Nepli pou ena okenn catastrophe!

SI ENN kikenn dire ou: “Bientot nepli pou ena okenn catastrophe,” couma ou pou reagir? Kitfois ou pou reponn-li: “To pé revé toi. Bann catastrophe forme partie dan la vie.” Ou-soit, kitfois ou pou dire dan ou leker: ‘Kisannla li pensé li pé embeté?’

Mem si li parette ki touletan pou ena bann catastrophe naturel, nou ena enn l’espoir ki sa pou changé. Mais, c’est pa bann dimoune ki pou faire sa changement-la. Bann dimoune pa kapav comprend bien couma ek kifer arrive bann kitsoz dan la nature, ek zot pa kapav controle ou-soit change sa bann kitsoz-la. Le roi Salomon ti regne en Israël ek beaucoup dimoune ti konn li pou so sagesse ek parski li ti enn bon observateur. Li ti ecrire: “Bann dimoune pa kapav konn travail ki finn faire lor sa la terre-la, mem ki quantité bann dimoune contigne travail dure pou rodé, zot pa trouvé. Ek mem si zot dire ki zot assez sage pou koné, zot pa pou kapav trouvé.”​—Ecclésiaste 8:17.

Si bann dimoune pa kapav controle bann catastrophe naturel, kisannla ki kapav faire sa? Dapré la Bible, c’est nou Createur ki kapav faire sa changement-la. C’est Li-mem ki finn crée bann cycle ki ena dan la nature, couma par exemple cycle de l’eau. (Ecclésiaste 1:7) Bondié bien different avek bann dimoune, Li, Li ena enn grand pouvoir. Prophete Jérémie ti montré sa kan li ti dire: “Ah Souverain Seigneur Jéhovah! C’est to-mem ki’nn faire le ciel ek la terre par to grand puissance ek par la force ki to la main ena. Pena nanyin ki trop extraordinaire pou toi.” (Jérémie 32:17) C’est Bondié ki’nn faire la terre ek tou so bann element, alors li logik ki Li koné couma pou faire pou ki bann dimoune vive en paix ek en securité lor la terre.​—Psaume 37:11; 115:16.

Alors, couma Bondié pou faire sa changement ki bann dimoune bien bizin-la? Beaucoup malheur ki ena lor la terre zordi-la forme partie dan enn “signe” ki montré ki nou pé vive dan “conclusion sa systeme-la.” Jésus ti dire: “Kan zot trouve sa bann kitsoz-la arrivé, zot bizin koné ki royaume Bondié pé kosté.” (Matthieu 24:3; Luc 21:31) Royaume Bondié, enn gouvernement ki Bondié inn etabli dan le ciel, pou amenn bann grand changement lor la terre, li pou mem controle bann element ki ena dan la nature. Mem si Jéhovah ena pouvoir pou faire sa Li-mem, Li finn choisir pou donne sa travail-la so Garson. Prophete Daniel ti koz lor sa Garson-la kan li ti dire: “Ti donne li domination, grandeur, ek enn royaume, pou ki bann peuple, bann nation ek bann langue, zot tou servi li.”​—Daniel 7:14.

Bondié finn donne so Garson Jésus Christ pouvoir ki bizin pou faire tou bann changement necessaire pou ki la terre vinn enn place agreable pou vive. Ena deux mille an, kan Jésus ti lor la terre, li ti montré dan enn fason limité ki li ena capacité pou controle bann element ki ena dan la nature. Enn fois, kan li ek so bann disciple ti dan enn bateau lor la mer Galilée, “enn grand tempete di-vent ti levé, ek bann vague ti pé crase lor bateau-la ziska ki bateau-la ti pré pou rempli ar de l’eau.” So bann disciple ti paniké. Zot ti peur pangar zot perdi zot la vie, alors zot ti dire Jésus aide zot. Ki Jésus ti faire? Jésus ti zis “koz enn coute severe ar di-vent ek li ti dire la mer: ‘Reste trankil! Calmé-toi!’ Ek di-vent ti tombé, ek ti ena enn grand calme.” So bann disciple ti etonné ek sakenn ti demann so camarade: “Kisannla li été vrai-mem, sannla-la, parski mem di-vent ek la mer obeir li?”​—Marc 4:37-41.

Depuis sa lepok-la, Jéhovah finn ressuscite Jésus pou li vive dan le ciel ek finn donne li enn pli grand pouvoir ek enn pli grand l’autorité. En tant ki le Roi dan Royaume Bondié, li ena responsabilité ek capacité pou faire tou bann changement necessaire pou ki bann dimoune vive en paix ek en securité lor la terre.

Selman, couma nou finn trouvé, c’est bann dimoune ki responsable beaucoup probleme ek catastrophe ki ena zordi. Bann dimoune egoïste, ki touletan pé rod gagne plus ki bizin, finn faire bann kitsoz ki finn amenn sa bann catastrophe-la ou-soit finn faire sa vinn pli pire. Ki Royaume Bondié pou faire ar bann dimoune ki persisté pou agir coumsa ek ki pa’lé changé? La Bible dire ki nou Seigneur Jésus pou vinn “depuis le ciel avek so bann ange puissant dan enn grand difé, kan li pou tire vengeance lor bann ki pa konn Bondié ek lor bann ki pa obeir la bonne nouvelle concernant nou Seigneur Jésus.” Oui, li pou “detruire bann ki pé detruire la terre.”​—2 Thessaloniciens 1:7, 8; Révélation 11:18.

Apré sa, Jésus Christ “le Roi tou bann le roi,” pou controle net tou bann element ki ena dan la nature. (Révélation 19:16) Li pou faire sur ki bann dimoune ki pou enba domination Royaume Bondié pou nepli souffert a cause bann catastrophe. Li pou servi so pouvoir pou controle climat ki ena lor la terre pou ki le temps ek bann saison faire bann dimoune gagne bann bienfait. Lerla, seki Jéhovah ti promette so bann serviteur depuis bien longtemps, pou realisé. Li ti faire sa promesse-la: “Alors vrai-mem, mo pou donne zot bann gros la pluie dan lepok ki bizin, ek la terre pou donne so production, ek pié dan karo pou rapporte so fruit.” (Lévitique 26:4) Bann dimoune pou kapav arrange bann lakaz sans ki zot peur pangar zot perdi zot lakaz a cause enn catastrophe: “Zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit.”​—Isaïe 65:21.

Ki ou bizin faire?

Pena doute, pareil couma beaucoup dimoune, ou aussi ou ti pou content pou vive dan enn le monde kot nepli pou ena okenn catastrophe. Mais ki ou bizin faire pou vive dan sa le monde-la? “Bann ki pa konn Bondié” ek “bann ki pa obeir la bonne nouvelle” pa pou merité vive dan enn le monde kot pa pou ena okenn catastrophe. Alors, li clair ki asterla-mem nou bizin aprann pou konn Bondié ek pou soutenir disposition ki Li’nn prend pou dirige la terre. Bondié attann ki nou aprann konn Li ek obeir la bonne nouvelle concernant Royaume ki Li’nn etabli a travers so Garson.

Pli bon fason pou aprann faire sa c’est a travers enn l’etude la Bible. La Bible montré ki bann condition nou bizin rempli pou profite securité ki pou ena dan le monde ki pou dominé par Royaume Bondié. Kifer ou pa demann bann Témoins de Jéhovah pou aide ou pou aprann seki la Bible enseigné? Zot disposé pou faire sa. Ou kapav sur ki si ou faire bann zeffort pou konn Bondié ek pou obeir la bonne nouvelle, bann parole ki trouve dan Proverbes 1:33 pou realisé dan ou cas: “Mais sa kikenn ki ecoute moi-la, li, li pou reste en securité ek li pou vive trankil sans ki li peur okenn malheur.”