“Bann Proklamater Rwayom ki Zele” Lasanble Distrik Bann Temwin Zeova pu Lane 2002
1 “Mo ti byin kontan kan zot ti dir mwa: ‘Anu al lakaz Zeova.’” (Psom 122:1) Kan nu egzaminn santiman sa ekrivin Psom la, nu aprann (1) seki li ti resanti kan ti invit li pu vinn ador Zeova, (2) bann bon frekantasyon ki li ti ena, setadir bann ki parey kuma li ti byin interese avek vre ladorasyon, ek (3) laranzman ki ti bizin fer pu invit plis dimunn posib, pu rasanble zot, ek pu vwayaze pu al lakaz Bondye.
2 Eski nu’si nu pa partaz sa mem santiman la kan nu tande ki pe pran bann dispozisyon pu nu prosin lasanble distrik? Nu inpasyan pu asiste sa bann rasanbleman la kan nu rapel lazwa ki nu finn gayne dan bann dernye lasanble ek lokazyon ki nu ena asterla pu asiste enn lot rasanbleman spesyal avek nu bann frer ek ser ki kontan Zeova. Finn pran bann dispozisyon pu ki sa lane la ena trwa zur lasanble Distrik “Bann Proklamater Rwayom ki Zele” dan bann zil ki dan teritwar Filyal Moris. Asterla mem, nu bizin fer nu bann laranzman pu nu asiste sa lasanble la ek tir maximem profi dan festin spirityel ki pe atann nu.
3 “Serviter ansarz ki fidel ek avize,” finn fini kumans prepar nuritir spirityel ki bizin ek ki pu servi dan lasanble. (Lik 12:42) Sak kongregasyon invite dan enn lasanble presi pu ki kumsa Lasal Lasanble pa tro ranpli. Anplis, Lasosyete finn kumans organiz bann diferan servis pu lasanble pu ki “tu kitsoz pas byin ek dan lord.” (1 Kor. 14:40) Avek tu sa kantite kitsoz ki finn fini organize pu nu profit byin lasanble dan bann bon kondisyon, asterla nu, ki nu kapav fer personelman pu prepar nu pu sa gran rasanbleman la?
4 Organiz U Depi Asterla Mem pu Asiste Tule Trwa Zur: Eski u pu bizin demann u patron konze pu asiste net tule trwa zur lasanble ki u kongregasyon invite? Zeova konpran ki ena bann patron ki “difisil.” (1 Pyer 2:18) Me nu bann lasanble byin inportan, ek nu anvi fer enn gran zefor pu asiste program la an antye. Koz sa bann kitsoz la ar Zeova dan lapriyer ek rod so direksyon pu ki tu pas byin.—Neemya 2:4.
5 Pran Kont Bann Lezot Manb Kongregasyon: Si nu kone ki enn frer uswa enn ser kapav gayn difikilte pu asiste lasanble akoz enn problem fizik uswa materyel, eski nu pa kapav “elarzi” nu lamur ek ed li? (2 Kor. 6:12, 13; Det. 15:7) Sa latitid la mem ki Pol ti ankuraze dan 2 Korintyin 8:14. Kifer eski nu pa invit sa bann dimunn la pu vwayaz avek nu pu al lasanble? Si zot bann pyonye, sirman zot pu ena buku bon lexperyans pu rakonte pandan vwayaz. Si zot bann manb aze dan kongregasyon, kitfwa u pu gayn lokazyon premye fwa pu ekut zot rakont zot lavi, depi ki zot finn konn laverite. Eski konpayni sa bann frer ek ser la pa pu ena enn bon linflyans lor u ek lor u fami? Zot pu byin apresye u zenerozite ek Zeova pu rekonpans u pu sa.—Pro. 28:27; Mat. 10:42.
6 Li vre ki avan tu li responsabilite bann fami Kretyin pu pran swin zot bann pros ki dan enn sityasyon difisil. Me kan mem sa, bann ansyin ek bann lezot manb dan kongregasyon ki konn sa bann sityasyon la, kapav ede ek fer bann laranzman neseser avek lamur.—1 Tim. 5:4.
7 Port U Volonter: Pandan lasanble, buku volonter ede dan diferan servis. Bann frer dan servis akey indik nu kot pu al asize ek bann frer ki okip parking zet kudey lor nu veykil pandan lazurne. Servis Lantretyin ena privilez pu kontiyn gard nu bon repitasyon lor propte; zot veye ki Lasal Lasanble ek so vwazinaz res prop. Eski nu kapav ede dan sa bann servis la uswa dan bann lezot servis kot bizin nu led? Eski u pu port u volonter pu travay “kotakot” avek u bann frer?—Sef. 3:9.
8 Eski Bann Dimunn Vremem Remark Seki Nu Fer? Lane dernyer, pandan lasanble distrik, enn misye ki ti finn aret etidye avek bann Temwin Zeova pandan 20 an, ti pe travay dan enn lotel. Li finn rakont detrwa Temwin ki li ti pe pans rekumans so letid Labib ek reasiste bann reynion. Kifer? Parski bann Temwin ki ti dan sa lotel la finn tret li avek lamur.
9 Enn reprezantan komersyal dan lotel finn dir lor nu bann frer: “Zot grup la, sa mem meyer grup ki res dan nu lotel. Zot ena buku pasyans ek bon manyer.” Wi, komye sa fer nu Papa dan lesyel fyer kan Li truve ki nu pe swiv sa konsey Zezi la: “Les zot lalimyer briye devan bann zom, pu ki bannla truv zot bann travay ek donn laglwar zot Papa ki dan lesyel”!—Mat. 5:16.
10 Anu gard mem latitid ki Lerwa David, ki avek lazwa ti inpasyan pu al lakaz Zeova. Dan nu bann lasanble distrik nu gayn enn kantite manze spirityel ki neseser pu nu ek nu profit konpayni nu bann frer, enn privilez ki nu pa kapav konpare. Alor, avek lantuzyas nu invit u pu kumans fer u bann laranzman pu asiste tu sesyon tule trwa zur Lasanble Distrik “Bann Proklamater Rwayom ki Zele” pu sa lane la!
[Lankadre lor paz 3]
Program
Vandredi ek Samdi
9:30 a.m. - 5:00 p.m.
Dimans
9:30 a.m. - 4:00 p.m.