‘Akonpli U Minister Afon’

“Akonpli to minister afon.”—2 TIMOTHÉE 4:5.

1, 2. Mem si tu Kretyin zot bann evanzelizater, ki la Bib demann bann ansyin sirtu pu fer?

ESKI u enn proklamater la bonn nuvel? Si wi, remersye Jéhovah pu sa gran privilez-la. Eski u enn ansyin dan kongregasyon? Se enn lot privilez ankor ki Jéhovah inn donn u. Me selman, zame nu bizin bliye, ki se pa enn grand ledikasyon, ni fasilite parol, ki kalifye nu pu prese, uswa pu vinn enn ansyin dan kongregasyon. Se Jéhovah ki kalifye nu pu la predikasyon, ek si sertin parmi nu, zot ansyin, se parski zot ranpli bann kondisyon rekiz ki mansyone dan la Bib.—2 Corinthiens 3:5, 6; 1 Timothée 3:1-7.

² Tu bann Kretyin ki’nn angaz zot lavi pu servi Jéhovah, zot bann evanzelizater. Me se bann ansyin sirtu ki ena responsabilite pu donn enn bon legzanp dan sa domenn-la. Jéhovah, Jésus Christ, ek bann proklamater dan la kongregasyon usi, remark “travay dir” ki bann ansyin pe fer “dan la parol ek dan lanseynman.” (1 Timothée 5:17; Éphésiens 5:23; Hébreux 6:10-12) Lanseynman enn ansyin bizin tuletan fortifye lezot spirityelman, parski get seki lapot Paul ti dir Timothée, ki ti enn ansyin usi: “Pu ariv enn lepok kot zot pa pu siport lanseynman la verite. Me zot pu swiv zot prop dezir ek zot pu rasanble enn kantite anseynan pu dir zot seki zot zorey ule tande. Zot pu nepli ekut la verite, me zot pu prefer ekut bann zistwar fos. Me twa, gard to bon zizman dan tu kitsoz, siport le mal, fer travay enn evanzelizater, akonpli to minister afon.”—2 Timothée 4:3-5.

3. Ki bizin fer pu ki bann fos lanseynman pas menas spirityalite la kongregasyon?

³ Pu veye ki bann fos lanseynman pa menas spirityalite la kongregasyon, enn ansyin bizin swiv sa konsey lapot Paul-la: “Gard to bon zizman dan tu kitsoz, . . . akonpli to minister afon.” (2 Timothée 4:5) Wi, enn ansyin bizin ‘akonpli so minister afon,’ dan enn fason konple ek an profonder. Enn ansyin ki akonpli so minister afon pu asim byin tu so bann responsabilite, san negliz nanyin ladan. Enn frer kumsa pu fidel mem dan bann ti kitsoz.—Luc 12:48; 16:10.

4. Ki kapav ed nu pu akonplir nu minister afon?

⁴ Pu akonpli nu minister afon, sa pa tuzur demann plis letan, me plito, byin servi letan ki nu ena. Tu bann Kretyin kapav akonpli zot minister kuma bizin, si zot gard enn bon lekilib dan zot lavi. Pu ki enn ansyin kapav pas plis letan dan la predikasyon, li bizin byin organiz so program pu li kone ki kitsoz li pu delege ek kuma pu fer sa. (Hébreux 13:17) Byinsir, enn ansyin ki byin respekte par la kongregasyon, pu fer so par personelman dan la predikasyon, parey kuma Nehémia ti partisip personelman dan rekonstriksyon miray Jérusalem. (Nehémia 5:16) Ek tu serviter Jéhovah bizin partisip regilyerman dan predikasyon la bonn nuvel.—1 Corinthiens 9:16-18.

5. Ki santiman nu bizin ena konsernan nu minister?

⁵ Wi, antan ki proklamater, nu ena lazwa pu pres enn Rwayom ki’nn etabli dan lesyel! Nu konsider sa kuma enn gran privilez pu pres la bonn nuvel partu lor later, avan la fin vini. (Matthieu 24:14) Mem si nu inparfe, sa konsey Paul-la ankuraz nu: “Nu ena sa trezor-la [nu minister] dan bann resipyan later, pu ki sa pwisans ki siperyer a la pwisans normal-la, li sorti ar Bondye, pa ar nu.” (2 Corinthiens 4:7) Wi, si nu kapav byin akonpli nu servis pu Jéhovah—se selman grasa la fors ek la sazes ki Li donn nu.—1 Corinthiens 1:26-31.

Nu Reflet la Glwar Bondye

6. Ki diferans ti ena ant nasyon Israël ek Israël spirityel?

⁶ Apropo bann Kretyin oints, Paul dir ki Bondye inn “kalifye nu pu vinn bann minis enn nuvo lalyans.” Lapot Paul montre diferans ant nuvo lalyans ki Bondye inn fer avek Israël spirityel par lintermedyer Jésus Christ, ek ansyin lalyans la-Lwa ki Li ti fer avek nasyon Israël, par lintermedyer Moïse. Paul azute ki kan Moïse ti desann lor Montayn Sinaï avek les Dix Commandements, so figir ti telman briye ki bann Israélites pa ti kapav fixe li. Me avek letan, enn kitsoz pli grav ti arive: “Zot ti nepli rezonn kuma bizin” ek enn vwal ti kuver zot leker. Me zeneralman, si enn kikenn turn ver Jéhovah sinserman, sa vwal-la anleve. Apre sa, Paul koz lor minister ki bann manb sa nuvo lalyans-la inn gayne. Li dir: “Nu tu, avek enn figir ki pa vwale, nu reflekte la glwar Jéhovah kuma bann laglas.” (2 Corinthiens 3:6-8, 14-18; Exode 34:29-35) Zordi, “lezot brebi” usi ena privilez pu reflet la glwar Jéhovah.—Jean 10:16.

7. Kuma bann dimunn kapav reflekte la glwar Bondye?

⁷ Kuma eski bann dimunn inparfe kapav reflekte la glwar Bondye, alor ki personn pa kapav get So figir ek kontiyn viv? (Exode 33:20) Eh byin, Jéhovah Limem Li ena enn la-glwar extraordiner, ek anplis, Li ena usi enn proze extraordiner pu zistifye so suverennte par so Rwayom. Bann verite ki Jéhovah inn anseyn nu lor sa Rwayom-la, fer parti parmi “bann kitsoz extraordiner ki Bondye finn fer.” Zur la Pentecôte l’an 33 N.L., bann Kretyin ki ti gayn lespri sin, ti kumans pres sa bann verite-la. (Actes 2:11) Avek led lespri sin, zot ti kapav akonpli afon minister ki Bondye ti konfye zot.—Actes 1:8.

8. Ki Paul ti determine pu fer konsernan so minister?

⁸ Paul ti byin determine pu pa les nanyin anpes li akonpli so minister afon. Get seki li ti ekrir: “Etandone ki nu finn gayn sa minister-la grasa mizerikord ki’nn fer nu, nu pa bes lebra, me nu finn rezet bann kitsoz ki fer an kasyet, ek ki fer gayn onte. Nu pa trik personn, ni nu fos Parol Bondye. Okontrer, kan nu fer konn la verite, nu rekomann numem devan Bondye san ki nu sok konsyans lezot.” (2 Corinthiens 4:1, 2) La verite pe manifeste ek lalimyer spirityel pe fane partu, grasa sa minister ki Paul inn mansyone-la.

9, 10. Kuma nu kapav reflet la glwar Jéhovah?

⁹ Get seki Paul ti ekrir pu montre kot lalimyer spirityel ek fizik sorti: “Bondye Limem inn dir: ‘Les lalimyer briye dan nwarte,’ ek Li finn ekler nu leker ek finn fer li briye avek konesans extraordiner Bondye, atraver Christ.” (2 Corinthiens 4:6; Genèse 1:2-5) Etandone ki nu finn gayn enn grand privilez pu vinn bann minis Bondye, anu gard nu pirte spirityel pu nu kapav reflet la glwar Jéhovah kuma bann laglas.

¹⁰ Bann dimunn ki dan nwarte spirityel pa kapav truv la glwar Jéhovah uswa so refle atraver Jésus Christ, le gran Moïse. Me nu, antan ki serviter Jéhovah, nu gayn sa lalimyer-la atraver la Bib ek nu reflekte li lor lezot. Pu ki bann dimunn ki zordi dan nwarte spirityel kapav sape kan Bondye pu amenn la destriksyon, zot bizin gayn lalimyer ki Bondye done. Se pu sa ki, avek lazwa ek zel, nu obeir lord pu les lalimyer briye dan nwarte, pu ki Jéhovah gayn la glwar.

Kondir Bann Letid la Bib—Se enn Fason pu Fer U Lalimyer Briye

11. Ki Jésus ti dir an rapor avek lalimyer ki nu bizin fer briye? Sit enn fason kuma nu kapav fer sa dan nu minister.

¹¹ Jésus ti dir so bann disip: “Zotmem lalimyer lemond. Pa kapav kasyet enn lavil kan li lor enn montayn. Dimunn alim enn lalanp, pa pu met li anba panye, me lor enn portlanp, lerla li ekler tu bann ki dan lakaz. Pareyman, zot usi zot lalimyer bizin briye devan bann dimunn, pu ki bannla truv zot bon travay ek donn la glwar zot Papa ki dan lesyel.” (Matthieu 5:14-16) Grasa nu bon kondwit, lezot dimunn kapav donn Bondye la glwar. (1 Pierre 2:12) Nu ena plizir lokazyon dan nu minister pu fer nu lalimyer briye. Nu lobzektif se pu reflet lalimyer spirityel ki sorti dan Parol Bondye kan nu kondir bann letid Biblik efikas kot bann dimunn. Sa se enn fason inportan pu nu akonpli nu minister afon. Kuma nu kapav kondir bann letid Biblik ki tus leker bann dimunn ki pe rod la verite?

12. Ki lyin ena ant lapriyer ek kondir enn letid la Bib?

¹² Si nu priye Jéhovah dan sa domenn-la, sa montre ki vremem nu anvi kondir bann letid la Bib. Sa montre usi ki nu truv linportans pu ed lezot pu konn Bondye. (Ézékiel 33:7-9) Nu kapav sir ki Jéhovah pu reponn nu lapriyer ek pu beni zefor sinser ki nu fer dan nu minister. (1 Jean 5:14, 15) Me, nu pa priye zis pu truv enn letid. Apre ki nu finn etabli enn letid, nu pu kontiyn priye ek medit lor bann bezwin nu etidyan. Sa pu permet nu kondir enn letid efikas sak fwa ki nu al kot dimunn-la.—Romains 12:12.

13. Ki kapav ed nu pu kondir bann letid la Bib dan enn fason efikas?

¹³ Pu kondir bann letid dan enn fason efikas, li byin inportan ki nu prepar nu byin avan sak letid. Si nu pa santi nu ala-oter, li bon ki nu gete kuma Sirveyan Letid-de-Liv fer sak semenn kan li kondir letid. Detanzantan, nu kapav akonpayn bann proklamater ki’nn gayn bann bon rezilta dan sa domenn-la. Byinsir, nu bizin sirtu egzaminn depre latitid ki Jésus ti ena ek so metod lanseynman.

14. Kuma nu kapav tus leker enn etidyan la Bib?

¹⁴ Jésus ti byin kontan pu fer volonte so Papa ek pu koz Bondye avek lezot. (Psaume 40:8) Li ti ena enn karakter dus ek li ti reysi tus leker bann dimunn ki ti ekut li. (Matthieu 11:28-30) Nu’si, anu fer tu nu posib pu tus leker bann dimunn ki etidye la Bib avek nu. Pu arive fer sa, nu bizin reflesi lor sityasyon dimunn-la sak fwa ki nu prepar letid ki nu pu fer avek li. Par egzanp, si li’nn grandi dan enn kiltir kot dimunn pa krwar dan la Bib, kitfwa nu pu bizin konvink li ki la Bib li vre. Lerla, sirman nu pu bizin lir ek explik li plizir tex la Bib.

Ed Bann Etidyan pu Konpran Bann Ilistrasyon

15, 16. (a) Kuma nu kapav ed enn etidyan ki pa konpran enn ilistrasyon ki ena dan la Bib? (b) Ki nu kapav fer si enn piblikasyon servi enn ilistrasyon ki etidyan-la pa konpran?

¹⁵ Enn etidyan kapav gayn difikilte pu konpran sertin ilistrasyon ki ena dan la Bib. Par egzanp, kitfwa li pa konpran seki Jésus ti ule dir kan li ti koz lor enn lalanp ki lor enn portlanp. (Marc 4:21, 22) Dan sa legzanp-la, Jésus ti pe pans enn ansyin model lalanp ki servi lames. Se enn lalanp ki ti plase lor enn stand spesyal ek li ti ekler enn parti dan lakaz. Pu u kapav byin explik sa ilistrasyon-la, sirman u pu bizin fer bann resers dan liv Étude perspicace des Écritures, lor “Lampe” ek “Porte-Lampe”.a Me, imazinn u satisfaksyon kan u pu donn sa etidyan-la enn lexplikasyon ki pu permet li konpran ek apresye sa ilistrasyon-la!

¹⁶ Asterla, li posib usi ki etidyan-la pa konpran enn ilistrasyon ki’nn servi dan piblikasyon ki li pe etidye. Pran letan pu explik li ilistrasyon-la, uswa servi enn lot ilistrasyon pu fer li konpran lide ki ena deryer sa. Par egzanp, pu montre ki dan enn maryaz li inportan pu ena enn bon partner ek enn bon korperasyon, enn piblikasyon kapav sit sa ilistrasyon-la: enn akrobat pe balanse lor enn trapez, ek lerla li larg trapez-la, ek li fer enn lot trapezis atrap li. Si u etidyan pa konpran sa ilistrasyon-la, u kapav pran sa legzanp-la: Manyer ki bann travayer fer lasenn pu debark bann bwat lor enn bato.

17. Ki nu aprann par fason ki Jésus ti servi bann ilistrasyon?

¹⁷ Pu kapav ranplas enn ilistrasyon par enn lot, sa demann enn bon preparasyon. Selman, se enn fason pu montre enn lintere partikilye pu nu etidyan. Jésus ti servi bann ilistrasyon sinp pu explik bann kitsoz difisil. Nu truv sa dan so Sermon lor Montayn, ek la Bib montre ki so lanseynman ti ena enn bon lefe lor bann dimunn ki ti pe ekut li. (Matthieu 5:1–7:29) Si Jésus ti explik bann kitsoz avek pasyans, se parski li ti interese sinserman avek lezot.—Matthieu 16:5-12.

18. Ki konsey nu gayne an rapor avek bann verse ki mansyone an referans dan nu piblikasyon?

¹⁸ Nu lintere pu lezot pus nu pu ‘rezonn lor bann tex Biblik.’ (Actes 17:2, 3) Pu nu fer sa, nu pu bizin etidye, priye ek servi byin bann piblikasyon ki “l’intendant fidèle” donn nu. (Luc 12:42-44) Par egzanp liv Konesans Ki Amenn ver Lavi pu Tuletan sit buku tex la Bib.b Me akoz plas, sertin finn zis mansyone an referans. Kan nu kondir enn letid, li inportan ki nu lir ek nu explik omwin sertin sa bann tex-la. Apre tu, nu lanseynman baze sirtu lor Parol Bondye ki ena enn gran puvwar. (Hébreux 4:12) Fer referans ar la Bib tutlong letid, ek servi otan ki posib bann verse ki ena dan bann paragraf. Ed etidyan-la pu kone seki la Bib dir lor enn size an partikilye uswa lor enn sertenn fason azir. Fer zefor pu montre li kuma li pu tir profi kan li obeir Bondye.—Isaïe 48:17, 18.

Poz Bann Kestyon Ki Fer Reflesi

19, 20. (a) Kan nu kondir enn letid la Bib, kifer nu bizin poz bann kestyon pu konn lopinyon nu etidyan? (b) Ki nu kapav fer si nu bizin donn plis lexplikasyon lor enn size an partikilye?

¹⁹ Jésus ti konn poz bann kestyon ki ti fer dimunn rezone. (Matthieu 17:24-27) Pareyman, san ki nu anbaras nu etidyan, nu’si nu kapav poz li bann kestyon pu konn so lopinyon. Kitfwa nu pu remarke ki li ankor krwar dan bann lanseynman ki pa Biblik, kuma la Trinite. Sapit 3 dan liv Konesans, explike ki mo “Trinite” pa truv dan la Bib. Liv-la sit bann verse ki montre ki Jéhovah ek Jésus, zot diferan ek ki lespri sin, pa enn personn, me se lafors aktif Bondye. Li posib ki apre ki nu’nn lir ek explik sa bann verse-la, sa pu sifi pu konvink etidyan-la. Me ki nu pu fer si nu bizin donn plis explikasyon? Nu kapav rezerv enn moman apre prosin letid, pu diskit lor sa size-la dan enn lot piblikasyon, kuma brosir Doit-on croire à la Trinité ? Par la swit, nu kapav kontiyn letid dan liv Konesans.

²⁰ Sipoze ki nu pe koz lor enn size delika, par egzanp lor sigaret, ek etidyan-la rann enn repons ki etonn nu uswa ki desevwar nu. Dan sa ka-la, nu kapav propoz pu kontiyn letid ek koz lor sa size-la plitar. Si nu kone ki etidyan-la ankor fime, nu kapav al fer bann resers lor la dan bann piblikasyon, ek sa kapav ed li pu progrese spirityelman. Amezir ki nu fer zefor pu tus leker nu etidyan, nu kapav priye Jéhovah pu ed li fer progre.

21. Ki kapav arive si nu adapte nu metod lanseynman ar bann bezwin nu etidyan?

²¹ Avek enn bon preparasyon ek led Jéhovah, nu pu arive adapte nu metod lanseynman ar bann bezwin nu etidyan. Amezir ki letan pase, nu kapav ed li pu devlop enn profon lamur pu Bondye. Nu kapav arive fer li respekte ek apresye lorganizasyon Jéhovah. Li vremem enn gran plezir pu nu, kan bann etidyan la Bib rekonet ki ‘Bondye vremem parmi nu’! (1 Corinthiens 14:24, 25) Donk, anu kondir bann letid la Bib efikas ek fer tu nu posib pu ed bann dimunn vinn bann disip Jésus.

Anu Apresye Valer Sa Trezor-La

22, 23. Ki nu bizin pu akonpli nu minister afon?

²² Pu akonpli nu minister afon, nu bizin kont lor lafors ki Bondye done. An rapor avek nu minister, Paul ti ekrir bann Kretyin oints: “Nu ena sa trezor-la dan bann resipyan later, pu ki sa pwisans ki siperyer a la pwisans normal-la, li sorti ar Bondye, pa ar nu.”—2 Corinthiens 4:7.

²³ Ki nu enn Kretyin oint uswa enn manb “lezot brebi,” nu kuma bann resipyan later byin frazil. (Jean 10:16) Me purtan, Jéhovah kapav donn nu la fors neseser pu asim nu responsabilite malgre ninport ki presyon ena lor nu. (Jean 16:13; Philippiens 4:13) Donk, anu met tu nu konfyans an Jéhovah, anu kontiyn apresye valer nu servis, ek anu akonpli nu minister afon.

[Notes]

Kuma U Pu Reponn

• Kuma bann ansyin kapav akonpli zot minister afon?

• Kuma nu kapav vinn pli efikas kan nu kondir bann letid la Bib?

• Ki u pu fer si enn etidyan la Bib pa konpran enn ilistrasyon uswa si li bizin plis ranseynman lor enn size an partikilye?

[Zimaz lor paz 18]

Bann ansyin anseyne dan la kongregasyon ek form lezot dan la predikasyon

[Zimaz lor paz 20]

Kondir bann letid la Bib efikas, se enn fason pu fer nu lalimyer briye