Question bann lecteur

Bondié pa servi bann catastrophe naturel pou puni bann dimoune innocent. Jamais Li’nn faire sa ek jamais Li pa pou faire sa. Kifer? Parski dan 1 Jean 4:8, la Bible dire: “Bondié Li l’amour.”

C’est l’amour ki pousse Bondié pou faire tou seki Li faire. L’amour pa faire bann innocent souffert parski la Bible dire ki “l’amour pa faire nou prochain di-tort.” (Romains 13:10) Dan Job 34:12, la Bible dire: “Vrai-mem, Bondié Li pa faire le mal.”

Li vrai ki la Bible ti annonce bann catastrophe pou nou lepok, couma par exemple “bann grand tremblement de terre.” (Luc 21:11) Mais, Jéhovah pa responsable pou bann degat ki bann catastrophe faire, pareil couma enn dimoune ki travail dan bureau meteo ek ki faire nou koné ki pou ena cyclone, li pa responsable pou degat ki cyclone ki li’nn annoncé-la faire.Mais si c’est pa Bondié ki responsable souffrance ki nou gagné a cause bann catastrophe naturel, kisannla ki responsable?

La Bible faire nou koné ki “le monde entier li dan pouvoir sa kikenn ki mauvais-la,” Satan le Diable. (1 Jean 5:19) Depuis so rebellion dan commencement l’histoire bann humain ziska zordi, li’nn toujours enn criminel. (Jean 8:44) Pou Satan, la vie bann humain pena valeur. C’est so l’ambition egoïste ki dirige li, alors li pa etonnant ki dan le monde entier li’nn developpe enn systeme ki favorise l’egoïsme. Zordi sa systeme ki existé dan le monde-la tellement laisse bann dimoune exploite zot camarade ki nou’nn arrive enn point kot bann dimoune innocent pé vive dan bann place dangereux kot zot la vie menacé par bann catastrophe naturel, ou-soit par bann catastrophe ki a cause bann dimoune-mem. (Éphésiens 2:2; 1 Jean 2:16) Alors c’est bann dimoune ki rod gagne plus ki responsable pou certain malheur ki sa bann victime-la koné. (Ecclésiaste 8:9) Dan ki fason?

Enn bon quantité catastrophe arrivé en partie a cause bann dimoune. Par exemple, guette bann inondation ki ti arrivé dan la ville Nouvelle-Orléans a cause cyclone Katrina, ou-soit seki ti arrivé Vénézuéla kan bann lakaz ti detruire par la boue ki ti desann par quantité lor la pente bann montagne lor la cote. Dan sa deux cas-la ek dan lezot cas encore, bann kitsoz naturel couma di-vent ek la pluie, ti cause bann grand degat surtout parski bann dimoune pa ti konn nanyin lor bann probleme l’environnement, bann construction pa ti en bon etat, mauvais l’organisation, bann dimoune pa ti ecoute bann l’avertissement ek aussi bann erreur administratif.

Guette enn catastrophe ki ti arrivé dan lepok biblik. Kan Jésus ti lor la terre, enn la tour ti tombé ek ti touye 18 dimoune. (Luc 13:4) Sa catastrophe-la ti kapav inn arrivé a cause bann erreur humain, ou-soit dan ‘enn moment ek enn situation ki bann dimoune pa ti attann,’ ou-soit pou toulé-deux raison, mais en tou cas, pa a cause jugement Bondié.—Ecclésiaste 9:11.

Eski Bondié inn deja amenn bann catastrophe? Oui, mais zot pa ti pareil couma bann catastrophe naturel ou-soit bann catastrophe ki causé par bann dimoune parski Bondié ti fini choisir kisannla pou vive ek kisannla pou detruire. Li ti faire sa dan enn but precis ek sa pa ti arrivé souvent. Deux l’exemple c’est deluge ki ti ena partout lor la terre dan lepok Noé ek destruction bann la ville Sodome ek Gomorrhe dan lepok Lot. (Genèse 6:7-9, 13; 18:20-32; 19:24) Sa bann jugement Bondié-la ti detruire bann dimoune mauvais ki pa ti repenti mais bann dimoune ki ti droite devant lizié Bondié, ti reste en vie.

Avredir, Jéhovah ena capacité, desir ek pouvoir pou tire tou bann souffrance ek pou amenn enn soulagement ar tou consequence bann catastrophe naturel. Concernant Jésus Christ, le roi ki Bondié inn choisir, Psaume 72:12 ti annoncé: “Li pou sap sa dimoune misere ki criyé au secours-la, ek aussi sa dimoune ki dan grand chagrin-la, ek n’importe kisannla ki pena personne pou aide li.”