Kan bann dimoune pa kot zot
1. Ki problem souvent nou gagné kan nou preché porte-en-porte?
1 Dan beaucoup l’endroit, pli allé li pé vinn pli difficile pou joinde bann dimoune kot zot. Dan sa “lepok critik” ki nou pé vive-la, beaucoup dimoune obligé travail pli beaucoup l’heure-temps zis pou zot kapav joinde lé-deux boute. (2 Tim. 3:1) Ena ki pa kot zot parski zot inn al faire shopping, ou-soit zot pé detann-zot. Couma nou kapav faire sa bann dimoune-la konn la bonne nouvelle?
2. Couma nou kapav faire sur ki enn kikenn retourne visite bann absent?
2 Prend bann bon note: D’abord nou bizin note bann ki absent. Sa li important surtout si ou travail souvent ou territoire. Eski ou note nom la rue, numero territoire ki ou pé travail, ou nom, ek date? Ou kapav garde l’espace pou ecrire lezot note kan ou, ou-soit enn lot proclamateur retourne faire bann absent. Kan ou fini preché, pa blié donne sa bann note-la ar sa dimoune ki responsable sa carte territoire-la, a moins ki li d’accord ki ou faire bann absent-la. Servi enn lot feuille kan ou prend note bann dimoune ki interessé pou ou kapav retourne visite zot.
3. Ki possibilité nou ena pou joinde bann ki absent?
3 Essaye passé enn lot l’heure: Li kapav arrivé ki bann dimoune ki pa kot zot dan la journée, parski zot travail, kapav là dan la soirée ou-soit dan week-end. Eski ou pou kapav change ou program pou al kot sa bann dimoune-la dan enn pli bon l’heure? (1 Cor. 10:24) Sinon, ou kapav donne ou bann absent avek enn proclamateur ki li, li kapav retourne guette zot enn lot l’heure. Ou-bien, ou kapav ecrire bann ki pa kot zot ou-soit essaye joinde zot par telephone. Bann proclamateur ki limité a cause zot la-santé ek ki pa trop kapav preché porte-en-porte, pou content pou aide ou dan sa domaine-la.
4. Ki l’exemple montré l’importance pou faire bann absent?
4 Nou ena enn l’exemple ki montré couma li important pou essaye joinde bann ki absent. Bann proclamateur souvent ti tape enn la-porte, mais jamais ti ena personne. Apré trois an, finalement ti reussi joinde proprietaire-la. En realité, madame-la aussi ti pé attann tou sa lé-temps-la pou ki enn Témoin passe kot li pou contigne l’etude ki li ti’nn commencé avant ki li ti vinn reste dan sa l’endroit-la.
5. Kan eski fini travail enn territoire?
5 Termine territoire: Kan eski nou kapav dire ki’nn fini travail enn territoire? Normalement, c’est kan inn faire tou seki possible pou joinde enn dimoune dan chaque lakaz. Kitfois li bon ki nou laisse enn tract ou-soit enn vié periodik kot bann absent, sans trop faire remarké, surtout dan bann territoire ki nou pa faire souvent. Enn territoire bizin terminé dan quatre mois. Bizin checké si territoire inn fini terminé pou ki frere ki occupe carte territoire kapav garde so dossier a-jour.
6. Kifer nou bizin essaye joinde tou dimoune dan nou territoire pou partage la bonne nouvelle avek zot?
6 Nou envie ki maximum dimoune possible gagne l’occasion tann nom Jéhovah ek sapé. (Rom. 10:13, 14) Sa applik aussi ar bann ki pa kot zot kan nou preché porte-en-porte. Pareil couma l’apotre Paul, seki nou pli envie c’est pou “rann temoignage a fond lor bon nouvel faveur Bondié ki personne pa merité.”—Actes 20:24.