Oui, ou kapav comprend la Bible!

LA BIBLE faire nou konn bann verité important ki sorti kot Bondié. Li explik nou kifer Bondié finn crée nou, kifer ena souffrance lor la terre, ek ki pou arrive bann dimoune dan l’avenir. Li explik nou couma nou kapav trouve bonheur, couma nou kapav faire bann camarade, ek couma nou kapav resoude nou bann problem. Pli important encore, la Bible faire nou konn nou Createur, nou Papa ki dan le ciel, Jéhovah. Kan nou aprann konn tou sa, sa faire nou gagne la joie ek donne nou la-vie enn sens.

Dapré la Bible, kan nou aprann konn Bondié coumadir nou pé nourri nou-mem. Jésus ti dire: “Enn kikenn bizin vive, pa zis avek di-pain, mais avek tou parole ki sorti dan la bouche Jéhovah.” (Matthieu 4:4; Hébreux 5:12-14) Nou bizin mangé toulé-jour pou nou contigne vive. Pareil, nou bizin lire Parole Bondié regulierement pou nou kapav gagne la vie eternel ki Bondié finn promette.

Nou content mangé parski Jéhovah finn crée nou coumsa ek parski sa li important pou nou contigne vive. Mais ena aussi enn lot kitsoz ki nou bizin prend compte si nou’lé vive heureux. Jésus ti dire: “Heureux bann ki reconette ki zot pauvre lor plan spirituel.” (Matthieu 5:3) Nou kapav satisfaire sa besoin spirituel-la ek vive heureux. Couma? Kan nou arrivé comprend Parole Bondié.

Li vrai ki certain trouve sa difficile pou comprend la Bible. Par exemple, kitfois ou pou bizin l’aide pou comprend bann verset ki koz lor bann coutume ki ou pa koné, ou-soit bann expression ki ena enn sens symbolik. Ena aussi bann prophetie ki finn ecrire dan enn langage symbolik, et pou nou arrivé comprend sa, nou pou bizin compare li avek bann lezot verset la Bible ki koz lor mem sujet. (Daniel 7:1-7; Révélation 13:1, 2) Malgré sa, ou kapav comprend la Bible. Couma nou kapav sur ki li possible pou nou comprend la Bible?

Tou dimoune kapav comprend la Bible

La Bible li Parole Bondié. Bondié faire nou konn so volonté dan la Bible. Eski Bondié ti pou donne nou enn livre ki impossible pou comprend, ou-soit enn livre ki zis bann dimoune bien eduqué ki ti pou kapav comprend? Non, Jéhovah pa ti pou kapav injuste coumsa! Jésus Christ ti dire: “Ki papa parmi zot, si so garson demann li enn poisson, pou kapav donne li enn serpent au lieu enn poisson? Ou-soit si li demann enn dizef, pou kapav donne li enn scorpion? Alors, si zot, mauvais couma zot été, zot konn donne zot zenfant seki bon, ki quantité encore nou Papa ki dan le ciel pou donne l’esprit saint bann ki demann Li!” (Luc 11:11- 13) Alors, ou kapav sur ki li possible pou ou comprend la Bible, ek si ou demann Bondié sincerement, Li pou donne ou l’aide ki bizin pou ou comprend So Parole. En realité, mem bann zenfant kapav comprend bann l’enseignement principal ki ena dan la Bible!—2 Timothée 3:15.

Mem si nou bizin faire zeffort pou comprend la Bible, sa pou motive nou ek pou fortifié nou si nou faire sa. Apré ki li ti ressuscité, Jésus ti apparette ar deux so bann disciple ek li ti explik zot bann prophetie biblik. Nou kapav lire dan l’evangile Luc: “Li ti interprete tou bann kitsoz dan Parole sacré ki ti koz lor li, a partir Moïse ek tou bann prophete.” Resultat? Sa soir-la, kan bann disciple ti pé reflechi lor seki zot ti’nn aprann, zot ti dire: ‘Eski nou leker pa ti pé brulé kan li ti pé koz avek nou lor chemin, letan li ti pé explik nou clairement seki bann Parole sacré finn dire?’ (Luc 24:13-32) Surement, kan zot ti comprend Parole Bondié, sa deux disciple-la ti content parski sa ti fortifié zot la-foi dan bann promesse ki Bondié finn faire, ek l’avenir ti’nn vinn pli clair pou zot.

Oui, comprend la Bible, li pa ditou enn corvée, au contraire li interessant ek sa donne nou bann bienfait. Nou kapav prend plaisir pou comprend Parole Bondié pareil couma kan nou mange enn bon mangé. Ki ou bizin faire pou kapav comprend la Bible? Prochain lartik pou montré ou couma ou kapav gagne ‘connaissance Bondié.’—Proverbes 2:1-5.

[Zimage, page 4]

Pareil couma enn papa ki ena l’amour, Jéhovah donne nou so l’esprit saint pou nou comprend la Bible