Kifer pena l’unité mondial?
“Pou premier fois depuis Deuxieme Guerre mondial, le monde entier finn uni. . . . Alors le monde kapav saisi sa l’occasion-la pou realise promesse ki li finn faire depuis longtemps concernant nouveau lé-monde.”
ENN president États-Unis ti faire sa remark-la vers la fin 20eme siecle. Sa lepok-la, maniere le monde ti pé deroulé ti faire croire ki ti pré pou reussi gagne l’unité mondial. Bann gouvernement ki ti bann dictature ti tombé enn apré lot. Mur Berlin ti tombé, ek sa ti mark commencement enn nouveau period pou bann pays l’Europe. L’Union soviétique, ki dapré beaucoup dimoune, ti enn parmi bann pays ki ti responsable pou bann la-guerre dan le monde, ti arrete existé, ek sa ti etonne le monde entier. La guerre froide ti fini, ek ti ena bann discussion ki ti promette bon resultat pou arrete faire ek servi bann zarme, mem bann zarme nucleaire. Li vrai ki la guerre ti eclaté dan golfe Persique, mais sa ti parette zis enn problem temporaire ki ti pousse enn bon partie le monde pou decide encore plus pou etabli enn nouveau lé-monde kot ena la paix.
Pa zis dan le monde politik ki ti trouve bann signe positif, mais aussi dan lezot domaine la vie. Niveau la vie ti pé amelioré dan beaucoup pays. Bann progré dan domaine la medecine ti permette bann docteur realise bann kitsoz ki ti kapav parette couma bann mirak zis dé-trois dizaine l’année avant. Croissance economik dan beaucoup pays ti pé al tellement vite ki li ti parette ki prosperité mondial pa ti loin. Coumadir tou kitsoz ti pé al dan bon direction.
Zordi, pa trop beaucoup l’année apré, nou pa kapav empeche-nou demandé: ‘Ki finn arrivé? Kot sa l’unité mondial ki zot ti promette-la?’ Le monde parette plutot pé al dan direction contraire. Asterla preské toulé-jour, nou tann koz bann attentat-suicide, bann attak terrorist, bann rapport concernant l’augmentation bann zarme ki cause grand-grand destruction, ek bann lezot developpement ki troublé nou. Pli allé, sa bann l’evenement-la parette pé amenn le monde loin ar l’unité. Dernierement, enn dimoune ki bien reconnu dan domaine finance ti dire: “Nou’nn tombe dan piege violence ki pa oulé fini, ek ki pli allé, pé augmenté.”
L’unité mondial ou-soit division bann pays?
Kan l’Organisation des Nations Unies ti formé, enn so bann l’objectif ti “pou developpe parmi bann nation bann relation amical, ki basé lor respé pou sa principe-la: droit egal pou tou dimoune, ek droit pou choisir zot prop gouvernement.” Apré environ 60 an, eski zot finn reussi realise sa l’objectif-la? Non! Au lieu ki zot pé mazinn “bann relation amical,” zot pé plus mazinn sa l’expression “droit pou choisir zot prop gouvernement.” Bann peuple ek bann communauté racial ki pé lutté pou vinn bann pays independant, finn divise le monde encore plus. Kan Nations Unies ti formé, ti ena 51 pays ki ti membre. Zordi ena 191.
Couma nou finn trouvé, vers la fin bann l’année 1990, ti ena l’espoir pou ena enn lé-monde kot ena l’unité. Mais depuis sa, l’espoir finn tombe dan de l’eau. Nou finn trouvé couma doucement-doucement le monde pé divisé. Yougoslavie ki finn separe en plusieurs pays avek beaucoup violence, bann la-guerre entre la Tchétchénie ek la Russie, la guerre en Iraq, ek massacre ki pé contigné dan Proche-Orient—tousala finn montré ki pli allé, pena l’unité.
Pena doute ki bann zeffort ki finn faire pou ena la paix ti bien sincere. Malgré sa, l’unité mondial parette enn kitsoz ki impossible. Beaucoup demann-zot: ‘Kifer li aussi difficile pou arrivé gagne l’unité mondial? Kot-sa le monde-la pé allé?’
[Zimage remerciement photo page 3]
AP Photo/Lionel Cironneau
Arlo K. Abrahamson/AFP/ Getty Images