1. Couma eski, dan le passé, peuple Jéhovah ti montré zot l’appreciation pou vrai l’adoration, ek ki l’occasion nou aussi nou ena zordi?

¹ Le roi Hizqiya ki ti règne lor Juda dan le passé, ti envoye bann coureur al remette bann l’invitation so peuple pou ki zot assisté enn grand l’assemblée dan Jérusalem. (2 Chron. 30:6, 13) Maniere ki le peuple ti reagir, ti montré couma zot ti considere vrai l’adoration. (2 Chron. 30:10-12) Bientot, bann serviteur Jéhovah pou gagne enn l’occasion zot aussi pou montré zot reconnaissance sincere pou privilege ki zot ena pou rassemblé pou adore Jéhovah. Ou congregation inn recevoir enn lettre ki invite ou pou l’assemblée district “Delivrance pé approché.” Couma ou pou reagir kan ou pou gagne sa l’invitation-la?

2. Ki nou kapav faire asterla-mem pou kapav profite l’assemblée maximum?

² Organise-ou asterla-mem: Pou kapav profite maximum sa program spirituel ki pé preparé avek amour-la, nou bizin present pou tou bann session. Li bon ki asterla-mem nou commence prend bann disposition ki necessaire pou ki nou ek nou famille assisté l’assemblée toulé-trois jour. (Prov. 21:5) Parmi bann disposition ki nou bizin prend, nou bizin demann congé nou patron, discute nou bann plan avek nou conjoint si li pa Témoin, ek aide bann ki pé etudié la Bible pou present toulé-jour. Pa laisse sa bann kitsoz important-la pou dernier l’heure. Plutot, koz sa avek Jéhovah dan la priere, ek ena confiance ki “Li-mem ki pou agir.”—Ps. 37:5.

3. Kifer nou bizin respecté bann disposition ki’nn prend pou l’assemblée?

³ L’organisation Jéhovah finn travail dur pou ki tou passe bien pou chaque l’assemblée. Reconnaissance pou sa travail dur ki bann frere inn faire avek l’esprit sacrifice-la, consideration pou nou bann frere ek soeur ki assisté l’assemblée, ek respé pou l’ordre ki etabli dan l’organisation, bizin pousse nou pou suive tou bann l’instruction ki ena dan sa lartik-la.—1 Cor. 13:5; 1 Thess. 5:12, 13; Héb. 13:17.

4, 5. Couma kapav prend compte bann ki ena bann besoin particulier?

⁴ Bann ki ena enn besoin personnel: Proverbes 3:27 dire: “Pa refuse faire di-bien pou bann dimoune ki merité, chaque fois ki to trouvé ki to kapav faire sa.” Couma eski ou kapav faire di-bien pou lezot en rapport avek l’assemblée? Kitfois bann proclamateur agé, bann ki handicapé, bann ki dan service a plein temps, ek lezot encore bizin enn l’aide pratik pou voyagé pou vinn l’assemblée ou-soit pou gagne enn logement. C’est avant tou zot famille ki bizin occupe zot. (1 Tim. 5:4) Mais si bannla pa kapav faire nanyin, alors kitfois bann frere ek soeur kapav aidé. (Gal. 6:10) Bann surveillant l’etude de livre bizin guetté kisannla dan zot group ena bann besoin personnel, pou ki zot fini organise tou bien avant l’assemblée.

⁵ Ena bann forme Demande de chambre pou cas particuliers pou seulement bann proclamateur ki vrai-mem dan le besoin ek ki pena personne pou occupe zot. Comité service congregation bizin base-zot lor lettre 14 décembre 2005 ki tou bann college ancien inn recevoir, pou examine zot cas. Sa disposition-la applik zis pou bann proclamateur ki ena enn bon reputation, ek pou zot zenfant ki ena enn bon conduite.

6. Kifer nou bizin assisté l’assemblée kot nou congregation invité?

⁶ Assité enn lot l’assemblée: Pou faire sur ki pou ena assez place ek publication disponible pou chaque l’assemblée, bann proclamateur encouragé pou assisté l’assemblée kot zot congregation invité.

7. Cite enn fason pou augmente la joie ki nou pou gagné pendant nou l’assemblée bientot.

⁷ Volontaire: Pena okenn doute ki tou bann ki pou assisté l’assemblée ek pou profite nourriture spirituel ek compagnie edifiant bann frere ek soeur, pou gagne enn grand la-joie. Nou pou gagne encore plus la-joie si nou offert-nou couma volontaire pou aidé dan bann travail ki bizin faire pou ki l’assemblée passe bien. (Actes 20:35) Bientot comité l’assemblée pou invite nou pou participe dan sa travail-la. Eski ou kapav porte-ou volontaire?—Ps. 110:3.

8. Couma ou considere l’assemblée district ki nou ena toulé-l’année, ek ki nou bizin determiné pou faire?

⁸ Alors ki li ti pé assisté enn l’assemblée district, enn garson cinq an ti dire: “Partie ki mo pli content dan seki nou faire pou adore Jéhovah, c’est l’assemblée district.” Sa bann parole ki sorti dan leker-la aide nou tou pou realisé ki quantité nou content assisté nou l’assemblée district toulé-l’année. Li pareil couma seki sa ecrivain Psaume-la ti chanté: “Enn jour dan to la-cour vaut plus ki mille jour dan enn lot place.” (Ps. 84:10). Dan enn cantik, David ti exprime so desir pou ‘reste dan lakaz Jéhovah toulé-jour so la-vie pou ki li guette temple Jéhovah avek admiration.’ (Ps. 27:4) Sa ti faire David grand plaisir pou trouve-li parmi bann adorateur Jéhovah. Nou souhaité ki nou aussi nou imite l’appreciation ki li ti ena pou vrai l’adoration, kan nou assisté toulé-trois jour l’assemblée district “Delivrance pé approché.”

[L’encadré page 3]

Vendredi ek samedi

9:30 a.m. - 5:05 p.m.

Dimanche

9:30 a.m. - 4:10 p.m.