“Mo Tini Ferm! Mo Tini Ferm! Mo Tini Ferm!”
1 Sa bann parol la finn prononse par enn Kretyin fidel ki finn sape dan Holocauste, enn masak kot bann Alman Nazi finn tuy plizir milye dimunn. Bann parol sa Kretyin la reflekte desizyon ki bann milye Temwin—vivan ek mor—ti pran pu tini ferm zot bann krwayans malgre ki larme Nazi ti san pitye. (Efezyin 6:11, 13) Kaset video La fermeté des Témoins de Jéhovah face à la persécution nazie rakont kuraz sa bann Temwin la, ek zot viktwar fas ar persekisyon. Tu bann manb kongregasyon ankuraze pu get sa kaset la ek pu partaz zot linpresyon ek zot santiman ant zot.
2 Reflesi lor sa bann kestyon la: (1) Pu ki rezon bann temwin Zeova ti gard enn pozisyon ferm fas ar bann Nazi? (2a) Ki bann diskisyon finn ena akoz enn salitasyon, ek kifer? (2b) Kuma eski sa finn afekte bann fami Temwin? (3) Komye Temwin ti al dan bann kan konsantrasyon? Kuma ti apel zot, ek kuma eski Gestapo ti tret zot? (4) Ki pri nu bann frer pa finn ule peye pu gayn liberte? (5a) Kuma ek kan eski bann Temwin Zeova finn koz avek kuraz kont bann krim ki Hitler finn fer? (5b) Kuma eski Hitler finn reazir? (6) Kuma eski grasa zot solidarite bann serviter Zeova finn kapav prezerv zot lavi ek lavi zot kamarad lor plan fizik ek spirityel? (7) Ki kantik finn ekrir dan enn kan konsantrasyon? (8) Ki legzanp fidelite bann zom, bann fam, ek bann zenn pus u pu kontiyn res fidel ar Zeova, ariv seki ariv? (Get usi L’Annuaire 1999 paz 143-7) (9) Antan ki Temwin Zeova, ki santiman sa kaset la fer u gayne lor u pozisyon separe ar lemond?
3 Legzanp kuraz bann Temwin Zeova ki rakonte dan kaset video Fermeté kapav ed bann zenn, mem bann ki pa Temwin, pu fer fas ar bann problem kuma rasis, presyon lezot, ek bann kestyon konsyans. Si u enn zenn ki finn fek rant kolez, uswa ki pe fer bann pli gran klas, eski u kapav donn u bann profeser lokazyon pu servi sa kaset la dan klas? Kitfwa u kapav ofer zot enn kopi ek explik zot ki sa kaset la rakont enn resi istorik ki bann dimunn pa tro kone ek li enn dokimanter ki kapav fer nu tir enn leson moral.
4 Kaset Fermeté li enn bon zuti pu montre kuma lanseynman Bondye donn nu lafors spirityel pu tini ferm an faver seki bon, pu fer Li plezir. (1 Korintyin 16:13) Fer tu bann ki interese avek laverite, get sa kaset la.