Eski nou kapav comprend la Bible?

“Nou famille ti lire la Bible toulé dimanche. Mo ti lire li, oui, mais ki a faire. Mo ti croire ki la Bible c’est Parole Bondié, mais trois-quart seki mo ti lire ti bien difficile pou comprend.”—Steven, Angleterre.

“Kan mo ti ena 17 an, mo ti essaye lire la Bible. Mo ti trouve sa difficile pou comprend, alors mo ti arreté.”—Valvanera, Espagne.

“Mo ti lire la Bible enn fois parski mo ti pensé ki en tant ki enn catholique, mo ti bizin lire li. Mo ti prend trois an pou fini! Mais mo pa ti comprend preské nanyin”—Jo-Anne, Australie.

LA Bible li encore toujours livre pli populaire ek ki plus vendé dan le monde. Zordi plus ki jamais, de plus en plus dimoune kapav gagne enn la Bible dan pli beaucoup langue, ek dan different forme, couma par exemple lor bann cassette, CD ou-soit DVD. Pourtant, beaucoup dimoune ki ena enn la Bible, zot trouve sa livre-la difficile pou comprend. Eski ou aussi ou ena mem sentiment?

Eski sa Kikenn ki finn faire ecrire la Bible-la envie ki nou comprend so Parole?

La Bible dire: “Tou l’Ecriture finn inspiré par Bondié.” (2 Timothée 3:16) Oui, c’est Jéhovah ki finn faire ecrire la Bible. Eski Li envie ki nou comprend so Parole? Ou-soit eski par expré Li’nn faire ki la Bible li enn livre ki impossible pou comprend, sauf pou enn ti groupe dimoune ki ena enn certain position, couma bann pretre ek bann ki expert dan la Bible?

Anou examine sa bann verset ki trouve dan la Bible-la:

“Sa commandement ki mo pé commann toi pou suive zordi-la li pa trop difficile pou toi, ni li trop loin.”—Deutéronome 30:11.

“Revelation to bann parole donne la lumiere, ek li faire bann dimoune ki pena l’experience comprend.”—Psaume 119:130.

“Sa l’heure-la mem [Jésus] ti rempli ar la joie dan l’esprit saint, ek li ti dire: ‘Mo loué toi devant tou dimoune, Papa, Seigneur le ciel ek la terre, parski to finn bien cachiette sa bann kitsoz-la ar bann dimoune ki ena la sagesse ek ar bann intellectuel, ek to finn faire bann tibaba konn sa.’ ”—Luc 10:21.

Sa bann verset-la montré nou ki Bondié, ki finn faire ecrire la Bible envie ki ou comprend so Parole! Pourtant, beaucoup dimoune sincere trouve sa livre-la difficile pou comprend. Ki kapav aide zot? Bann prochain lartik montré trois moyen ki kapav aide ou pou comprend la Bible.