Apprecié role Jésus en tant ki Grand Moïse
“Jéhovah pou faire enn prophete pareil couma moi levé parmi zot bann frere. Zot bizin ecoute li.”—ACTES 3:22.
1. Ki l’influence Jésus Christ inn ena lor l’histoire l’humanité?
ENA deux mille an, bann berger ti tann enn quantité ange dan le ciel loué Bondié concernant naissance enn garson. (Luc 2:8-14) Trente an plitar, sa zenfant-la inn vinn enn adulte ek li’nn commence enn ministere ki’nn dure zis trois an et demi mais ki pourtant inn change l’histoire l’humanité. Philip Schaff, enn historien ki’nn vive dan 19eme siecle, ti dire ki sans ki sa jeune homme-la inn bizin ecrire enn sel la ligne, li’nn inspire beaucoup dimoune pou ecrire bann livre, bann chanté, bann sermon; li’nn inspire aussi beaucoup artiste. Sa montré ki li finn ena enn grand l’influence lor l’histoire l’humanité. Sa jeune homme extraordinaire-la bien sur c’est Jésus Christ.
2. Ki l’apotre Jean ti dire lor la vie ek lor ministere Jésus?
2 L’apotre Jean ti ecrire enn recit lor ministere Jésus ek li ti tire sa conclusion-la: “En realité, ena encore beaucoup lezot kitsoz ki Jésus inn faire, si ti bizin ecrire zot en detail, mo pensé ki le monde li-mem pa ti pou kapav garde tou sa bann rouleau-la.” (Jean 21:25) Jean ti koné ki li ti pou kapav ecrire zis enn ti partie lor seki Jésus ti dire ek ti faire pendant sa trois an et demi ki li ti accompli so ministere-la. Mais kan-mem, bann l’evenement historik ki Jean inn ecrire dan so l’Evangile ena enn grand valeur pou nou.
3. Ki kapav aide nou pou comprend pli bien role Jésus dan projet Bondié?
3 A part quatre recit bien important, setadir bann l’Evangile, ena lezot texte la Bible ki donne bann detail lor la vie Jésus ki fortifié nou la foi. Par exemple, la vie certain zom fidele ki finn vive avant Jésus aide nou pou comprend pli bien role ki li ena dan projet Bondié. Anou considere deux trois l’exemple.
Bann zom fidele dan le passé ki’nn represente Jésus
4, 5. Kisannla ti represente Jésus, ek dan ki fason?
4 Jean ek trois ecrivain bann lezot l’Evangile, ti montré ki Moïse, David, ek Salomon ti represente Jésus, ki Bondié ti oint ek ki Li ti choisir pou vinn le Roi. Dan ki fason sa bann serviteur Bondié-la ti represente Jésus? Ki leson nou kapav aprann ar zot la vie?
5 Zis pou mentionne certain role, la Bible dire nou ki Moïse ti enn prophete, enn mediateur ek enn sauveur. Jésus aussi pareil. David ti enn berger ek enn le roi ki ti gagne la victoire lor bann l’ennemi nation Israël. Jésus li aussi li enn berger ek enn le roi ki gagne la victoire. (Ézék. 37:24, 25) Tant ki Salomon ti fidele envers Jéhovah, li ti enn le roi ki ti ena la sagesse ek ti ena la paix dan so Royaume. (1 Rois 4:25, 29) Jésus aussi li bien-bien sage ek la Bible appel li “Prince la paix.” (Is. 9:6) Oui, li clair ki Jésus Christ ti rempli mem fonction ki sa bann serviteur fidele dan le passé-la. Mais place ki Jésus ena dan projet Bondié li beaucoup pli grand. Premierement, anou compare Jésus avek Moïse ek nou guetté couma sa kapav aide nou pou comprend pli bien role ki Jésus ena dan projet Bondié.
Moïse ti represente Jésus
6. Couma l’apotre Pierre ti montré ki li ti bien important pou ecoute Jésus?
6 Enn tipé apré la Pentecôte l’an 33 nou lepok, l’apotre Pierre ti cite enn prophetie ki Moïse ti dire ek ki’nn realisé lor Jésus Christ. Pierre ti pé debouté devant enn la foule adorateur Jéhovah dan temple. Sa bann dimoune-la ti “extra etonné” kan Pierre ek Jean ti gueri enn mendiant ki ti boiteux depuis so naissance, ek zot tou ti galopé pou al guetté ki pé arrivé. Alors Pierre ti explik zot ki sa mirak-la ti arrivé grace a l’esprit saint Jéhovah ki ti agir a travers Jésus Christ. Apré sa, li ti cite bann l’Écriture hébraïques ek li ti dire: “En realité, Moïse ti dire: ‘Jéhovah pou faire enn prophete pareil couma moi levé parmi zot bann frere. Zot bizin ecoute li dapré tou seki li pou dire zot.’ ”—Actes 3:11, 22, 23; lire Deutéronome 18:15, 18, 19.
7. Kifer bann dimoune ki ti pé ecoute Pierre ti kapav comprend seki li ti dire concernant enn prophete pli grand ki Moïse?
7 Apparemment, bann ki ti pé ecoute Pierre ti bien konn sa bann parole Moïse-la. En tant ki bann Juif, zot ti ena enn grand respé pou Moïse. (Deut. 34:10) Zot ti pé attann avek impatience l’arrivée enn prophete pli grand ki Moïse. Sa prophete-la pa ti pou zis enn messie, setadir enn kikenn ki Bondié ti choisir couma Moïse, mais li ti pou le Messie, “Christ, Sa Kikenn ki [Jéhovah] inn choisir-la.”—Luc 23:35; Héb. 11:26.
Bann point ki pareil entre Jésus ek Moïse
8. Ki bann point ki pareil entre la vie Moïse ek la vie Jésus?
8 Dan certain domaine, la vie ki Jésus ti ena lor la terre ti ressemblé la vie Moïse. Par exemple, alors ki Moïse ek Jésus ti encore tibaba, zot toulé-deux ti sap dan la mort kan enn dirigeant cruel ti faire enn massacre. (Ex. 1:22–2:10; Mat. 2:7-14) En plus, toulé-deux ti “sorti dan l’Égypte.” Prophete Hoshéa ti dire: “Kan Israël ti encore jeune, mo ti content li, ek mo’nn faire mo garson sorti dan l’Égypte.” (Hosh. 11:1) Sa bann parole Hoshéa-la ti concerne lepok kan nation Israël ti sorti dan l’Égypte, enba direction Moïse ki Jéhovah ti choisir. (Ex. 4:22, 23; 12:29-37) Selman, bann parole Hoshéa pa ti concerne zis enn l’evenement ki ti arrivé dan le passé, mais aussi enn l’evenement ki ti pou arrivé dan l’avenir. Sa bann parole-la ti enn prophetie ki ti realisé kan Joseph ek Marie ti sorti dan l’Égypte avek Jésus apré la mort le roi Hérode.—Mat. 2:15, 19-23.
9. (a) Ki bann mirak Moïse ek Jésus ti faire? (b) Cite lezot ressemblance ki ena entre Jésus ek Moïse. (Guette l’encadré “Lezot point ki pareil entre Jésus ek Moïse,” page 26.)
9 Moïse ek Jésus toulé-deux ti faire bann mirak ek par sa zot ti prouvé ki zot ti ena soutien Jéhovah. Dapré la Bible, Moïse ti premier dimoune ki’nn faire bann mirak. (Ex. 4:1-9) Par exemple, Moïse ti faire bann mirak ki ti ena enn rapport avek de l’eau. Li ti donne l’ordre pou ki de l’eau Nil ek so bann reservoir ki ti couvert ar roseaux vinn di-sang, ki la mer Rouge ouvert en deux, ek ki de l’eau sorti dan enn roche dan desert. (Ex. 7:19-21; 14:21; 17:5-7) Jésus aussi ti faire bann mirak ki ti ena enn rapport avek de l’eau. Premier mirak ki li ti faire, li ti change de l’eau en di-vin pendant enn reception mariage. (Jean 2:1-11) Plitar, li ti calmé la mer Galilée ki ti bien mauvais. Ek dan enn lot moment, li ti mem marche lor de l’eau! (Mat. 8:23-27; 14:23-25) Ou pou trouve lezot point ki pareil entre Moïse ek Jésus, dan l’encadré page 26.
Christ: enn prophete
10. Ki été enn vrai prophete ek kifer Moïse ti sa qualité prophete-la?
10 La plupart dimoune pensé ki enn prophete c’est enn kikenn ki annonce seki pou arrivé dan l’avenir, mais sa c’est zis enn partie so responsabilité. Enn vrai prophete c’est enn porte-parole Jéhovah ki annonce “bann kitsoz extraordinaire lor Bondié.” (Actes 2:11, 16, 17) Parmi bann kitsoz ki li faire, enn prophete ti kapav annonce bann l’evenement ki pou arrivé dan l’avenir, revele bann l’aspect precis lor projet Jéhovah, ou-soit proclame bann jugement Bondié. Moïse ti enn prophete coumsa: li ti annonce chaque dix plaie ki ti vinn lor l’Égypte; lor montagne Sinaï, li ti faire le peuple konn l’alliance la Loi; ek li ti enseigne zot volonté Bondié. Pourtant, ti pou ena enn prophete pli grand ki Moïse ki ti pou bizin vini.
11. Couma Jésus ti enn prophete pli grand ki Moïse?
11 Plitar, dan premier siecle nou lepok, Zekaria ti annonce enn prophetie ki concerne projet Jéhovah en rapport avek so garson, Jean. (Luc 1:76) Sa garson-la ti vinn Jean le Baptiste, ki ti annonce l’arrivée enn pli grand prophete ki Moïse ki tou bann Juif ti pé attann—Jésus Christ. (Jean 1:23-36) En tant ki prophete, Jésus ti annonce beaucoup kitsoz. Par exemple, li ti koz lor so la mort, li ti annoncé couma li ti pou mort, ki coté ek kisannla ki ti pou touye li. (Mat. 20:17-19) Bann dimoune ki ti ecoute li ti etonné kan li ti annonce aussi destruction Jérusalem ek so temple. (Marc 13:1, 2) So bann prophetie concerne nou lepok aussi.—Mat. 24:3-41.
12. (a) Couma Jésus ti pose enn base pou l’activité predication dan le monde entier? (b) Couma nou kapav suive l’exemple Jésus zordi?
12 A part so role prophete, Jésus ti aussi enn predicateur ek enn enseignant. Li ti preche la bonne nouvelle lor Royaume Bondié ek personne pa ti koz avek autant l’assurance ki li. (Luc 4:16-21, 43) Personne pa ti enn enseignant couma li. Certain ki ti tann li, ti dire: “Jamais enn lot zom pa finn koz coumsa.” (Jean 7:46) Jésus ti zelé pou partage la bonne nouvelle partout, ek li ti faire so bann disciple ena mem zele ki li. Coumsa, li’nn pose enn base pou l’activité predication ek l’enseignement dan le monde entier ek sa encore pé contigné zordi. (Mat. 28:18-20; Actes 5:42) L’année derniere, apepré sept million disciple Christ ti passe plus ki 1,500,000,000 l’heure pou preche la bonne nouvelle lor Royaume Bondié ek pou enseigne bann dimoune interessé bann verité biblik. Eski ou participe avek zele dan sa l’activité-la?
13. Ki pou aide nou pou “reste lor nou garde”?
13 Pena okenn doute ki Jéhovah inn realise sa prophetie ki ti annonce enn prophete pareil couma Moïse-la. Ki l’effet sa connaissance-la ena lor ou? Eski sa pa faire ou ena plus confiance dan realisation lezot prophetie ki Bondié inn inspiré ki concerne nou l’avenir? Si nou medite lor l’exemple ki Grand Moïse inn donne nou, sa pou aide nou pou “reste lor nou garde ek garde nou bon sens” en rapport avek seki Bondié pou faire bientot.—1 Thess. 5:2, 6.
Christ: enn mediateur
14. Couma Moïse ti servi couma enn mediateur entre bann Israélite ek Bondié?
14 Pareil couma Moïse, Jésus ti enn mediateur. Enn mediateur agir couma enn intermediaire entre deux partie. Moïse ti mediateur l’alliance la Loi entre Jéhovah ek bann Israélite. Si bann descendant Jacob ti obeir bann la loi Bondié, Li ti pou contigne garde zot couma so “di-bien special,” so congregation. (Ex. 19:3-8) Sa l’alliance-la ti reste en vigueur depuis 1513 avant nou lepok, ziska premier siecle nou lepok.
15. Kifer Jésus li enn mediateur pli grand ki Moïse?
15 En l’an 33 n.l., Jéhovah ti etabli enn pli bon l’alliance avek enn nouveau Israël, “Israël Bondié,” ki’nn vinn congregation mondial bann chretien oint. (Gal. 6:16) Alors ki dan l’alliance kot Moïse ti mediateur, Bondié ti ecrire bann la loi lor bann tablette roche, l’alliance kot Jésus mediateur li pli grand. Kifer? Parski Bondié ecrire bann la loi sa nouveau l’alliance-la lor leker bann dimoune. (Lire 1 Timothée 2:5; Hébreux 8:10.) Sa vedir ki asterla, “Israël Bondié” li di-bien special Bondié, ‘enn nation ki rapporte bann fruit’ Royaume messianik. (Mat. 21:43) Bann membre sa nation spirituel-la zot bann participant dan sa nouveau l’alliance-la. Mais kan-mem, zot pa tousel pou gagne bann bienfait ar sa l’alliance-la. Enn quantité dimoune, parmi beaucoup ki’nn mort, pou gagne bann benediction eternel grace a sa l’alliance extraordinaire-la.
Christ: enn sauveur
16. (a) Dan ki circonstance Jéhovah ti servi Moïse pou delivré nation Israël? (b) Dapré Exode 14:13, kisannla ki ti sauve bann Israélite?
16 Dernier la nuit avant ki nation Israël quitte l’Égypte, certain zenfant Israélite ti dan enn grand danger. Ange Bondié ti pou passe partout en Égypte pou touye tou bann premier-né. Jéhovah ti dire Moïse ki bann premier-né bann Israélite ti pou sapé si zot ti prend inpé di-sang sa l’agneau ki zot ti servi pou Pâque-la ek passe sa la-haut ek lor deux montant la porte zot lakaz. (Ex. 12:1-13, 21-23) C’est seki finn passé. Plitar, c’est nation-la en entier ki ti en danger. Zot ti coumadir dan enn piege entre la mer Rouge ek l’armée bann Égyptien ki ti pé poursuive zot. Encore enn fois, Jéhovah ti sauve zot par Moïse, ki ti faire enn mirak kan li ti ouvert la mer Rouge en deux.—Ex. 14:13, 21.
17, 18. Cite bann raison kifer Jésus li enn pli grand sauveur ki Moïse.
17 Li vrai ki sa bann delivrance ki Jéhovah ti faire en faveur so peuple-la zot ti vrai-mem grand. Mais delivrance ki Jéhovah faire par Jésus li pli grand encore. Grace a Jésus, bann dimoune obeissant zot delivré ar l’esclavage peché. (Rom. 5:12, 18) Ek sa delivrance-la li “enn delivrance eternel.” (Héb. 9:11, 12) Nom Jésus donne l’idée ki Jéhovah enn Sauveur. Jésus li nou Sauveur, pa zis parski li sauve nou ar bann peché ki nou finn faire dan le passé, mais aussi parski li donne nou possibilité pou konn enn pli bon l’avenir. Kan Jésus sauve so bann disciple ar l’esclavage peché, li delivré zot ar colere Bondié ek faire zot gagne bann bon relation avek Jéhovah.—Mat. 1:21.
18 Kan ler pou arrivé, sa delivrance ar peché-la pou delivré nou ar consequence peché, setadir—maladie ek mem la mort. Nou kapav faire vision couma sa pou été si nou maziné seki ti arrivé kan Jésus ti al dan lakaz Jaïrus, enn missié ki ti perdi so tifi 12 an. Jésus ti donne sa l’assurance-la Jaïrus: “Pa peur, ena zis la foi, ek li pou sauvé.” (Luc 8:41, 42, 49, 50) Pareil couma Jésus ti dire, tifi-la ti ressuscité! Eski ou kapav mazinn la joie ki so bann parent ti ressenti? Si oui, ou kapav mazinn la joie extraordinaire ki nou pou ena kan “tou seki dan bann tombe souvenir pou tann so la voix [la voix Jésus] ek pou sorti” kan pou ena la resurrection. (Jean 5:28, 29) Oui, Jésus li vrai-mem enn Sauveur, nou Sauveur!—Lire Actes 5:31; Tite 1:4; Rév. 7:10.
19, 20. (a) Ki bienfait nou gagné si nou medite lor role Jésus en tant ki Grand Moïse? (b) Ki nou pou examiné dan prochain lartik?
19 Si nou conscient ki nou kapav aide bann dimoune pou profite tou seki Jésus inn faire pou sauve nou, sa pou pousse nou pou preché ek pou enseigne bann dimoune. (Is. 61:1-3) En plus, kan nou medite lor role Jésus en tant ki pli Grand Moïse, sa faire nou ena plus confiance ki li pou sauve so bann disciple kan li pou vini pou faire jugement Bondié lor bann mauvais dimoune.—Mat. 25:31-34, 41, 46; Rév. 7:9, 14.
20 Oui, Jésus li-mem Grand Moïse. Li’nn faire bann kitsoz extraordinaire ki jamais Moïse pa ti pou kapav faire. Seki Jésus inn dire en tant ki enn prophete ek seki li’nn faire en tant ki enn mediateur ena enn grand l’influence lor tou bann dimoune lor la terre. En tant ki enn Sauveur, Jésus donne l’humanité enn delivrance eternel, pa temporaire. Pourtant, ena encore beaucoup kitsoz ki nou kapav aprann lor Jésus grace a bann zom fidele ki’nn vive dan le passé. Dan prochain lartik, nou pou examiné couma Jésus ti aussi Grand David ek Grand Salomon.
Eski ou kapav expliké?
Couma Jésus li pli grand ki Moïse en tant ki
• prophete?
• mediateur?
• sauveur?
[L’encadré lor page 26]
Lezot point ki pareil entre Jésus ek Moïse
◻ Toulé-deux ti quitte enn grand position pou servi Jéhovah ek so peuple.—2 Cor. 8:9; Phil. 2:5-8; Héb. 11:24-26.
◻ Toulé-deux ti servi couma bann ‘oint’ setadir ‘christ.’—Marc 14:61, 62; Jean 4:25, 26; Héb. 11:26.
◻ Toulé-deux ti represente nom Jéhovah.—Ex. 3:13-16; Jean 5:43; 17:4, 6, 26.
◻ Toulé-deux ti manifesté l’humilité.—Nomb. 12:3; Mat. 11:28-30.
◻ Bondié ti servi toulé-deux pou nourri bann grand la foule.—Ex. 16:12; Jean 6:48-51.
◻ Toulé-deux ti juge ek ti donne bann la loi.—Ex. 18:13; Mal. 4:4; Jean 5:22, 23; 15:10.
◻ Toulé-deux ti en charge lakaz Bondié.—Nomb. 12:7; Héb. 3:2-6.
◻ La Bible decrire toulé-deux couma bann fidele temoin Jéhovah.—Héb. 11:24-29; 12:1; Rév. 1:5.
◻ Bondié ti faire lekor Moïse ek Jésus disparette apré zot la mort.—Deut. 34:5, 6; Luc 24:1-3; Actes 2:31; 1 Cor. 15:50; Jude 9.