L’assemblée district bann Témoins de Jéhovah 2008
1. (a) Kifer conseil ki Paul ti donne bann chretien hébreux appliké surtout ar nou zordi? (Lire Hébreux 10:24, 25.) (b) Bientot ki l’occasion nou pou gagné pou applik sa conseil ki Paul inn donné-la?
1 L’apotre Paul ti encourage bann chretien hébreux pou rassemblé ek encourage sakenn so camarade “encore plus” kan zot trouve jour-la kosté. (Héb. 10:24, 25) Nou pé contigne gagne bann preuve ki sa jour ki Paul ti pé kozé-la li bien pré! Alors, nou attann avek impatience bann l’occasion pou nou joinde ensam avek nou bann frere ek soeur pou nou gagne l’enseignement spirituel ki pou aide nou dan sa bann “dernier jour” ki pli allé, pé vinn pli difficile-la. (2 Tim. 3:1) Nou pou gagne sa l’occasion-la dan prochain l’assemblée district 2008.
2. (a) Kifer li bien important ki nou assisté toulé-trois jour l’assemblée? (b) Couma eski nou bizin commence prepare nou asterla-mem pou ki nou kapav al l’assemblée?
2 Assisté toulé-trois jour: Nou encourage ou pou assisté toulé-trois jour l’assemblée. Si nou pa “neglige nou bann rassemblement,” nou pa pou rate sa nourriture spirituel important ki nou pou gagné dan l’assemblée-la. (Héb. 10:25) Commence prepare-ou pli boner possible. Ou pou envie informe ou patron boner pou ki li kapav prend bann disposition ki bizin dan ou travail si necessaire. Si ou bann zenfant bizin al lekol dan sa periode kot pou ena l’assemblée-la, faire zot professeur koné ki ou pou faire. Faire zot koné ki l’assemblée li enn kitsoz ki forme partie dan ou l’adoration. Ou kapav sur ki Jéhovah pou beni bann zeffort ki ou faire pou mette le Royaume dan premier place.—Mat. 6:33.
3. Couma nou kapav montré ki nou ena consideration pou lezot?
3 Aide lezot pou vini: Paul ti encourage bann frere pou “interesse-[zot] sakenn ar [zot] camarade.” (Héb. 10:24) Eski bann frere ek soeur dan ou l’etude de livre bizin l’aide pou vinn assisté l’assemblée? Eski ou kapav aide ou bann etudiant la Bible vinn assisté l’assemblée mem si zot kapav vini zis enn jour? Kan ou dire ou bann famille ki pena mem croyance ki ou, ki ou pé al l’assemblée, invite zot pou vinn avek ou. Bann zeffort ki ou faire avek amour kapav ena bann resultat ki ou pa attann.
4. (a) Dan ki fason nou kapav glorifié Jéhovah pendant l’assemblée? (b) Grace a bon conduite nou bann frere, ki commentaire responsable enn l’hotel ti faire?
4 Bann bon action: Kan nou obeir commandement Jéhovah pou rassemblé ensam pou adore Li, sa permette nou ‘tire profit.’ Pli important encore, sa donne nou l’occasion pou glorifié nom Jéhovah. (Is. 48:17) ‘Bann dimoune trouve nou bann bon action’ dan bann l’assemblée district, ek certain finn dire seki zot ressenti. (1 Tim. 5:25) Dan enn la-ville kot depuis bien longtemps faire bann l’assemblée, responsable enn l’hotel ti reconette: “Beaucoup dimoune dan la ville koz lor bann Témoins de Jéhovah ek seki zot bann l’assemblée representé pou nou. Nou koné couma zot nettoye l’endroit kot zot rassemblé, ek nou trouve zot nettoye bann parking. C’est enn plaisir kan zot vinn kot nou pendant l’été. Nou souhaité ki sa kapav contigné dan bann l’année ki pé vini.”
5. Couma Matthieu 4:4 montré bien l’importance pou nou attentif pendant chaque partie ki pou ena dan programme?
5 Jésus ti dire ki li bien important ki nou ecoute “tou parole ki sorti dan la bouche Jéhovah.” (Mat. 4:4) Chaque l’année, par nou bann l’assemblée, Jéhovah donne ‘nourriture spirituel dan l’heure ki bizin,’ ki’nn preparé par “l’esclave fidele et avisé.” (Mat. 24:45) Inn faire beaucoup travail pou kapav prepare ek servi sa festin spirituel-la. Anou montré nou reconnaissance pou l’amour ki Jéhovah manifesté envers nou kan nou present ek ki nou attentif pendant tou bann partie ki pou ena dan programme.
[L’encadré, page 3]
Programme:
Vendredi ek samedi
9:20 a.m. - 4:55 p.m.
Dimanche
9:20 a.m. - 4:00 p.m.