis li finn donn nu so lespri. Donk, rekonesans pu tu sa bann don la bizin pus nu pu respekte so bann prinsip siperyer. Sa bizin pus nu’si pu ena enn gran dezir pu donn Li laglwar ek anons sa “bann kitsoz extraordiner” la ar lezot dimunn.

[Not anba paz]

Kuma U Pu Reponn?

• Ki “bann kitsoz extraordiner” bann dimunn ti tande Lapantkot lane 33 N.L., ek ki zot ti fer?

• Kuma eski enn kikenn vinn enn disip Zezi Kris, ek ki li bizin fer?

• Kifer eski li inportan ki nu vey byin lor nu labiyman ek nu laparans?

• Ki kitsoz nu bizin pran kont kan nu pe deside si enn linz uswa enn lamod bon?

[Zimaz lor paz 29]

Pyer ti anonse ki Zezi ti’nn releve parmi bann mor

[Zimaz lor paz 31]

Eski u laparans onor sa Bondye ki u adore la?

[Zimaz lor paz 32]

Bann paran Kretyin bizin interes zot ar laparans bann manb zot fami