“Suive Christ!” L’assemblée district bann Témoins de Jéhovah pou 2007
1, 2. (a) Couma eski Moïse ti encourage bann Israélite pou profite bann l’assemblée? (b) Ki bann preparation nou bizin faire depuis asterla-mem?
1 Moïse ti donne bann l’instruction pou ki tou bann Israélite ek bann etranger ki ti reste parmi zot, rassemblé toulé-sept an pou ecoute bann Lévite lire la Loi ar zot. Pou ki raison? “Pou zot ecouté ek pou zot aprann.” (Deut. 31:10-12) Jéhovah ti trouvé ki li ti necessaire pou rassemblé so peuple dan bann grand group. Bientot peuple Jéhovah pou rassemblé encore pendant trois jour pou l’assemblée district “Suive Christ!”
2 Eski ou’nn commence faire bann preparation? Eski ou bizin demann congé ou patron? Eski ou kapav aide bann ki pé etudié avek ou, ou-soit bann membre ou famille ki pa Témoin pou assisté l’assemblée ensam avek ou? Eski ena lezot dan congregation ki bizin l’aide pou kapav assisté l’assemblée? Sa bann renseignement-la pou aide ou pou prepare ou.
3. (a) Couma eski Isaïe 25:6 pé realisé zordi? (b) Ki nou finn remarké concernant l’assistance dan vendredi, ek ki nou bizin faire personnellement?
3 Assisté toulé-trois jour: Jéhovah donne so peuple enn l’abondance nourriture spirituel. (Is. 25:6) Banquet spirituel ki nou gagné pou l’assemblée district, li forme partie dan sa nourriture-la. Nou finn remarké ki l’assistance dan vendredi beaucoup pli moins ki l’assistance ki nou gagné lezot jour. Fixé l’objectif pou assisté toulé-trois jour l’assemblée ki l’organisation Jéhovah inn preparé pou nou, ek ki pou faire nou di-bien! Si ou bizin demann congé dan ou travail, koz sa ar Jéhovah dan la priere. Apré sa ‘prend ou courage’ pou koz avek ou patron dé-suite couma annonce date l’assemblée. (1 Thess. 2:2; Neh. 2:4, 5) Li pou kitfois utile ki ou explik li ki sa l’assemblée ki ou assisté toulé-l’année-la, li forme partie dan ou l’adoration. Si ou faire sa assez boner, ou patron pou pli kapav faire bann l’arrangement ki bizin pou li kapav donne ou congé.
4. Couma eski nou kapav prepare bann ki etudié avek nou ek bann membre nou famille ki pa Témoin pou l’assemblée?
4 Prepare bann ki etudié avek ou ek aussi ou famille: Sa faire plaisir kan ou bann l’etude assisté l’assemblée ensam avek ou, pa vrai? Sa pou donne zot l’occasion trouve personnellement l’amour ek fraternité ki ena entre nou kan nou “dan grand l’assemblée.” (Ps. 22:25) Faire zot koné bien a l’avance pou ki zot kapav reserve sa bann jour-la pou assisté l’assemblée. Faire zot koné pou kifer ou-mem ou content assisté l’assemblée. Ou kapav faire zot gagne enn l’idée lor seki pé attann zot si ou montré zot nou bann cassette video ki montré bann l’assemblée, surtout cassette Unis grâce à l’enseignement divin. Faire bann membre ou famille ki pa Témoin koné ki ou pou assisté l’assemblée. Kitfois zot kapav prend disposition pou vinn guette drame ou-soit pou assisté au moins enn jour l’assemblée ensam avek ou.
5. Couma eski nou kapav montré sa disposition pou donné-la ki Paul mentionné dan 1 Timothée 6:18?
5 Aide ou bann frere ek soeur: L’apotre Paul ti conseil bann chrétien ki ti riche lor plan materiel “pou faire le bien, pou vinn riche dan bann bon action, pou vinn genereux, pré pou partagé.” (1 Tim. 6:17, 18) Nou kapav montré sa disposition pou donné ki Paul ti encouragé-la kan nou pé prepare-nou pou l’assemblée. Nou kapav prend en consideration situation bann ki agé ek ena enn handicap physik, bann ki pionnier, bann famille kot ena zis mama ou-soit zis papa, ek kitfois lezot encore dan congregation ki bizin l’aide pou assisté l’assemblée. C’est surtout zot bann famille proche ki dan la verité ki bizin occupe sa bann dimoune-la. Mais bann ancien ek bann lezot frere ek soeur kapav servi zot discernement ek offert zot l’aide kan necessaire.—Gal. 6:10; 1 Tim. 5:4.
6, 7. (a) Ki bann preparation inn faire pou nou avant mem ki nou arrive la Salle l’assemblée? (b) Couma nou kapav montré nou reconnaissance pou tou sa travail ki faire pou nou-la? (Lire Hébreux 13:17.)
6 Cooperé pou soutenir bann disposition ki’nn prend: Couma nou arrive la Salle l’assemblée, nou rann-nou compte ki finn faire enn quantité travail pou nou kapav assisté l’assemblée. Avek amour bann frere accueillir nou, donne nou enn program, ek aide nou pou trouve enn place. Bann frere ek soeur inn nettoye la Salle l’assemblée ek inn bien decore l’estrade. Inn aussi faire enn travail bien important bien avant pou prepare bann participation ek prend compte enn quantité ti detail.
7 Pou chaque l’assemblée, ena beaucoup frere ki’nn travail pendant plusieurs mois pou faire bann l’arrangement ki necessaire. Zot famille aussi inn contribué kan zot inn permette sa bann frere-la donne zot lé-temps pou sa bann kitsoz important-la. Eski nou pa apprecié sa bann sacrifice ki faire pou ki nou, nou kapav profité apré? Nou kapav montré nou reconnaissance kan nou suive bann l’instruction dan sa lartik-la ek lezot l’instruction ki nou kapav gagné avant l’assemblée. (Héb. 13:17) Kan tou dimoune disposé pou cooperé, li possible pou tou kitsoz “passe couma bizin ek dan l’ordre.”—1 Cor. 14:40.
8. (a) Kifer bann rassemblement le peuple Jéhovah important sa quantité-la zordi? (b) i sakenn parmi nou kapav faire asterla-mem?
8 A mesure nou “trouve jour-la pé kosté,” bann rassemblement peuple Bondié vinn pli important encore. (Héb. 10:25) Dan bann l’assemblée, l’esclave fidel et avisé donne nou bann renseignement pou aide nou “pou veille bien pou applik tou bann parole” ki Jéhovah envie nou suive. (Deut. 31:12) Commence organise ou asterla-mem pou ou assisté l’assemblée district “Suive Christ” pou ou kapav profite tou sa l’instruction spirituel ek compagnie agreable-la!
[L’encadré, page 3]
Program
Vendredi ek samedi
9:20 a.m. - 5:05 p.m.
Dimanche
9:20 a.m. - 4.10 p.m.
[Box on page 4]