Eski la Bible pareil couma lezot livre?
“Tou l’Ecriture li inspiré par Bondié, ek li utile . . . , pou ki dimoune ki servi Bondié kapav bien qualifié, bien equipé pou tou bon travail.”—2 TIMOTHÉE 3:16, 17.
PA TOU dimoune ki d’accord avek seki’nn ecrire dan sa verset-la. Ki ou pensé ou? Parmi bann raisonnement ki cité apré, lekel decrire pli bien seki ou pensé lor la Bible?
• Li enn grand livre litterature
• Li enn parmi bann plusieurs livre sacré ki ena
• Li enn vié livre zistoire kot ena bann leson lor plan moral
• Li Parole Bondié
Enn lot question c’est: ‘Eski seki ou croire li important?’ Guette seki la Bible dire lor li-mem: “Tou bann kitsoz ki finn ecrire longtemps finn ecrire pou nou l’instruction, pou ki par nou l’endurance ek par consolation ki nou gagné dan bann l’Ecriture, nou ena enn l’esperance.” (Romains 15:4) Alors, dapré sa bann parole-la, la Bible so l’objectif c’est pou instruire nou, console nou ek donne nou enn l’esperance.
Mais, si la Bible ti zis enn bon livre ou-soit enn parmi bann plusieurs livre sacré ki ena, eski ou ti pou faire li confiance ek laisse li instruire ou ek guide ou famille, surtout si so message li different avek seki ou pensé bon? Si la Bible ti enn livre kot ena bann zistoire ki’nn inventé, eski so bann promesse ti pou console ou ek donne ou enn l’esperance?
Parkont, plusieurs million dimoune ki finn etudié la Bible sur ki c’est zis la Bible ki Parole Bondié. Kifer? Ki kitsoz montré ki la Bible li different ar tou bann lezot livre? Nou invite ou pou guette bann prochain lartik ki pou examine cinq kitsoz ki montré couma la Bible li different ar bann lezot livre.