“Mars Avek Bondye”—Lasanble Distrik Bann Temwin Jéhovah pu 2004
1 Ki kitsoz ki fer nu bann lasanble distrik enn evennman spesyal pu u tulelane? Eski se bann diskur ankurazan ek dram ki “esklav fidel ek avize” prepare pu nu? (Mat. 24:45-47) Eski se bann nuvo piblikasyon ki donn nu la nuritir spirityel dan ler ki bizin? Eski se lexperyans bann frer ek ser ki rakonte kuma la Bib finn amelyor zot lavi? Eski se bann rapor kuma laktivite predikasyon pe progrese dan lezot peyi? Eski se konpayni nu bann frer ek ser de diferan laz? Wi, se pu tu sa bann rezon-la ek buku lezot rezon ankor, ki nu inpasyan pu asiste nu lasanble distrik.
2 Asiste Tule Trwa Zur: Se par Moïse ki Jéhovah ti donn so pep sa komannman-la: “Rasanble lepep . . . pu zot ekute ek pu zot aprann.” (Deut. 31:12) Atraver so esklav fidel ek avize, Jéhovah finn prepar enn program spesyal sak zur lasanble, pu instrir nu. Jéhovah anseyn nu ‘pu nu profi’; donk, nu pa pu anvi rat okenn so bann instriksyon. (Is. 48:17) Si u bizin pran konze dan u travay, imit kuraz ki Nehémia ti ena. Wi, priye Jéhovah avan ki u abord u patron. (Neh. 1:11; 2:4) Li bon usi ki depi asterla-mem, u inform bann manb u fami ki pa dan la verite.
3 Kifer eski li preferab ki nu asiste lasanble kot nu kongregasyon invite? Dan lantik Israël, bann tribi pa ti etabli zot camp kot zot ti anvi. Sakenn ti gayn enn landrwa byin presi kot li ti bizin instal so camp, swa dan l’est, l’ouest, nord uswa sud. (Get Étude Perspicace, Vol. 1, paz 385.) Zordi nu byin apresye zefor ki buku fer pu asiste otan ki posib lasanble kot zot invite. Bann ansyin, asistan ministeryel, ek pyonye pu sirman donn bon legzanp dan sa domenn-la.
4 Bann Bezwin Partikilye: Lapot Paul ti rapel bann kongregasyon dan Galatie pu “fer dibyin anver tu dimunn, me sirtu anver [zot] bann fami dan lafwa.” (Gal. 6:10) Bann frer ek ser aze, bann ki ena enn andikap, bann paran ki elve zot zanfan tusel, uswa bann ki dan servis aplintan, kitfwa bizin led pu asiste lasanble. Me, zot pa pu dir u nanyin! Alor, eski u kapav “fer dibyin” anver zot ek ed zot dan enn sertenn fason? Byinsir, bann fami sa bann frer ek ser-la ek bann ansyin dan la kongregasyon, bizin partikilyerman pran kont zot bann bezwin.
5 Anviron 2,500 lane desela, lepep Bondye ti organiz enn gran lasanble. Ezra ek bann Lévites ti lir ek ti explik Parol Bondye ar tu dimunn ki ti prezan. Rezilta? Nehémia 8:12 dir nu ki “lepep finn ale . . . pu rezwir zot buku, parski zot finn konpran bann parol ki finn explik zot.” Eski nu pa rekonesan zordi, ki parey kuma Ezra ek bann Lévites, esklav fidel ek avize usi servi Parol Bondye, li explik li, ek li montre nu kuma kapav aplik sa dan nu lavi? Kan li fer sa, sa esklav-la montre a ki pwin Jéhovah kontan So pep ek Li interes Li ar zot. Donk, anu fer nu enn devwar pu asiste tule trwa zur lasanble distrik, “Mars Avek Bondye”!
[Lankadre lor paz 5]
Program
Vendredi ek Samedi
9:30 a.m. – ver 5:10 p.m.
Dimanche
9:30 a.m. - ver 4:05 p.m.