LARTIK KOUVERTIR | BANN TEMWIN ZEOVA—KISANNLA ZOT ETE?
Bann Temwin Zeova—Ki Zot Krwayans?
Bann Temwin Zeova krwar ki “tou Lekritir inspire par Bondie, ek li itil.” (2 Timote 3:16, NW.) Nou servi Labib kouma enn gid pratik pou aprann lor nou Kreater ek pou amenn enn lavi ki ena vremem enn sans.
Labib dir: “Bann dimounn bizin kone ki twa, ki apel Zeova, to tousel Pli Gran lor later antie.” (Psom 83:18, NW.) Se akoz sa ki nou ador zis Zeova, ek antan ki so bann Temwin nou fer zefor pou fer bann dimounn konn so nom.—Izai 43:10-12.
Antan ki Kretien, nou krwar ki Zezi, “Garson Bondie,”a ti vinn lor later kouma Lemesi. (Zan 1:34, 41; 4:25, 26) Apre so lamor, Zezi ti resisite ek li ti al dan lesiel. (1 Korintien 15:3, 4) Avek letan li ti vinn Lerwa dan Rwayom Bondie. (Revelasion 11:15) Sa Rwayom-la se enn vre gouvernman ki pou fer later revinn Paradi. (Daniel 2:44) Labib dir: “Bon dimounn pou erit later e zot pou viv enn lavi prosper ek pezib.”—Psom 37:11, 29.
“Kan zot lir Labib, se koumadir Bondie ki pe koz ar zot. Ninport ki problem zot gagne, zot rod enn solision dan Parol Bondie. . . . Pou zot, Parol Bondie ankor vivan.”—Benjamin Cherayath, enn pret Katolik, zournal Münsterländische Volkszeitung, l’Allemagne
Bann Temwin Zeova krwar ki mem zordi bann prinsip Labib kapav ed bann dimounn. (Izai 48:17, 18) Alor, nou swiv sa bann prinsip-la. Par exanp, nou pa fime ouswa droge parski Labib averti nou kont bann pratik ki pou gat nou lespri ek nou lekor. (2 Korintien 7:1) Nou osi rezet bann kitsoz ki Labib kondane dan enn fason kategorik, kouma par exanp bwar ziska sou, limoralite sexiel, ek kokin.—1 Korintien 6:9-11.
a Labib dir osi ki Zezi li “sel Garson ki Bondie inn kree direk” parski se limem ki’nn kree an premie ek se li tousel ki Zeova inn kree direk.—Zan 3:18, NW; Kolosien 1:13-15.