Laisse-nou influencé par l’esprit Bondié, pa par l’esprit le monde

“Nou, nou pa finn recevoir l’esprit le monde, mais l’esprit ki sorti kot Bondié, pou nou kapav konn bann kitsoz ki Bondié finn content pou donne nou dan so bonté.”​—1 COR. 2:12.

1, 2. (a) Dan ki sens bann vrai chretien pé faire enn la guerre? (b) Ki bann question nou pou examiné?

BANN vrai chretien pé faire enn la guerre! Nou l’ennemi li puissant, li konn servi bann trik pou embete nou ek li ena beaucoup l’experience dan la guerre. Li ena enn zarme ki tellement efficace ki grace a sa, li finn reussi influence majorité dimoune. Mais fodé pa nou pensé ki nou pa kapav faire nanyin kont li ou-soit ki nou pena okenn l’espoir pou reussi. (Is. 41:10) Nou ena enn defense ki nou kapav servi ek sa defense-la kapav resisté ar n’importe ki l’attak.

² Nou la guerre li pa physik; li spirituel. Nou l’ennemi c’est Satan le Diable, ek enn zarme principal ki li servi c’est “l’esprit le monde.” (1 Cor. 2:12) Nou principal defense kont so bann l’attak c’est l’esprit Bondié. Pou nou reussi sorti vivant dan sa la guerre-la ek reste fort lor plan spirituel, nou bizin demann Bondié so l’esprit ek manifesté fruit sa l’esprit-la dan nou la vie. (Gal. 5:22, 23) Mais ki été l’esprit le monde, ek couma eski li’nn kapav ena enn grand l’influence coumsa? Couma nou kapav koné si l’esprit le monde pé influence nou? Ek ki nou kapav aprann ar Jésus lor seki nou bizin faire pou gagne l’esprit Bondié ek resisté kont l’esprit le monde?

Kifer l’esprit le monde inn fané partout?

3. Ki été l’esprit le monde?

³ L’esprit le monde sorti kot Satan, “chef sa le monde-la,” ek li kont l’esprit saint Bondié. (Jean 12:31; 14:30; 1 Jean 5:19) C’est l’attitude ki dominé dan sa le monde-la, ek li pousse bann dimoune pou agir. Sa la force-la amenn bann dimoune pou agir dan enn fason ki kont volonté ek projet Bondié.

4, 5. Couma l’esprit ki Satan encouragé inn fané partout?

⁴ Couma inn arrivé ki sa l’esprit ki Satan encouragé-la inn fané partout coumsa? D’abord, Satan ti embete Ève dan jardin Éden. Li ti convaink li ki si li independant ar Bondié sa pou ameliore so la vie. (Gen. 3:13) Li’nn vrai-mem montré ki li enn menteur! (Jean 8:44) Apré sa, a travers Ève, li ti tente Adam pou li desobeir Jéhovah. A cause choix ki Adam ti faire, l’humanité inn vinn esclave peché, ek coumsa tou bann dimoune finn herite tendance pou laisse-zot influencé par l’esprit desobeissance ki Satan encouragé.​—Lire Éphésiens 2:1-3.

⁵ Satan ti aussi influence enn quantité ange, ki’nn vinn bann demon. (Rév. 12:3, 4) C’est enn tipé avant deluge, dan lepok Noé, ki sa bann ange-la ti faire traitre ar Bondié. Sa bann ange-la ti croire ki zot ti pou pli bien si zot quitte position ki Bondié ti donne zot dan le ciel ek ki zot vinn lor la terre pou satisfaire, sans okenn controle, zot bann desir kont nature. (Jude 6) Avek l’aide sa bann demon ki’nn ré-vinn bann creature spirituel-la, Satan pé “mette tou bann dimoune lor la terre entier dan l’erreur.” (Rév. 12:9) Malheureusement, majorité bann dimoune pa conscient ki bann demon pé influence le monde.​—2 Cor. 4:4.

Eski l’esprit sa le monde-la pé influence ou?

6. Ki sel fason l’esprit le monde kapav contamine nou?

⁶ Beaucoup pa koné couma Satan pé influence bann dimoune, mais grace a la Bible, bann vrai chretien zot, zot konn sa. (2 Cor. 2:11) En realité, l’esprit le monde pa kapav influence nou a moins ki nou laisse li faire sa. Anou examine quatre question ki pou faire nou koné si nou pé laisse-nou influencé par l’esprit Bondié, ou-soit par l’esprit le monde.

7. Cite enn moyen ki Satan servi pou essaye eloigne-nou ar Jéhovah.

⁷ Bann divertissement ki mo choisir, ki sa montré lor moi? (Lire Jacques 3:14-18.) Satan pé essaye eloigne-nou ar Bondié kan li faire nou developpe l’amour pou la violence dan nou leker. Satan koné ki Jéhovah ena la haine pou enn kikenn ki content la violence. (Ps. 11:5) Alors, Satan essaye servi bann livre, bann film, bann la musik, bann video game pou satisfaire bann desir nou la chair. Certain parmi sa bann video game-la pousse bann dimoune pou joué role enn kikenn ki commette bann pratik immoral bien degradant ek pou ena enn comportement bien violent. Sa pa faire Satan nanyin si enn partie nou leker content seki bon tant ki enn lot partie content bann mauvais kitsoz ki li encouragé.​—Ps. 97:10.

8, 9. Ki bann question concernant nou divertissement nou bizin pose nou-mem?

⁸ Parkont, l’esprit Bondié pousse bann dimoune ki gagne sa l’esprit-la pou montré-zot pur, pacifik ek rempli ar misericorde. Li bon ki nou demann nou-mem: ‘Eski bann divertissement ki mo choisir encourage moi pou developpe bann bon qualité?’ Sagesse ki sorti kot Bondié, li “pa hypocrite.” Bann ki laisse l’esprit Bondié influence zot, pa preche la pureté ek la paix ar zot prochain ek apré prend plaisir pou guette bann scene violent ki bien cruel ek immoral dan zot lakaz.

⁹ Jéhovah demann enn l’attachement zis pou Li tousel. Mais Satan li, li pou satisfait si nou adore li zis enn sel fois, couma li ti demann Jésus pou faire. (Luc 4:7, 8) Nou kapav demann nou-mem: ‘Eski bann divertissement ki mo choisir permette moi pou donne Bondié enn l’attachement zis pou Li tousel? Eski choix ki mo faire rann sa pli difficile ou-soit pli facile pou mo resisté ar l’esprit le monde? Eski dan l’avenir mo pou bizin faire bann changement kan mo choisir mo bann divertissement?’

10, 11. (a) Concernant bann kitsoz materiel, ki l’attitude l’esprit le monde encouragé? (b) Ki l’attitude Parole Bondié encouragé?

¹⁰ Ki l’attitude mo ena lor bann kitsoz materiel? (Lire Luc 18:24-30.) L’esprit le monde pousse bann dimoune pou satisfaire “desir [zot] lizié” kan li encourage zot pou rod gagne toujours plus ek pou vinn materialiste. (1 Jean 2:16) Li finn pousse beaucoup pou developpe enn grand determination pou vinn riche. (1 Tim. 6:9, 10) Sa l’esprit-la faire nou croire ki si nou ena enn quantité kitsoz materiel, nou pou en securité pou touletan. (Prov. 18:11) Selman, si nou laisse l’amour pou l’argent prend place nou l’amour pou Bondié, Satan pou gagne enn victoire. Nou bizin demann nou-mem: ‘Eski mo priorité dan la vie c’est pou galope derriere bann kitsoz materiel ki pou rann mo la vie confortable ek ki pou faire moi plaisir?’

¹¹ Parkont, Parole ki l’esprit Bondié inn inspiré pou ecrire encourage nou pou ena enn l’attitude equilibré lor l’argent ek pou travail dur pou gagne seki nou ek nou famille bizin pou nou vive. (1 Tim. 5:8) L’esprit Bondié aide bann ki gagne sa l’esprit-la pou imite personnalité Jéhovah ek vinn genereux pareil couma Li. Pou zot, bann dimoune ena plus valeur ki bann kitsoz, ek zot ena la joie pou partage seki zot ena kan zot kapav faire li. (Prov. 3:27, 28) En plus, jamais zot pa laisse enn desir pou gagne beaucoup l’argent prend place zot service pou Bondié.

12, 13. Couma l’esprit Bondié kapav influence nou pou nou prop di-bien, contrairement ar l’esprit le monde?

¹² Mo personnalité reflecté ki l’esprit? (Lire Colossiens 3:8-10, 13.) L’esprit le monde encourage bann oeuvres de la chair. (Gal. 5:19-21) C’est pa kan tou pé marche bien mais kan ena bann difficulté ki lerla nou pou vrai-mem koné ki l’esprit ki pé influence nou. Par exemple, couma nou reagir kan enn frere ou-soit enn soeur ignore nou, offense nou, ou-soit mem faire enn peché kont nou? En plus, dan nou lakaz, fason ki nou traite seki vive avek nou kapav aussi montré ki l’esprit ki influence nou. Kitfois li bon ki nou examine nou-mem. Demann nou-mem: ‘Pendant sa six mois ki finn passé-la, eski mo personnalité ressemblé plus personnalité Christ ou-soit eski mo’nn ré-tombe dan bann mauvais l’habitude ki mo ti ena concernant fason mo kozé ek mo conduite?’

¹³ L’esprit Bondié kapav aide nou pou “tire vié personnalité lor [nou] ensam avek so bann pratik” ek pou mette “nouveau personnalité” lor nou. Sa pou aide nou pou vinn enn dimoune ki ena plus l’amour ek bonté. Sa pou pousse nou pou pardonne lezot avek tou nou leker, mem si nou ena enn raison valable pou ena enn kitsoz kont enn kikenn. Couma nou pou reagir si nou pensé ki ena l’injustice kont nou? Nou nepli pou explosé ek ‘vinn amer envers lezot, faire la rage, en colere, criyé, ek dire bann parole pou insulté lezot.’ Au contraire, nou pou faire bann grand zeffort pou “ena enn grand compassion” pou lezot.​—Éph. 4:31, 32.

14. Couma beaucoup dan le monde considere Parole Bondié?

¹⁴ Eski mo content ek mo respecté bann principe moral ki ena dan la Bible? (Lire Proverbes 3:5, 6.) L’esprit le monde encourage rebellion kont Parole Bondié. Bann ki influencé par sa l’esprit-la pa prend compte bann partie la Bible ki derange zot. Zot prefere plutot tradition ek philosophie bann dimoune. (2 Tim. 4:3, 4) Certain meprise tou seki ena dan Parole Bondié. Zot mette en doute l’importance ki la Bible ena ek zot douté si li vrai-mem exact, ek kan zot faire sa, zot vinn sage dan zot prop lizié. Zot diminué l’importance bann principe droite ki ena dan la Bible lor l’adultere, l’homosexualité ek divorce. Zot enseigné ki “seki bon, li mauvais ek seki mauvais, li bon.” (Is. 5:20) Eski sa l’esprit-la inn contamine nou? Kan nou gagne probleme, eski nou compte lor sagesse bann dimoune, seki implik aussi nou prop l’idée? Ou-soit eski nou faire zeffort pou suive bann conseil ki la Bible donné?

15. Au lieu ki nou compte lor nou prop sagesse, ki nou bizin faire?

¹⁵ L’esprit Bondié faire nou developpe respé pou la Bible. Pareil couma enn psalmiste, nou considere parole Bondié couma enn la lampe pou nou lipié ek enn la lumiere pou nou chemin. (Ps. 119:105) Au lieu ki nou compte lor nou prop sagesse, avek confiance nou compte lor Parole ki Bondié inn faire ecrire pou aide nou faire difference entre seki bon ek seki mauvais. Nou pa zis aprann pou respecté la Bible mais aussi pou content la loi Bondié.​—Ps. 119:97.

Aprann ar l’exemple Jésus

16. Ki sa impliké pou ena “pensée Christ”?

¹⁶ Pou nou gagne l’esprit Bondié, nou bizin faire zeffort pou ena “pensée Christ.” (1 Cor. 2:16) Pou nou ena ‘mem l’etat d’esprit ki Christ Jésus ti ena,’ nou bizin konn so fason pensé ek couma li ti agir, ek apré imite li. (Rom. 15:5; 1 Pierre 2:21) Anou examine deux-trois fason ki nou kapav faire sa.

17, 18. (a) Ki nou aprann ar Jésus lor la priere? (b) Kifer nou bizin “contigne demandé”?

¹⁷ Prié pou gagne l’esprit Bondié. Avant ki li ti passe par bann l’epreuve, Jésus ti prié pou ki l’esprit Bondié aide li. (Luc 22:40, 41) Nou aussi nou bizin demann Bondié so l’esprit saint. Avek generosité, Jéhovah content pou donne so l’esprit tou bann ki demann sa avek la foi. (Luc 11:13) Jésus ti dire: “Contigne demandé, ek pou donne zot; contigne rodé, ek zot pou trouvé; contigne tape la porte, ek pou ouvert pou zot. Parski n’importe kisannla ki demandé, gagné, n’importe kisannla ki rodé, trouvé, ek n’importe kisannla ki tapé, pou ouvert pou li.”​—Mat. 7:7, 8.

¹⁸ Kan nou rod l’esprit saint Jéhovah ek so l’aide, fodé pa ki nou perdi patience ek nou arrete demann sa apré enn ou deux coute. Kitfois nou bizin prié pou mem kitsoz plusieurs fois ek aussi passe plus le temps pou koz ar Jéhovah. Parfois, avant ki Jéhovah reponn bann ki prié Li, Li laisse zot montré ki quantité seki zot pé demandé important pou zot, ek si zot la foi li vrai-mem sincere.a

19. Ki Jésus ti faire touletan, ek kifer nou bizin imite li?

¹⁹ Obeir Jéhovah dan tou seki nou faire. Jésus ti touletan faire bann kitsoz ki faire plaisir so Papa. Enn fois, Jésus ti pensé ki li kapav affronte enn situation dan enn fason different ar seki so Papa ti envie. Pourtant, avek confiance li ti dire so Papa: “Ki to volonté li faire, mais pa mo volonté.” (Luc 22:42) Demann ou-mem: ‘Eski mo obeir Bondié mem kan li pa facile pou faire sa?’ Li important ki nou obeir Bondié pou nou gagne la vie. Nou bizin obeir Li dan tou kitsoz, parski c’est Li-mem ki finn faire nou ek Li-mem ki’nn donne nou la vie ek seki nou bizin pou vive. (Ps. 95:6, 7) Nanyin pa remplace l’obeissance. Sans l’obeissance nou pa kapav gagne faveur Bondié.

20. La vie Jésus ti tourne autour ki kitsoz, ek couma nou kapav imite li?

²⁰ Konn la Bible bien. Jésus ti cite bann l’Ecriture kan Satan ti attak so la foi dan enn fason direct. (Luc 4:1-13) Kan li ti faire face ar bann chef religieux ki ti opposé ar li, Jésus ti appuye-li lor Parole Bondié pou reponn zot. (Mat. 15:3-6) La vie Jésus ti tourne autour sa deux kitsoz-la: gagne connaissance lor la loi Bondié ek accompli sa la loi-la. (Mat. 5:17) Nou aussi nou envie contigne rempli nou l’esprit avek Parole Bondié ki fortifié nou la foi. (Phil. 4:8, 9) Sa kapav difficile pou certain parmi nou pou trouve le temps pou ena enn l’etude personnel ek en famille. Mais au lieu ki nou rod le temps, nou bizin trouve le temps.​—Éph. 5:15-17.

21. Ki disposition ou kapav profité pou konn Parole Bondié pli bien ek pou mette li en pratik?

²¹ “L’esclave fidele et avisé” inn aide nou pou ena le temps pou nou l’etude personnel ek familial kan li’nn prend disposition pou ki nou ena enn soirée chaque semaine pou nou l’etude familial. (Mat. 24:45) Eski ou pé profite sa disposition-la couma bizin? Pou aide ou pou ena “pensée Christ,” eski ou kapav ajoute dan ou programme l’etude bann kitsoz ki Jésus ti enseigné lor bann sujet ki ou content, ek etudié sa enn par enn chaque semaine? Ou kapav servi l’Index des publications Watch Tower (en français), pou trouve bann renseignement lor bann sujet ki ou ti pou content konn plus. Par exemple, en 2008 ek 2009, dan l’edition publik La Tour de Garde, (en français), ti ena enn serie huit lartik, “ Ce que nous apprenons de Jésus, “ ek en 2010, quatre lartik ki appel “ Ce que Jésus nous enseigne. “ Kitfois ou ti pou content servi sa bann lartik-la dan ou l’etude. Depuis 2006 ziska 2009, dan Réveillez-vous ! ti ena enn serie lartik “ Que répondriez-vous ? “ ek depuis 2010, sa serie-la appel “ Apprenons en famille. “ Sa quiz-la finn faire pou aide nou pou gagne enn pli grand connaissance ek ki pli profond lor Parole Bondié. Kifer eski de temps en temps, ou pa examine sa bann lartik-la pendant la soirée ki ou etudié en famille?

Nou kapav gagne la victoire lor le monde

22, 23. Ki nou bizin faire pou gagne la victoire lor le monde?

²² Pou ki l’esprit Bondié guide nou, nou bizin resisté ar l’esprit le monde. Mais li pa facile pou faire sa. Sa kapav enn vrai la lutte, enn la lutte bien difficile. (Jude 3) Mais nou kapav gagne la victoire! Jésus ti dire so bann disciple: “Dan le monde, zot pé gagne bann l’epreuve, mais prend courage! Mo finn gagne victoire lor le monde.”​—Jean 16:33.

²³ Nou aussi nou kapav gagne la victoire lor le monde si nou resisté kont so l’esprit ek nou faire tou seki nou kapav pou gagne l’esprit Bondié. Oui, “si Bondié avek nou, kisannla ki pou kont nou?” (Rom. 8:31) Kan nou gagne l’esprit Bondié ek kan nou suive so direction couma inn ecrire dan la Bible, nou pou gagne satisfaction, la paix, bonheur, ek l’assurance ki nou pou gagne la vie eternel dan le monde nouveau ki pré pou vini.

[Note]

Eski ou rappel?

• Kifer l’esprit le monde inn fané partout?

• Ki quatre question nou bizin pose nou-mem?

• Ki trois kitsoz nou aprann ar Jésus lor fason ki nou kapav gagne l’esprit Bondié?

[Zimage page 10]

Couma certain ange inn vinn bann demon?

[Zimage page 12]

Satan servi l’esprit le monde pou controle bann dimoune, mais nou kapav sorti enba so l’influence