“Donn Bondye Laglwar” Lasanble Distrik Bann Temwin Zeova pu 2003
1 Par mwayin so fidel profet Izai, Zeova ti donn lord: “O mo pep, ekut mwa; ek twa usi mo nasyon, pran mwa kont.” (Izai 51:4) Dan sa lepok lafin ki pe vinn deplizanpli difisil la, eski nu pa dakor ki ekut bann lord Zeova pli inportan ki zame? Enn fason pu “pran kont” Zeova, se kan nu obeir so komannman pu rasanble ansam pu ador Li. Nu pe atann avek inpasyans lokazyon spesyal ki nu lasanble distrik ofer nu. An 2003 Kolez Santral bann Temwin Zeova finn organiz ankor plizir lasanble distrik dan lemond antye.
2 Kuma ti anonse dan Latur Degard 1 Zilyet, 2002, pu ena bann lasanble internasyonal dan bann lavil presi. Ek bann delege inpe partu dan lemond pu kapav asiste lasanble dan sa bann landrwa la. Pwiski pa buku lavil ki pu akey bann delege pu lasanble internasyonal, zis bann kongregasyon ki’nn swazire ki pu kapav asiste lasanble dan sa bann lavil la. Me nu pu resanti sa latmosfer internasyonal la dan tu bann lasanble distrik. Pu ena bann misyoner ki pu prezan dan buku landrwa, ek li pu enn privilez pu ekut zot rakont zot bann lexperyans. Ki nu kapav fer pu tir maximem profi ar sa bann laranzman ki pe met an plas asterla pu nu bann lasanble la?
3 Rasanble ansam avek nu bann frer ek ser, li enn dispozisyon ki Zeova finn pran pu ed nu gayn lafors. Lapot Pol ti rekonet linportans ki sa ena. Li ti anvi res ansam avek so bann frer Kretyin pu ki zot kapav “ankuraze ansam” ek “vinn ferm.” (Rom. 1:11, 12, not.) Pu nu gayn lafors pu fer volonte Bondye, Kolez Santral finn pran bann dispozisyon avek lamur pu donn nu lokazyon pu profit enn esanz lankurazman dan prosin Lasanble Distrik “Donn Bondye Laglwar.”
4 Asiste Tulezur: Pu nu tir maximem profi ar linstriksyon ki esklav ki ena bon zizman donn nu, nu bizin asir nu ki nu asiste program lasanble an antye. (Mat. 24:45) Nu bizin ariv avan premye kantik ek res ziska nu dir “Amenn” avek tu nu leker dan lapriyer final. Eski u bizin demann u patron konze pu asiste lasanble tuletrwa zur? Malerezman, buku frer ek ser ek zot fami rat sa nuritir spirityel ki inportan la. Kuma? Kan zot pa asiste bann sesyon lasanble distrik dan Vandredi. Nu finn remarke dan sertenn lasanble ki enn kantite frer ek ser pe rat linstriksyon spirityel ek konpayni bann frer ek ser ki zot ti kapav profite pandan bann sesyon Vandredi.
5 Anu get legzanp Neemya. Avan ki li ti demann Lerwa Artaxerses permisyon pu li al Zerizalem pu ranz bann miray, li “ti priye Bondye.” (Nee. 2:4) U’si parey, u bizin priye Zeova pu u gayn kuraz pu demann u patron konze. Kumsa u pu kapav asiste tuletrwa zur lasanble. Ki u pu fer si asterla u patron pale donn u konze? Kitfwa u kapav explik li, ki linstriksyon ki nu gayne dan sa bann lasanble la ed nu pu vinn bann travayer onet, bann ki travay dir ek bann dimunn ki kapav fer konfyans. Ek kitfwa lerla, sa kapav ed li pu aksepte donn u konze.
6 Anplis, si sertin dan nu fami pa krwayan, nu pu montre konsiderasyon pu zot si nu fer zot kone pli vit posib, ki nu pe organiz nu pu nu lasanble. Eski u bann letid ek lezot ki interese bizin led pu organiz zot pu asiste lasanble? Seki zot truve ek seki zot tande laba kapav pus zot pu vinn bann adorater Zeova.—1 Kor. 14:25.
7 Manze: Sak dimunn bizin amenn so manze plito ki al aste andeor pandan ti poz ki gayne midi. Enn manze ki leze, nurisan ek fasil pu amene, li ase. Sipleman Nu Minister DiRwayom, Me 1995, paragraf 26, donn detrwa lide lor seki nu kapav amene. Pa gayn drwa amenn bann butey an ver ek bann bwason alkolik lasanble. Bann glasyer ek bann sak ki gard bann manze fre, bizin ase tipti pu ki zot rant anba u sez. Finn remarke ki sertin manze ek bwar pandan program. Sa montre enn mank respe pu sa lokazyon la.
8 Volonter: Pandan bann lane ki’nn pase, buku frer ek ser finn donn zot letan ek zot lenerzi pu ede pu organiz lasanble. Ek sa finn vremem apresye. Eski zot pu volonter sa lane la? Si u res pre, kifer eski u pa pran bann dispozisyon pu ki tu u fami donn kudmin? Sertin frer finn amenn zot bann letid ki pe progrese avek zot. Kumsa avan mem zot batize, sa bann nuvo la kapav aprann seki vedir sutenir ladorasyon Zeova. Ena buku kitsoz pu fer pu ki sa lasanble la derul kuma bizin. Normalman, de uswa trwa zur avan ki ena lasanble, abitye organiz enn program netwayaz. Apre sa, bann frer kumans bann diferan instalasyon.
9 Eski u kapav rezerv inpe letan pandan lasanble pu ede dan enn bann servis? Pandan lasanble, buku volonter donn kudmin pu ki bann servis derul byin. Bann servis akey ed u pu truv enn plas ek bann ki okip parking vey lor nu bann veykil pandan lazurne. Servis netwayaz ena privilez pu gard bon repitasyon ki nu ena lor propte. Zot montre sa kan zot les nu Lasal Lasanble osi prop ki li ti ete avan lasanble kumanse. Kan u servi u bann frer, mem si li zis pu detrwa lertan, sa rann enn gran servis ek sa fer gayn buku satisfaksyon. Si u kapav ede, silvuple fer Servis Volonter kone dan lasanble.
10 Baj: Bann baj lasanble distrik permet nu rekonet nu bann frer ek zot atir latansyon lor lasanble. Me, fode pa donn sa tu dimunn. Bann ki met sa bann baj la sipoze fer parti dan enn kongregasyon presi bann Temwin Zeova kot zot ena enn bon repitasyon. Lor baj la ena enn laliyn kot dimunn la kapav met so non ek non so kongregasyon. Donk, fode ki sa dimunn la frekant sa kongregasyon la dan enn fason rezonab.
11 Lasosyete avoy sak kongregasyon enn sertenn kantite baj. Li bon ki donn sak proklamater ki li batize uswa non, enn baj. Donn usi bann zanfan ek bann ki asiste regilyerman reynion ek ki pe progrese pu sorti predikasyon. Parkont, li pa bon si donn enn kikenn ki’nn exkli enn baj. Kan bann baj pu disponib dan kongregasyon, bann ansyin pu veye ki distribye zot an akor avek sa bann linstriksyon la.
12 Ed Bann Ki Ena Bann Bezwin Spesyal: Eski dan u kongregasyon ena ki bizin led pu asiste lasanble? Byinsir se zot bann fami ki dan laverite ki an premye bizin pran kont bann bezwin spesyal bann dimunn aze, bann ki dan servis aplintan, uswa bann andikape. Me bann ansyin ek bann lezot ki konn sityasyon sa bann dimunn la, kapav propoz zot led avek lamur zot usi.
13 Nu Kuma enn Spektak: Eski bann dimunn truv diferans ki ena ant bann Temwin Zeova ek bann dimunn ki dan lemond? Byin sir! Get sertin komanter ki bann manejer lotel dan enn lavil finn fer: “Nu finn tuletan travay pu bann kongre, me zot, zot pli korpere ek zot ena pli bon manyer.” “Semenn dernyer nu ti gayn enn lot grup relizye avek nu. Diferans ki ena ant zot, bann Temwin Zeova ek bannla, li remarkab.” “Nu sir ki nu kapav kont lor zot led ek lor zot korperasyon.” Eski bann komanter kumsa pa ed nu pu konpran ziska ki pwin sa “sazes ki sorti dan lesyel” la ena enn lefe pozitif lor nu personalite? (Zak 3:17) Pwiski nu kuma “enn spektak pu lemond,” li bon ki tuletan nu kondwit reflekte dinite ek laglwar nu Bondye, Zeova.—1 Kor. 4:9.
14 Kan nu pe prepar nu pu lasanble, nu bizin reflesi lor nu labiyman. Laplipar ant nu sezi sa lokazyon la pu fer linz nef. Kan mem sa, anu gard dan nu lespri ki nu linz ek nu laparans bizin sinp ek ki li bizin reflekte dinite sa Bondye ki nu pe adore la. (1 Tim. 2:9, 10) Li pa neseser ki nu met bann linz ser pu nu parmi bann ki “fer lanseynman nu Sover, Bondye, paret pli zoli.”—Tit 2:10. Silvuple get wF 97 15/6, paz 17, 18 ek wCe 2002 1/8, paz 30-2.
15 Pwiski “lasenn sa lemond la pe sanze,” nu bizin nu bann lasanble distrik pu ed nu res konsantre lor bann kitsoz spirityel. (1 Kor. 7:31) Nu bizin fer zefor pu fer bann laranzman pu asiste tuletrwa zur lasanble, me li vo lapenn fer sa bann zefor la. Sa lane la Lasanble Distrik “Donn Bondye Laglwar” finn prepare pu ed nu res ferm ziska ki Zeova amenn so zizman lor lemond Satan. Fode ki nu pa les nanyin anpes nu gayn linstriksyon ki Zeova finn prepare pu nu.—Izai 51:4, 5.
[Lankadre paz 3]
Program
Vandredi ek Samdi
9:30 a.m. – 5:00 p.m.
Dimans
9:30 a.m. – 4:05 p.m.
[Lankadre paz 4]
Bann Pwin Inportan Ki U Bizin Rapel
■ Asiste tu sesyon tuletrwa zur
■ Amenn u manze, kumsa u pu profit poz midi
■ Donn u non pu volonter
■ Asir u ki u gayn enn baj, ek met li
■ Vey lor u labiyman, u laparans, ek u kondwit