Montre Nu Lapresyasyon pu Bann Piblikasyon Ki Zeova Donn Nu
1 Kan Lerwa Yosiya ti fer laranzman pu repar tanp, li ti montre ki li ti ena konfyans dan bann dimunn ki ti swazire pu fer sa travay la. Get seki li ti dir: “Pa pu demann zot kont lor larzan ki’nn donn zot, parski zot fidel dan zot travay.” (2 Ler. 22:3-7) Nu kapav truve ki sa bann dimunn la ti apresye bann kitsoz sakre. Zot ti montre sa par manyer ki zot ti servi bann kitsoz ki Zeova ti donn zot. Zordi, nu’si nu bizin montre ki nu fidel dan fason ki nu servi bann kitsoz ki Zeova donn nu pu al prese.
2 Dan Predikasyon: Nu donn nu bann piblikasyon buku valer parski nu apresye zot mesaz inportan ek nu konsyan pri ki zot finn kute. Ala kifer fode pa nu les nu bann piblikasyon ar bann dimunn ki pa vremem interese ar mesaz Labib. Si nu truve ki enn dimunn pa montre enn gran lintere pu labonn nuvel, nu kapav ofer li enn trak olye enn lot piblikasyon.
3 Nu pu montre valer ki nu bann piblikasyon ena dan fason ki nu plas zot. Nu pu evit les zot dan bann landrwa piblik kot zot pu fann-fane partu. Pu nu evit fer gaspiyaz, nu pu gete ki kantite piblikasyon nu ena lakaz, avan nu pran lot. Si u truve ki u ena bann nimero peryodik an plis kot u sak fwa, pans pu diminye u komann.
4 Bann Piblikasyon Personel: Nu bizin komann zis bann piblikasyon ki nu bizin. Responsab piblikasyon ek sirveyan servis pu veye ki pena plis piblikasyon ki bizin dan zot stok. Nu bizin pa fer gaspiyaz sirtu kan nu komann sertin piblikasyon. Par egzanp, bann Labib delix, bann Labib avek referans ek bann lezot gro liv, kuma Concordance, Index, bann volim Étude perspicace, ek liv Les Témoins de Jéhovah: Prédicateurs du Royaume de Dieu, tusala zot bann piblikasyon ki kut buku larzan. Se zis kan bann proklamater bizin sa bann piblikasyon la, ki pu komann zot. Fode pa gard zot dan stok kongregasyon.
5 Eski u ekrir u non ek u ladres lor tu u bann piblikasyon? Sa pu anpes u repran enn lot piblikasyon pu ranplas seki u’nn lese par la. Si u perdi enn kantik uswa enn lot piblikasyon ki servi pu etidye, u kapav retruv zot parmi bann kitsoz ki’nn perdi ek ki’nn ramase dan Lasal DiRwayom uswa dan Lasal Lasanble.—Lik 15:8, 9.
6 Anu vey byin fason ki nu servi nu bann piblikasyon. Kumsa nu pu montre ki nu fidel dan fason ki nu servi bann kitsoz ki Zeova donn nu.—Lik 16:10.