Couma ou kapav comprend la Bible

Kan explorateur John Eyre ti faire enn longue voyage bien difficile a travers la Plaine Nullarbor, bann aborigene ki ti vive dan sa l’endroit-la ti montré li couma pou tire de l’eau dan di-sable ek dan bann pié eucalyptus. Parski John Eyre ti accepté l’aide sa bann dimoune ki ti konn sa l’endroit-la, plitar sa finn sauve so la vie.

SA L’EXEMPLE-LA montré nou ki pou nou kapav fini enn travail ki difficile ek reussi sa travail-la, souvent nou bizin gagne l’aide avek enn dimoune ki ena plus l’experience. Kan nou commence lire la Bible aussi li pareil.

Jésus pa ti attann ki so bann disciple comprend la Bible sans gagne l’aide ar lezot. Enn fois, “li ti bien ouvert zot l’esprit pou ki zot comprend signification bann l’Ecriture.” (Luc 24:45) Jésus ti koné ki bann dimoune ki lire la Bible bizin l’aide pou kapav comprend bann l’enseignement ki ena ladan.

Gagne l’aide ar kisannla?

Jésus ti donne l’ordre so bann vrai disciple pou donne sa l’aide-la. Avant ki li monte dan le ciel, Jésus ti donne sa l’ordre-la: “Alors, allé ek faire bann disciple parmi bann dimoune dan tou bann nation, . . . enseigne zot pou suive tou bann commandement ki mo’nn donne zot.” (Matthieu 28:19, 20) Travail principal ki bann chretien inn gagné c’est pou enseigné, sa vedir ki zot bizin explik lezot couma zot kapav applik bann principe la Bible dan zot la vie toulé-jour. Bann vrai chretien aide lezot pou comprend la Bible.

Enn tipé apré ki Jésus ti donne so bann disciple sa l’ordre-la, enn l’evenement interessant ti arrivé. La Bible koz lor enn fonctionnaire ki ti sorti l’Égypte ki ti pé lire enn partie dan prophetie Isaïe. Mais li ti arrive lor enn passage ki li pa ti pé comprend. Dapré recit ki trouve dan la Bible, sa bann verset ki li pa ti pé comprend-la dire: “Pareil couma enn mouton, finn amenn li pou al touyé, ek pareil couma enn agneau ki pa pé criyé devant sa kikenn ki pé coupe so la laine-la, coumsa-mem li pa ouvert so la bouche. Kan ti pé humilié li, li pa’nn gagne enn jugement couma bizin. Kisannla pou raconte bann detail concernant so generation? Parski pé tire so la vie lor la terre.”—Actes 8:32, 33; Isaïe 53:7, 8.

Sa fonctionnaire-la ti demann Philippe, enn chretien ki ti ena l’experience ek ki ti bien konn bann l’Ecriture: “Lor kisannla sa prophete-la pé dire sa? Lor li-mem ou-soit lor enn lot dimoune?” (Actes 8:34) Sa Éthiopien ki ti sincere-la ti fini al Jérusalem pou adore Bondié, ek kitfois li ti prié pou gagne enn direction. Li clair, ki c’est avek enn grand desir pou comprend seki’nn ecrire ek avek l’humilité ki li ti pé lire. Mais selman fonctionnaire-la pa ti pé comprend sa passage-la. Avek humilité, li ti demann Philippe pou aide li. L’explication ki Philippe ti donné ti tellement faire sa missié-la content ki sa ti pousse li pou vinn enn chretien li aussi.—Actes 8:35-39.

Bann Témoins de Jéhovah contigne sa travail ki Philippe ek bann lezot premier chretien ti faire-la. Dan plus ki 235 pays, bann Témoins volontairement aide lezot pou comprend seki la Bible enseigné vrai-mem. Zot faire sa par enn l’etude kot examine bann l’Ecriture sujet par sujet. Dapré sa method-la, nou examine seki la Bible dire lor enn sujet precis, ek kan nou fini nou prend enn lot.a—Guette l’encadré “Bann bon reponse pou bann question la Bible.”

“Mo’nn gagne enn reponse pou tou mo bann question”

Steven, Valvanera, ek Jo-Anne, ki ti cité dan premier lartik, ti commence etudié la Bible avek bann Témoins de Jéhovah. Steven dire: “Mo ti impressionné pou trouvé ki souvent nou ti ena zis pou compare plusieurs recit ou-soit plusieurs principe la Bible, pou gagne reponse ki nou ti pé rodé. Avant ki mo ti etudié la Bible, personne pa ti montré moi couma pou faire sa. Sa ti enn grand soulagement pou trouvé ki li pa necessaire ki nou faire bann grand-grand debat ek ki sakenn ena bann l’opinion different lor Bondié ek lor la Bible.”

Valvanera d’accord avek sa. Li dire: “Tou kitsoz ti logik ek sans contradiction. Bann kitsoz ti vrai, pa zis parski ‘l’Eglise’ ti dire sa, mais parski ti ena enn l’explication logik pou tou kitsoz.” Jo-Anne raconté: “Parski tou mo bann question ti gagne enn reponse dan la Bible sa ti faire moi ena enn grand respé pou sa Kikenn ki finn faire ecrire la Bible-la, parski Li ti koné ki bann dimoune pou ena beaucoup question ki pou troublé zot ek Li finn faire sur ki ena bann bon reponse dan la Bible.”

Si ou konn enn Témoin de Jéhovah, kifer ou pa demann li montré ou couma sa l’etude la Bible-la deroulé? Si ou pa konn okenn Témoin de Jéhovah, pa hesité pou ecrire lor enn bann l’adresse ki trouve lor page 2 sa magazine-la. Grace a l’esprit saint Bondié, enn l’esprit ouvert, ek l’aide enn dimoune ki bien konn la Bible, Parole Bondié pou nepli enn livre difficile pou comprend. Ou kapav comprend la Bible!

[Note]

[L’encadré lor page 8]

Bann bon reponse pou bann question la Bible

Sa c’est certain sujet ki bann Témoins de Jéhovah examiné dan zot programme l’etude la Bible:

• Ki projet Bondié ena pou la terre?

• Kot-sa bann dimoune mort été?

• Eski nou pé vive dan bann “dernier jour”?

• Kifer Bondié laisse dimoune souffert?

• Couma mo kapav ena enn la-vie famille ki heureux?

[Zimage lor page 7]

Pou comprend la Bible . . . prié pou gagne l’esprit Bondié, lire avek enn l’esprit ouvert, accepté l’aide lezot