Couma ou kapav comprend la Bible

Ninfa, ki reste en Italie raconté: “Enn lepok mo ti lire la Bible avant mo al dormi. Mo ti faire sa parski mo ti koné ki c’est Parole Bondié, ek mem si mo pa ti content lire, mo ti envie koné ki Bondié ti’nn ecrire dan la Bible. Mo ti envie lire li net. Au commencement mo ti trouve li facile, mais apré sa, kan mo’nn arrive lor bann recit ki mo ti trouve difficile, mo ti arrete lire.”

ESKI ou finn deja trouve ou dan enn situation inpé pareil couma Ninfa? Beaucoup dimoune kitfois inn faire sa l’experience-la. Pourtant, couma nou finn trouvé dan lartik avant, Jéhovah ki finn faire ecrire la Bible, envie ki ou comprend so Parole. Alors, couma ou pou kapav comprend sa? Enn premier kitsoz ki ou bizin faire, c’est demann Bondié so l’aide.

Bann dimoune ti considere bann zapotre Jésus, couma bann zom “ordinaire ki pa ti ena grand l’instruction” parski zot pa ti al dan bann lekol kot bann rabbin ti enseigné, pou gagne enn formation religieux. (Actes 4:13) Pourtant, Jésus ti donne zot l’assurance ki zot ti pou kapav comprend Parole Bondié. Couma? Jésus ti expliké: “L’assistant, l’esprit saint, ki mo Papa pou envoye lor mo nom, li, li pou enseigne zot tou kitsoz.” (Jean 14:26) Bondié ti servi sa l’esprit saint-la, ou-soit so la force actif, pou crée la terre ek la vie ki lor la. (Genèse 1:2) Li ti aussi servi sa pou inspire environ 40 zom pou ecrire so bann pensé dan la Bible. (2 Pierre 1:20, 21) Bann ki envie comprend la Bible, zot aussi zot kapav gagne l’aide l’esprit saint.

Couma ou kapav gagne l’esprit saint Bondié? Ou bizin demann sa avek la foi. En realité, kitfois ou pou bizin contigne demandé. Jésus ti dire: “Contigne demandé, ek zot pou gagné; . . . si zot . . . konn donne zot zenfant seki bon, kifer nou Papa ki dan le ciel pa pou donne encore plus l’esprit saint bann ki demann Li?” (Luc 11:9, 13) Jéhovah disposé pou donne so l’esprit saint bann ki demann Li sa avek enn leker sincere. Sa la force actif-la kapav aide ou pou comprend signification bann parole inspiré ki trouve dan la Bible, ki finn ecrire ena bann millier l’année. L’esprit Bondié kapav aussi donne ou sagesse ki bizin pou applik message puissant ki ena dan la Bible dan ou la vie.—Hébreux 4:12; Jacques 1:5, 6.

Alors, chaque fois ki ou lire la Bible, prié Bondié pou demann Li so l’esprit saint pou aide ou comprend so Parole.