Eski Bondié pé puni nou?
Apré ki so pays ti detruire par enn tremblement de terre magnitude 9, ek enn tsunami, en mars 2011, enn chef politik japonais ti dire: “Mem si mo chagrin pou bann victime sa catastrophe-la, mo pensé ki c’est enn tembatsu (enn punition ki sorti kot Bondié).”
Kan plus ki 220,000 dimoune ti mort dan enn tremblement de terre ki ti arrivé en Haïti en janvier 2010, enn pasteur bien populaire ki habitué preché lor television, ti pretann ki sa ti arrivé parski zot ti “faire enn l’accord avek Diable” ek ki zot ti bizin “tourne-zot vers Bondié.”
Kan 79 dimoune ti mort dan enn panik dan Manille, en Philippines, enn pretre catholique ti dire: “Bondié envie faire nou conscience ki’nn vinn insensible ek indifferent, reagir.” Enn journal dan sa pays-la ti dire ki “vingt-et-enn pour cent bann adulte croire ki Bondié pé tire so colere par bann glissement terrain, bann cyclone ek bann lezot catastrophe” ki souvent affecté sa pays-la.
CROYANCE ki bann dimoune ena ki Bondié amenn bann catastrophe pou puni bann mauvais dimoune, li pa nouveau. En 1755, apepré 60,000 dimoune ti mort dan enn tremblement de terre, enn difé ek enn tsunami ki ti arrivé dan Lisbonne, dan Portugal. Apré ki sa ti arrivé, enn philosophe bien populaire ki appel Voltaire ti pose sa question-la: “Eski finn trouve plus peché dan Lisbonne ki dan Paris, kot ena bann plaisir immoral en abondance?” En realité, plusieurs million dimoune finn demann zot-mem si Bondié pé servi bann catastrophe naturel pou puni bann dimoune. Dan beaucoup pays, bann dimoune appel sa bann catastrophe-la, travail Bondié.
Apré ki nou finn guette tousala, nou bizin demann nou-mem: Eski Bondié vrai-mem servi bann catastrophe naturel pou puni bann dimoune? Eski sa quantité l’evenement terrible ki finn fek arrivé-la, zot bann punition ki sorti kot Bondié?
Certain dimoune ki pressé pou accuse Bondié, cite bann recit la Bible kot Bondié ti servi bann element ki ena dan la nature pou amenn bann destruction. (Genèse 7:17-22; 18:20; 19:24, 25; Nombres 16:31-35) Mais, kan nou examine sa bann recit biblik-la, nou trouvé ki dan chaque cas, ena trois kitsoz principal ki nou bizin prend en consideration. Premierement, ti ena enn l’avertissement avant. Deuxiemement, bann catastrophe naturel ki ena zordi touye bann bon ek bann mauvais dimoune toulé-deux, mais destruction ki Bondié ti amené pa ti touye bann bon dimoune. C’est zis bann mauvais dimoune ki pa ti’lé changé ou-soit bann ki ti refuse ecoute bann l’avertissement Bondié, ki ti detruire. Troisiemement, Bondié ti rod enn moyen pou ki bann dimoune innocent sapé.—Genèse 7:1, 23; 19:15-17; Nombres 16:23-27.
Zordi finn ena beaucoup catastrophe ki finn detruire la vie plusieurs million dimoune, mais pena okenn preuve ki montré ki c’est Bondié ki responsable. Eski pou arrive enn jour kot nepli pou ena bann catastrophe? Couma nou kapav faire face ar sa bann catastrophe-la? Ou pou gagne sa bann reponse-la dan bann prochain lartik.