Resisté kont “l’esprit le monde”

“Nou, nou pa finn recevoir l’esprit le monde, mais l’esprit ki sorti kot Bondié.”—1 COR. 2:12.

1, 2. (a) Dan le passé, kifer ti mette bann canari dan bann la mine en Angleterre? (b) Ar ki danger bann chretien bizin faire face?

EN 1911, gouvernement l’Angleterre ti passe enn la loi pou protege bann dimoune ki travail dan bann la mine charbon. Dan chaque la mine, ti bizin ena deux zoiseau, bann canari. Kifer? Si jamais ti ena enn difé ki ti prend dan enn la mine, bann sauveteur ti pou amenn bann zoiseau-la enba la terre avek zot. Sa bann ti zoiseau-la zot sensible ar bann gaz toxik couma par exemple monoxyde carbone—enn gaz invisible, ki pena l’odeur ek ki mortel parski li empeche bann globule rouge donne lekor enn dimoune l’oxygène. Si l’air ti contaminé ar sa gaz-la, bann zoiseau-la ti pou commence vinn faible, zot ti mem kapav sapé tombé. Sa premier signe-la ti bien important parski li ti permette bann sauveteur-la ek bann travailleur pou koné ki ena enn danger. Si zot pa ti konn sa, zot ti riské tombe sans connaissance ek mort sans mem realisé ki zot inn empoisonné.

² Lor plan spirituel, bann chretien dan mem situation ki sa bann dimoune ki travail dan la mine-la. Couma? Kan Jésus ti donne so bann disciple mission pou al preche la bonne nouvelle dan le monde entier, li ti koné ki li ti pé envoye zot dan enn l’environnement dangereux, ki dominé par Satan ek l’esprit le monde. (Mat. 10:16; 1 Jean 5:19) Jésus ti tellement tracassé pou so bann disciple ki, la nuit avant li mort, li ti prié so Papa: “Mo pa pé demann toi pou tire zot dan le monde, mais pou veille lor zot a cause sa kikenn ki mauvais-la.”—Jean 17:15.

3, 4. Ki l’avertissement Jésus ti donne so bann disciple, ek kifer sa bizin interesse nou?

³ Jésus ti averti so bann disciple lor danger ki ti ena si zot pa ti prend compte bann l’influence ki ti ena autour zot ki ti pou kapav touye zot lor plan spirituel. So bann parole ena enn signification special zordi pou nou ki pé vive lepok conclusion sa systeme-la. Li ti donne so bann disciple sa conseil-la: “Reste lor zot garde . . . pou ki zot reussi sapé ar tou sa bann kitsoz ki bizin arrivé-la, ek tini deboute devant Fils de l’homme.” (Luc 21:34-36) Mais heureusement, Jésus ti promette aussi ki so Papa ti pou donne zot l’esprit saint pou ki zot kapav rappel bann kitsoz ki li ti dire zot ek pou aide zot pou reste lor zot garde ek reste fort.—Jean 14:26.

⁴ Ki nou kapav dire lor nou zordi? Eski nou kapav gagne sa mem l’esprit saint-la? Si oui, ki nou bizin faire? Ki été l’esprit le monde, ek couma li agir? Couma nou kapav reussi resisté kont so l’influence?—Lire 1 Corinthiens 2:12.

L’esprit saint ou-soit l’esprit le monde?

5, 6. Ki l’effet l’esprit saint kapav ena lor nou, mais ki nou bizin faire pou gagne li?

⁵ Bondié pa finn donne zis bann chretien premier siecle so l’esprit saint. Zordi aussi nou kapav gagne sa l’esprit-la. L’esprit saint kapav donne nou la force pou faire seki droite ek faire nou ena zele dan service Bondié. (Rom. 12:11; Phil. 4:13) Li kapav aussi produire bann bon qualité dan nou, couma l’amour, bienveillance, ek bonté, bann qualité ki forme partie dan “fruit l’esprit.” (Gal. 5:22, 23) Selman, Jéhovah pa force personne pou accepté sa l’esprit-la si zot pa envie.

⁶ Alors, li pou bon ki nou demann-nou-mem: ‘Ki mo bizin faire pou gagne l’esprit saint?’ La Bible montré ki ena certain kitsoz ki nou bizin faire. Enn parmi, c’est enn kitsoz ki simple ek important—demann Bondié pou donne nou so l’esprit saint. (Lire Luc 11:13.) Enn lot kitsoz c’est etudié ek applik bann conseil ki trouve dan Parole ki l’esprit saint Bondié inn inspiré. (2 Tim. 3:16) Bien sur, c’est pa n’importe kisannla ki zis lire la Bible ki gagne l’esprit saint Bondié. Mais kan enn chretien sincere etudié Parole Bondié, li kapav laisse bann sentiment ek bann l’attitude ki ena dan seki li lire, influence li. Li bien important aussi ki nou accepté ki Jéhovah inn etabli Jésus couma so representant ek reconette ki c’est par li ki Bondié donne so l’esprit saint. (Col. 2:6) C’est a cause sa ki nou envie suive l’exemple Jésus ek vive en accord avek so bann l’enseignement. (1 Pierre 2:21) Plus nou faire zeffort pou imite Christ, plus nou pou gagne l’esprit saint.

7. Couma l’esprit le monde influence bann dimoune?

⁷ Parkont, l’esprit le monde pousse bann dimoune pou imite personnalité Satan. (Lire Éphésiens 2:1-3.) Li agir dan plusieurs fason. Nou trouve bien tout autour nou zordi couma sa l’esprit-la pousse bann dimoune pou rebelle kont bann principe Bondié. Sa l’esprit-la encourage ‘desir la chair, desir lizié ek l’etalage ki enn dimoune faire ar seki so moyen permette li ena.’ (1 Jean 2:16) Li produire bann oeuvres de la chair couma fornication, l’idolatrie, spiritisme, jalousie, crise colere, ek boire ziska sou. (Gal. 5:19-21) Li favorise aussi discours bann apostat ki pa montré okenn respé pou seki saint. (2 Tim. 2:14-18) Pena doute lor la, plus enn dimoune laisse l’esprit le monde influence li, plus li ressemblé Satan.

8. Ki choix nou tou nou ena?

⁸ Li impossible ki nou vive dan enn place kot nanyin pa pou kapav influence nou. Chaque dimoune bizin choisir ki l’esprit ki li envie dirige so la vie—l’esprit saint ou-soit l’esprit le monde. Bann dimoune ki asterla enba l’influence l’esprit le monde, kapav sorti enba sa l’influence-la ek laisse l’esprit saint dirige zot la vie. Mais, le contraire aussi li possible. Li kapav arrivé ki, bann ki pendant enn lepok ti dirigé par l’esprit saint, laisse l’esprit le monde piege zot. (Phil. 3:18, 19) Anou guetté couma nou kapav resisté kont l’influence l’esprit le monde.

Prend compte bann premier signe

9-11. Ki bann signe ki montré ki kitfois nou pé laisse l’esprit le monde influence nou?

⁹ Bann ki travail dan la mine ki nou ti mentionné au commencement sa lartik-la, ti servi bann canari pou koné si ena bann gaz toxik dan l’air. Si enn travailleur ti trouve enn zoiseau tombé, li ti koné ki li ti bizin agir vite pou li kapav sauve so prop la vie. Lor plan spirituel, ki bann premier signe ki montré nou ki nou pé laisse l’esprit le monde influence nou?

¹⁰ Kan nou ti aprann bann verité ki trouve dan la Bible ek nou ti voué nou la vie pou servi Jéhovah, surement nou ti serieux dan nou lecture la Bible. Kitfois nou ti prié souvent ek avek tou nou leker. Nou ti content pou assisté tou bann reunion congregation. Nou ti considere chaque reunion couma enn moyen ki ti rafraichi nou lor plan spirituel, pareil couma enn l’endroit kot ena de l’eau dan desert pou enn dimoune ki soif. Tousala ti aide nou pou sorti enba l’influence l’esprit le monde ek pou contigne reste loin ar sa.

¹¹ Eski nou toujours pé faire zeffort pou lire la Bible toulé-jour? (Ps. 1:2) Eski nou prié souvent ek avek tou nou leker? Eski nou content bann reunion, ek montré sa kan nou assisté tou reunion chaque semaine? (Ps. 84:10) Ou-soit, eski nou finn perdi certain parmi sa bann bon l’habitude-la? Li vrai ki nou kapav ena beaucoup responsabilité ki prend nou le temps ek nou l’energie, ek li kapav bien difficile pou garde bann bon l’habitude spirituel. Mais si avek le temps, nou finn neglige certain parmi sa bann bon l’habitude-la, eski c’est parski nou pé laisse l’esprit le monde influence nou? Eski nou pou faire bann grand zeffort pou regagne sa bann bon l’habitude-la?

Pa laisse nanyin faire zot “vinn lourd”

12. Dapré Jésus, ar kisannla so bann disciple ti bizin “faire attention,” ek kifer?

¹² Ki nou kapav faire encore pou resisté kont l’influence l’esprit le monde? Zis avant ki Jésus ti conseil so bann disciple pou “reste lor zot garde,” li ti averti zot kont certain danger bien precis. Li ti dire zot: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie, ek ki enn sel coup sa jour-la vinn lor zot couma enn piege.”—Luc 21:34, 35.

13, 14. Ki bann question li bon nou demann nou-mem concernant mangé ek boire?

¹³ Reflechi lor sa l’avertissement-la. Eski Jésus ti condamne plaisir ki nou gagné pou mangé ek boire? Non! Li ti koné ki Salomon ti dire: “Mo finn aprann ki pena nanyin ki pli bon pou [bann dimoune] ki zot dan la joie ek ki zot faire seki bien dan zot la vie; ek aussi ki zot tou mangé, ek boire ek satisfait kan zot trouve resultat sa travail dur ki zot inn faire-la. Sa c’est enn don ki Bondié donné.” (Eccl. 3:12, 13) Mais Jésus ti koné ki l’esprit le monde encourage bann dimoune pou mank control dan sa bann domaine-la.

¹⁴ Couma nou kapav sur ki l’esprit le monde pa’nn empoisonne nou pou ki nou nepli trouve danger ki ena pou mangé ek boire trop beaucoup? Nou kapav demann nou-mem: ‘Ki mo reaction kan mo lire bann conseil ki ena dan la Bible ek dan bann publication lor gourmandise? Eski mo ena tendance pou rejette sa bann conseil-la parski mo considere zot couma bann conseil ki pa concerne moi ou-soit ki exageré? Eski mo rod bann pretexte pou justifié mo conduite?a Si jamais mo boire lalkol, ki mo pensé lor conseil ki nou bizin boire avek moderation, ek evite bann “l’occasion kot dimoune joinde ensam pou boire ziska sou”? Eski mo considere ki sa conseil-la pa vrai-mem important, parski mo pensé ki pou certaine raison li pa applik pou moi? Si certain faire moi remark lor mo l’habitude pou boire, eski mo toujours ena enn point pou defann mo-mem ou-soit mo en colere? Eski mo encourage lezot pou pa prend serieux sa bann conseil biblik-la?’ Oui, l’attitude enn dimoune montré si li pé cedé devant l’esprit le monde.—Compare avek Romains 13:11-14.

Pa laisse tracas touffe zot

15. Kont ki tendance ki bann dimoune ena, Jésus ti mette so bann disciple en garde?

¹⁵ Pou resisté kont l’esprit le monde li important aussi ki nou control nou bann sentiment kan nou tracassé. Jésus ti koné ki en tant ki bann dimoune imparfait, nou ena tendance pou tracassé concernant bann kitsoz normal ki nou bizin dan la vie. A cause sa, avek beaucoup l’amour li ti dire so bann disciple: “Arrete tracasse-zot.” (Mat. 6:25) Li normal ki nou tracassé pou bann kitsoz important, par exemple couma pou faire Bondié plaisir, couma pou prend bien nou responsabilité en tant ki chretien, ek couma pou donne nou famille seki li bizin pou vive. (1 Cor. 7:32-34) Mais alors, ki nou kapav aprann ar l’avertissement ki Jésus ti donné?

16. Ki l’effet l’esprit le monde ena lor beaucoup dimoune?

¹⁶ L’esprit le monde mette beaucoup l’accent lor l’etalage ki bann dimoune faire ar seki zot moyen permette zot pou ena. Sa l’attitude-la faire beaucoup dimoune gagne tracas ek sa affecté zot la santé. Le monde envie faire nou croire ki l’argent c’est sa-mem ki pou donne nou securité, ek ki nou kapav konn valeur enn dimoune, pa par so bann qualité spirituel, mais par quantité ek qualité di-bien materiel ki li ena. Bann ki laisse sa pensée le monde-la embete zot, travail couma bann esclave pou zot kapav vinn riche. Zot touletan tracassé pou koné couma zot pou faire pou gagne bann kitsoz dernier modele, ki pli gros ek ki pli extra. (Prov. 18:11) Enn l’attitude deformé coumsa lor bann kitsoz materiel faire bann dimoune tracassé ek sa tracas-la touffe zot progré spirituel.—Lire Matthieu 13:18, 22.

17. Ki nou kapav faire pou bann tracas pa touffe nou?

¹⁷ Nou kapav evité ki bann tracas touffe nou si nou obeir l’ordre ki Jésus ti donné: “Avant tou kitsoz, contigne rod le royaume ek . . . justice [Bondié].” Jésus donne nou l’assurance ki si nou faire sa, nou pou gagne bann kitsoz ki nou vrai-mem bizin. (Mat. 6:33) Couma nou kapav montré ki nou croire dan sa promesse-la? Enn fason c’est kan nou rod la justice Bondié avant tou, setadir nou suive bann principe Bondié lor seki droite dan domaine financier. Par exemple, nou refuse pou donne bann fausse renseignement kan nou rempli nou form taxe, ou-soit, nou refuse pou koz mem bann “ti” menti kan nou faire business. Nou faire tou seki nou kapav pou respecté bann l’engagement financier ki nou prend, ek nou faire en sorte ki nou “Oui vedir Oui” kan nou bizin paye nou bann dette. (Mat. 5:37; Ps. 37:21) Si nou honnete coumsa, kitfois sa pa pou faire nou vinn riche, mais sa pou faire nou gagne faveur Bondié, sa pou donne nou enn bon conscience ek pou diminué beaucoup nou tracas.

18. Ki bon l’exemple Jésus inn donne nou, ek ki bienfait nou gagné kan nou imite li?

¹⁸ Rod Royaume Bondié avant tou, vedir ki nou koné ki kitsoz ki ena priorité dan nou la vie. Anou prend l’exemple Jésus. Parfois li ti mette enn linge bon qualité. (Jean 19:23) Li ti apprecié pou mangé ek pou boire di-vin avek so bann bon camarade. (Mat. 11:18, 19) Mais bann di-bien materiel ek bann distraction ti couma bann assaisonnement dan so la vie, pa couma plat principal. Li ti considere volonté Jéhovah couma so mangé. (Jean 4:34-36) Nou vrai-mem gagne bann grand bienfait kan nou imite l’exemple Jésus! Nou ena la joie pou reconforte bann dimoune ki pé souffert par bann pensée encourageant ki sorti dan la Bible. Nou gagne l’amour ek soutien congregation. Ek nou faire leker Jéhovah content. Kan nou koné ki nou priorité dan la vie, bann di-bien materiel ek bann plaisir pa vinn nou maitre. Au contraire, zot vinn couma nou bann serviteur, bann moyen ki aide nou pou adore Jéhovah. Plus nou actif pou soutenir Royaume Bondié, moins ena risk ki nou laisse l’esprit le monde domine nou.

Contigne “pense bann kitsoz spirituel”

19-21. Couma nou kapav contigne “pense bann kitsoz spirituel,” ek kifer nou bizin contigne faire sa?

¹⁹ Bann kitsoz ki nou pensé, c’est sa-mem ki nou faire. Seki beaucoup dimoune appel bann action sans reflechi, zot souvent bann action ki nou bann pensée charnel pousse nou pou faire. A cause sa, l’apotre Paul ti rappel nou l’importance pou veille bien lor nou pensée. Li ti ecrire: “Bann ki vive dapré la chair, pense bann kitsoz charnel, mais bann ki vive dapré l’esprit, pense bann kitsoz spirituel.”—Rom. 8:5.

²⁰ Ki nou kapav faire pou ki nou bann pensée, ek apré, nou bann action, zot pa dominé par l’esprit le monde? Nou bizin coumadir filtré bann kitsoz ki rente dan nou l’esprit ek, autant ki possible, faire zeffort pou empeche bann pensée le monde rente dan nou l’esprit. Par exemple, kan nou choisir nou bann divertissement, nou pa laisse bann programme ki encourage l’immoralité ek violence contamine nou l’esprit. Nou conscient ki l’esprit Bondié ki saint ou-soit pur pa pou reste dan enn l’esprit malprop. (Ps. 11:5; 2 Cor. 6:15-18) En plus, nou invite l’esprit saint Bondié pou reste dan nou l’esprit kan nou lire la Bible regulierement, kan nou faire la priere, kan nou medité ek kan nou assisté reunion. Ek aussi, nou travail ensam avek sa l’esprit-la kan nou preché regulierement.

²¹ Alors, li clair ki nou bizin resisté kont l’esprit le monde ek bann mauvais desir ki sa l’esprit-la pousse nou pou ena. Mais li vaut la peine nou faire sa parski, couma Paul dire: “Kan pense bann kitsoz charnel, sa vedir la mort, mais kan pense bann kitsoz spirituel, sa vedir la vie ek la paix.”—Rom. 8:6.

[Note]

Eski ou rappel?

• Ki nou bizin faire pou gagne l’esprit saint?

• Cite certain fason couma l’esprit le monde kapav influence nou.

• Couma nou kapav resisté kont l’esprit le monde?

[Zimage page 25]

Avant ou al travail ou-soit lekol, prié pou gagne l’esprit saint

[Zimage page 26]

Nou bizin garde nou bann pensée pur, reste toujours honnete kan nou faire business, ek equilibré dan nou bann l’habitude