Eski U Kongregasyon Ena enn Gran Teritwar?
1 Zezi ti donn enn temwaynaz konple atraver gran teritwar ansyin Izrael ki ti kumans apartir bann lavil dan Zide ziska bann landrwa lakanpayn Galile. (Mark 1:38, 39; Lik 23:5) Nu’si nu bizin koz labonn nuvel avek maximem dimunn. (Mark 13:10) Me, sa kapav enn defi. Kifer?
2 Sertin kongregasyon dan Moris ena plis teritwar lakanpayn. Ki nu kapav fer pu ed bann dimunn ki res dan sa bann gran teritwar la pu aprann laverite lor Zeova, Zezi ek lor Rwayom?
3 Organiz Byin: Sirveyan servis ek serviter teritwar bizin ena enn kontrol lor bann zefor ki kongregasyon pe fer ek organiz zot pu ki kapav fer enn pli bon travay. Kitfwa kapav organiz bann Samdi spesyal kan buku kapav pas enn zurne antye dan sa laktivite la. Kan travay dan bann teritwar ki ase lwin, organiz pu pas bann pli long lazurne dan predikasyon ek si posib, amenn usi enn ti kitsoz pu manze midi. Pu al predikasyon zot kapav zwenn pli boner ki dabitid, kumsa zot kapav gayn letan pu vwayaze uswa pu fer reynion pu predikasyon pre avek landrwa kot pu travay. Organize pu travay dan bann teritwar lakanpayn pandan bann peryod lane kot letan bon. Nu ti pu kontan atir latansyon sirveyan servis lor sa trwa pwin la:
◼ Nu rapel tu bann proklamater ki nu pa pu al prese dan okenn vilaz Indu kan ena zot fet.
◼ Kan u kone ki nu pu al prese dan bann vilaz lakanpayn, bizin organize depi avan pu ki sakenn kone ki kote li pu prese avan mem ki ariv dan teritwar. Sak ti grup desann dan enn landrwa diferan dan teritwar.
◼ Sa frer ki pe diriz so ti grup la, (2-6 proklamater) bizin asire ki zot tu aret travay an mem tan. Pa les okenn proklamater tusel deryer dan vilaz la.
4 Fer sir ki u amenn ase piblikasyon. Si pres rarman dan sa teritwar la, kitfwa li bon ki nu les enn trak uswa enn ansyin peryodik kot bann absan. Ofer trak Eski U Ti Pu Kontan Konn Plis lor Labib? tu dimunn ki u zwenn ek les enn kot bann absan.
5 Korpere Ful-Ful: Travay dan enn gran teritwar demann korperasyon tu dimunn dan kongregasyon. Kan pe vwayaz dan loto enn frer, bann ki vwayaz ansam kapav kontribye pu lesans. Bizin servi disernman kan u truv bann dimunn ki dispoze koze. U bizin tuletan konsyan ki bizin zwenn tu dimunn dan teritwar ek ena konsiderasyon pu bann ki pe atann u. Si u anvi kontiyn konversasyon avek enn dimunn pandan ase lontan, eski u kapav fer laranzman pu ki leres grup kapav kontiyn prese?
6 Pran bann dispozisyon presi pu returne ek vizit bann ki interese. Apart ladres, sey pran nimero telefonn dimunn interese la pu ki u kapav kontakte li ek kontiyn konversasyon par telefonn. Si bann semin lakanpayn pena non uswa bann lakaz pena nimero, desinn enn bon map uswa fer enn deskripsyon lakaz la pu ki u kapav truv dimunn interese la kan u pu revizit li.
7 Li vremem enn privilez pu nu pu met an pratik bann instriksyon Zezi: “Dan ninport ki lavil uswa vilaz zot rantre, rode kisannla ki merite”! (Mat. 10:11) U kapav sir ki Zeova pu beni u bann zefor amezir ki u pre pu donn umem dan sa travay ki donn pli gran satisfaksyon ki kapav ena!