L’esprit saint—C’est enn la force ki ou bizin dan ou la vie

“PA REJETTE moi, ek pa tire to l’esprit saint lor moi.” (Psaume 51:11) Le roi David ti faire sa la priere sincere-la apré ki li ti’nn faire enn peché bien grave.

David finn souvent senti la force l’esprit saint dan so la vie. Letan li ti encore enn adolescent, sa l’esprit-la ti permette li vaink Goliath—enn soldat ki ti faire peur. (1 Samuel 17:45-50) Sa l’esprit-la finn aussi permette li ecrire certain parmi bann plus joli psaume ki jamais finn ecrire. David ti reconette: “C’est l’esprit Jéhovah ki ti koz par moi, ek so parole ti lor mo la langue.”—2 Samuel 23:2.

Jésus Christ li-mem ti confirme role ki l’esprit saint ti joué dan la vie David. Enn fois Jésus ti dire bann ki ti pé ecoute li: “Par l’esprit saint David li-mem ti dire: ‘Jéhovah ti dire mo Seigneur: “Assize dan mo coté droite ziska ki mo mette to bann l’ennemi enba to lipié.” ’ ” (Marc 12:36; Psaume 110:1) Jésus ti koné ki kan David ti ecrire so bann psaume, l’esprit saint ti guide li. Eski nou aussi nou kapav gagne l’aide sa mem l’esprit saint-la?

“Contigne demandé, ek pou donne zot”

Kitfois jamais ou pou ecrire enn psaume. Mais pareil couma David, ou aussi kitfois ou bizin faire face ar bann difficulté bien grand pareil couma sa grand Goliath-la. Prend l’exemple Isabel.a So mari ti quitte li pou prend enn madame pli jeune. Li ti laisse li avek enn gros dette, ek li pa ti donne li nanyin lor plan financier pou aide li elevé zot deux jeune tifi. Li dire: “Mo ti senti ki li’nn trahir moi ek li ti traite moi couma enn nanyin ditou. Mais malgré sa, depuis ki li’nn quitte moi, mo’nn senti ki l’esprit saint Bondié finn toujours soutenir moi.”

Eski Isabel ti attann pou gagne l’esprit saint automatiquement, sans ki li faire okenn zeffort? Non, toulé-jour li ti suppliyé Bondié pou donne li so l’esprit. Li ti koné ki li ti bizin la force Bondié pou aide li faire face ar l’avenir avek courage, pou prend soin so bann zenfant couma bizin, ek pou ki li recommence ena respé pou li-mem. Li ti suive conseil Jésus: “Contigne demandé, ek pou donne zot; contigne rodé, ek zot pou trouvé; contigne tape la porte, ek pou ouvert pou zot.”—Matthieu 7:7.

Roberto aussi ti senti ki li ti bizin l’esprit Bondié, mais pou enn lot raison. Li ti vinn esclave tabac ek gandia, ki li ti fumé toute longue la journée. Pendant deux an li ti faire beaucoup zeffort pou arrete fumé, mais plusieurs fois li ti recommence fumé. Roberto expliké: “Kan to arrete prend la drogue to senti enn l’angoisse terrible. Toulé-jour to lekor contigne rod sa la drogue-la.”

Roberto dire aussi: “Mais mo ti bien decidé pou change mo la vie pou ki mo kapav servi Bondié dan enn fason ki Li accepté. Mo ti faire zeffort pou rempli mo l’esprit avek bann pensé positif ki ena dan la Bible. Toulé-jour mo ti suppliyé Bondié, pou Li donne moi la force pou mette l’ordre dan mo la vie. Mo ti koné ki mo pa ti pou reussi tousel. Ek mo ti trouvé couma Jéhovah ti reponn mo bann la priere, surtout kan mo ti decouragé chaque fois ki mo ti recommence fumé. Mo pensé ki c’est l’esprit saint Bondié ki a chaque fois ti redonne moi la force; sans so l’esprit jamais mo ti pou kapav arrete sa mauvais l’habitude-la.”—Philippiens 4:6-8.

Pé monte dan l’air “avek bann lezel couma bann l’aigle”

Pareil couma Isabel ek Roberto, plusieurs million Témoins de Jéhovah finn senti la force l’esprit saint dan zot la vie. Si ou envie, ou aussi ou kapav gagne la force actif Jéhovah—sa la force ki derriere creation l’univers-la. Bondié ena enn grand desir ek Li disposé pou donne ou so l’esprit si ou contigné demann Li sa. Mais pou gagne sa l’esprit-la, ou bizin aprann la verité lor Li ek faire zeffort pou faire so volonté avek tou ou leker.—Isaïe 55:6; Hébreux 11:6.

Grace a l’influence ki l’esprit saint kapav ena lor ou, ou kapav gagne la force pou vive en accord avek bann principe Bondié ek pou faire face ar n’importe ki difficulté ki ou kapav gagné dan ou la vie. C’est seki la Bible assure nou: “[Jéhovah] donne la force seki fatigué; ek enn kikenn ki pena okenn l’energie actif, Li faire li gagne la force en abondance. . . . Bann ki ena l’espoir en Jéhovah pou regagne la force. Zot pou monte dan l’air avek bann lezel couma bann l’aigle. Zot pou galopé ek zot pa pou perdi zot la force; zot pou marché ek zot pa pou fatigué.”—Isaïe 40:28-31.

[Note]

[Commentaire page 8]

‘Toulé-jour mo ti suppliyé Bondié, pou Li donne moi la force. Mo ti koné ki mo pa ti pou reussi tousel. Ek mo ti trouvé couma Li ti reponn mo bann la priere.’

[L’encadré page 7]

L’ESPRIT SAINT EN ACTION

Bondié ti servi l’esprit saint pou crée la terre ek le reste l’univers. Enn ecrivain psaume ti dire: “To’nn faire beaucoup kitsoz, o Jéhovah! To’nn faire zot tou avek sagesse. La terre rempli ar seki to’nn faire. . . . Si to envoye to l’esprit, zot crée.”—Psaume 104:24, 30; Genèse 1:2; Job 33:4.

L’esprit saint ti inspire bann zom fidele pou ecrire la Bible. L’apotre Paul ti ecrire: “Tou l’Ecriture finn inspiré par Bondié, ek li utile.” (2 Timothée 3:16) Mot grec ki finn traduire par “inspiré par Bondié” vedir litteralement “soufflé par Bondié.” Souffle, ou-soit l’esprit Jéhovah, ti guide pensée bann ecrivain la Bible pou zot transmette “parole Bondié.”—1 Thessaloniciens 2:13.

L’esprit saint ti permette bann serviteur Bondié pou predire l’avenir dan enn fason exact. L’apotre Pierre ti expliké: “Nou pa finn gagne okenn prophetie par enn interpretation personnel. Parski jamais bann prophetie finn annoncé par volonté bann dimoune, mais c’est grace a l’esprit saint ki’nn pousse zot, ki bann dimoune inn dire seki Bondié ti ena pou dire.”—2 Pierre 1:20, 21; Yoël 2:28.

L’esprit saint ti aide Jésus ek lezot zom ki ti ena la foi pou preche la bonne nouvelle lor Royaume Bondié ek pou faire bann mirak. Jésus ti dire: “L’esprit Jéhovah lor moi, parski Li finn choisir moi pou annonce bann bon nouvelle ar bann pauvre, Li’nn envoye moi pou preche avek bann prisonnier ki zot pou liberé ek bann aveugle ki zot pou retrouve clair, pou libere bann ki souffert.”—Luc 4:18; Matthieu 12:28.

[L’encadré page 9]

BANN FASON KI L’ESPRIT SAINT KAPAV AIDE NOU

L’esprit saint kapav donne ou la force pou combatte kont bann tentation ek surmonte bann l’habitude ki kapav faire ou di-tort. L’apotre Paul ti dire: “Bondié Li fidele, ek Li pa pou laisse zot gagne enn tentation ki zot pa kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav endure sa.”—1 Corinthiens 10:13.

L’esprit saint kapav aide ou pou developpe bann qualité ki faire Bondié plaisir. “Fruit l’esprit c’est l’amour, la joie, la paix, patience, bienveillance, bonté, la foi, douceur, maitrise de soi.”—Galates 5:22, 23.

L’esprit saint kapav donne ou la force pou endure bann l’epreuve. “Pou tou kitsoz mo ena courage grace a celui ki donne moi la force.”—Philippiens 4:13.