Faire face ar bann catastrophe naturel

Reste loin ar bann l’endroit kot gagne bann catastrophe.

La Bible dire: “Enn dimoune ki ena bon jugement, li cachiette kan li trouve malheur. Mais bann dimoune ki pena l’experience, pa’nn prend compte ek bizin paye consequence.” (Proverbes 22:3) Nou kapav applik sa bon conseil-la en rapport avek bann catastrophe. Si pé donne enn l’avertissement ki enn volcan pré pou rente en eruption, ou-soit pou ena enn inondation, ou-soit encore ki enn cyclone pé kosté, la sagesse pousse bann dimoune ki reste dan sa bann l’endroit-la, pou sauvé ek pou al dan enn lot l’endroit kot zot pou en securité. La vie enn dimoune ena plus valeur ki enn lakaz ou-soit lezot kitsoz materiel.

Certain kitfois, kapav choisir pou pa reste dan enn l’endroit kot ena enn grand risk pou gagne catastrophe. Enn rapport dire: “Dan certain l’endroit ena bann grand risk pou gagne bann catastrophe. Mais c’est dan bien tigit l’endroit lor la terre kot ena sa bann grand risk-la ek la plupart bann grand catastrophe ki pou ena dan l’avenir pou arrivé dan sa bann l’endroit-la.” Par exemple, sa kapav arrivé dan bann l’endroit ki pli bas ki niveau la mer ou-soit ki trouve lor bann plaque roche enba la terre ki pa stable. Si ou kapav evite reste dan sa bann l’endroit kot ena enn grand risk pou ena bann catastrophe-la, ou-soit si ou kapav quitte sa bann l’endroit-la pou al reste dan bann place kot ou pou plus en securité, ou pou ena moins risk pou souffert dan bann catastrophe.

Organise en detail ki ou pou faire.

Malgré tou bann precaution ki ou prend, ou kapav kan-mem passe dan enn catastrophe ki ou pa attann. Li pou pli facile pou ou faire face ar sa catastrophe-la si ou fini organise ou a l’avance. Sa fason agir-la li aussi en accord avek conseil ki trouve dan Proverbes 22:3, verset ki ti’nn cité avant. Eski ou’nn prepare enn sac ki ou kapav prend dan bann cas urgent? Livre 1-2-3 of Disaster Education dire ki dan sa sac-la, ou kapav mette sa bann kitsoz-la: enn trousse premier secours, bann bouteille de l’eau, bann mangé ki pa pou gaté, ek bann document important. Li pou aussi sage ki ou ré-guette avek ou famille bann different catastrophe ki kapav ena dan ou l’endroit ek seki zot kapav faire dan chaque situation.

Garde bann bon relation avek Bondié.

Sa kapav aide nou dan n’importe ki situation. La Bible dire ki Bondié Li enn “Papa ki ena beaucoup misericorde ek Bondié ki donne tou consolation, ki console nou dan tou nou bann probleme.” Enn lot verset decrire Li couma Bondié “ki console bann ki decouragé.”​—2 Corinthiens 1:3, 4; 7:6.

Pena doute ki Bondié bien conscient ki situation bann dimoune ki ena la foi en Li, pé bizin enduré. Li enn Bondié ki ena l’amour ek dan different fason, Li donne nou bann l’encouragement ki remonte nou moral. (1 Jean 4:8) Nou prié Bondié, pa pou faire bann mirak, mais pou ki so l’esprit saint aide nou dan n’importe ki situation. L’esprit saint kapav faire bann ki pé passe par bann difficulté, rappel bann verset la Bible ki kapav reconforte ek soulage zot. Vrai-mem, bann serviteur Bondié ki fidele kapav ena mem sentiment ki le roi David, ki ti dire: “Mem si mo marche dan enn vallée kot faire bien noir, mo pa peur nanyin, parski to avek moi; to baguette ek to baton, c’est sa ki console moi.”​—Psaume 23:4.

Bann chretien aide zot camarade.

Dan premier siecle, Agabus, enn prophete chretien, ti dire ki “enn grand la famine ti pou vinn partout lor la terre; ek vrai-mem sa ti arrivé dan lepok Claude.” Sa la famine-la ti bien affecté beaucoup disciple Jésus ki ti reste en Judée. Ki bann disciple ki ti reste dan lezot l’endroit ti faire kan zot ti tann dire ki zot bann frere ti dan probleme? La Bible dire: “Bann disciple, sakenn dapré so moyen, ti decidé pou envoye bann secours pou aide bann frere ki ti reste Judée.” (Actes 11:28, 29) Zot ti montré zot l’amour kan zot ti envoye bann secours pou bannla.

Zordi, kan ena bann grand malheur, bann serviteur Bondié agir dan mem fason. Bann Témoins de Jéhovah habitué aide zot bann frere, ek beaucoup dimoune konn sa. Par exemple, kan ti ena enn grand tremblement de terre dan Chili le 27 février 2010, bann Témoins de Jéhovah pa ti tardé pou al aide bann ki ti affecté. Kan lakaz Karla ti detruire par enn tsunami, li ti dire: “Kan lendemain-mem, mo ti trouve mo bann frere Témoins ki ti sorti dan lezot l’endroit vinn aide nou, sa ti bien reconforte moi ek ti encourage moi. Pena doute, Jéhovah ti reconforte nou a travers bonté ki sa bann volontaire-la ti manifesté. Mo ti ressenti l’amour ek protection Jéhovah.” So grand-pere ki pa enn Témoin, ti observe l’aide ki zot ti gagné. Li ti dire: “C’est enn kitsoz bien different avek seki mo’nn trouvé pendant plusieurs l’année dan mo religion.” Seki li ti trouvé ti pousse-li pou demann bann Témoins de Jéhovah pou etudié la Bible avek li.

Kan nou frequente bann dimoune ki content Bondié, sa kapav enn grand l’aide kan nou gagne probleme.